საკრებულოს ბოლო სხდომაზე ლანჩხუთელი დეპუტატი, რომან ბიწაძე, რომელიც ეთიკის კომისიას უდგას სათავეში, მეგაფონით გამოცხადდა. როგორც გაირკვა, ბიწაძეს ეს მოწყობილობა იუსტიციის მინისტრთან, თეა წულუკიანთან საკუთარი ხმის მისაწვდენად სჭირდება.
რომან ბიწაძის უკმაყოფილების მიზეზი სამოქალაქო და საჯარო რეესტრის გამგეობის შენობის მეოთხე სართულზე არსებობამ გამოიწვია.
„მეოთხე სართულზეა სამოქალაქო და საჯარო რეესტრი. ყოველდღიურად ძალიან ბევრ მოქალაქეს უწევს ამ სამსახურებში მისვლა. უჭირთ ადამიანებს მე-4 სართულზე ასვლა-ჩამოსვლა. როგორც ვიცი, იუსტიციის სამინისტროში მაღალი ხელფასებიც აქვთ და უფრო მეტი პრემიები. კეთილი ინებონ და ამ სამსახურებს ისეთი ფართი გამოუყონ, რომ ადამიანებმა ადვილად ისარგებლონ. სწორედ ამისთვის მინდა ეს მეგაფონიც, თუ არ ესმის მინისტრს ჩვენი პრობლემა, ავიღებ და ამის საშუალებით მაინც გავაგონებ“, _ ამბობს ბიწაძე.
რომან ბიწაძეს იმავე საკრებულოს სხდომაზე განუმარტეს, რომ აღნიშნული პრობლემის მოგვარება დღის წესრიგში დგას და ამ სამსახურების გადასვლა ყოფილი კომისარიატის შენობაში იგეგმება, იქ არსებული ფართის კეთილმოწყობის შემდეგ.
