გურიაში, 17 ივნისს მოსულმა ძლიერმა წვიმამ, პატარა ღელეების და მდინარეების ადიდება გამოიწვია. 18 ივნისს, ოზურგეთისა და ლანჩხუთის მუნიციპალიტეტის ზოგიერთ სოფელს სერიოზული პრობლემები შეექმნა. სოფელ მერიაში, მდინარე ხიდიდან გადმოვიდა, დაიტბორა ნათესები, გამოირთო ელექტროენერგია. მთელი დღის განმავლობაში “ენერგო პრო ჯორჯია” აღდგენით სამუშაოებს წყალდიდობის გამო ვერ იწყებდა. წყალდიდობამ ყველა მეტად დაბა ურეკი და სოფელი წყალწმინდა დააზარალა, სადაც წლის დონემ ნახევარ მეტრს გადააჭარბა. სრულად დაიტბორა პირველი სართულები, დაიხოცა შინაური პირუტყვი და ფრინველი. ზოგიერთმა საქონლის გადარჩენა იმით შეძლო, რომ მათ ბინა საცხოვრებელი სახლის მეორე სართულზე გამოუყო.
ურეკში მისულ “გურია ნიუსის” გადამღებ ჯგუფს მძიმე სიტუაცია დახვდა _ პროდუქტები, ტანსაცმელი და სხვა საყოფაცხოვრებო ნივთები წყალს მიჰქონდა, ქუჩებში მდინარე მოდიოდა. აღსანიშნავია, რომ წყალდიდობა ურეკელებისთვის იშვიათ “ხილს” არ წარმოადგენს. როგორც თავად აღნიშნავენ, მოუწესრიგებელი სანიაღვრეების და კანალიზაციის არქონის გამო, წელიწადში ორ-სამჯერ ასეთ მდგომარეობაში არიან:
_ წლებია, ასეთ მდგომარეობაში ვართ. ეს პირველი შემთხვევა არ არის. დავიღალეთ, დავიტანჯეთ. წყალმა, კარგა ხანია, გზა წაიღო და ამის გამო, დამსვენებელი ჩვენთან არ ჩერდება. პატრონი არავინ არის _ უამრავი წერილი მივწერეთ ხელისუფლებას, ოზურგეთის გამგებელთანაც ბევრჯერ ვიყავით ჩასულები, თუმცა, უშედეგოდ, _ აღნიშნა ჩვენთან საუბრისას ლია გელაშვილმა.
მისივე თქმით, წლების წინ, ბადრი პატარკაციშვილმა ურეკში სპეციალური ტბა გააკეთა, რომელშიც ნალექები გროვდებოდა:
_ ის ტბა ამ პრობლემებს თავიდან გვაცილებდა, თუმცა, შემდეგ ამოაშრეს. არ ვიცით, რატომ, მაგრამ ის კი ვიცით, რომ ამის გამო წვიმის გვეშინია, _ დასძინა გელაშვილმა.
თალიკო დვალიშვილს წყალდიდობის გამო, მოსავალი სრულად გაუნადგურდა. წყალმა მისი პროდუქტების მარაგიც გაიყოლა და პირველი სართულიც დაუზიანა. ამბობს, რომ გახშირებული წყალდიდობების მიზეზი ხელისუფლების უყურადღებობაა:
_ დიდი ხანია, გამწარებულები ვართ. 20 წელია, კანალიზაციის გაკეთებას გვპირდებიან, მაგრამ არ აკეთებენ. ურეკს პატრონი არ ჰყავს. წყალს გამტარი არ აქვს და ამიტომ წამოსული ნიაღვარი სახლებში შემოდის, _ აღნიშნა “გურია ნიუსთან” საუბრისას თალიკო დვალიშვილმა.
იგივეს ყვებიან დანარჩენი დაზარალებულები და აღნიშნავენ, რომ ხელისუფლებას ისინი მხოლოდ საარჩევნოდ ახსენდებათ.
მიუხედავად იმისა, რომ ურეკელებს პრობლემები 18 ივნისს, ადრიანი დილიდან შეექმნათ, დღის 2 საათისთვის ხელისუფლება, მათთან ნამყოფიც არ იყო. ადგილზე არც სამაშველო სამსახური დაგვხვდა. ერთ-ერთი მოსახლის თქმით, დაბის რწმუნებულმა დილით რამდენიმე წუთით მიირბინა და შემდეგ უმისამართოდ წავიდა.
წყალდიდობის ეპიცენტრთან ახლოს, განვითარებულ მოვლენებს პოლიცია მშრალი ადგილიდან ადევნებდა თვალს.
ოზურგეთის პოლიციის უფროსის, ალეკო ბირთველიშვილის განმარტებით, მათი მოვალეობა წყალში შესვლა და ხალხისთვის, თუნდაც ფიზიკურად დახმარება არ არის: _ ჩვენ კი მივალთ, მაგრამ რომ მივიდე, რა უნდა გავაკეთო (არადა, გასაკეთებელი ძალიან ბევრი იყო ავტ.)? ჩვენი ფუნქცია ის არის, რომ ხალხი მშვიდობიანად გამოვიყვანოთ. ამოტუმბვას და დანარჩენს კი, სპეციალური სამსახური გააკეთებს, _ გვითხრა ბირთველიშვილმა და აღნიშნა, რომ სპეციალური სამსახურები, სხვა ადგილზე წყლის ამოტუმბვას ცდილობდნენ. თუმცა, ვერც ის “სხვა ადგილი” დაგვისახელა და ვერც მიზეზი გვითხრა, თუ რატომ მატულობდა წყლის დონე დღის ორი საათისთვის მაშინ, როცა “სპეციალური სამსახურები” წყლის ამოტუმბვას ცდილობდნენ.
წყალდიდობით მიყენებული ზარალი რომ დიდია, ამას ხელისუფლებაც ადასტურებს, თუმცა, ჯერ კონკრეტული მონაცემები უცნობია. გურიის გუბერნატორის მოადგილის, ლელა თავართქილაძის თქმით, კომისიები ადგილებზე მუშაობენ.
_ სპეციალური კომისიები შედგენილია მუნიციპალიტეტების მიხედვით, რომლებიც ადგილებზე არიან გასულები და ზარალს თვლიან. ჯერ-ჯერობით სამუშაო პროცესია და ზარალის დადგენას დრო სჭირდება.
_ ქალბატონო ლელა, დაზარალებულებს კომპენსაციებს მისცემთ?
_ ამ წუთს ამაზე ვერაფერს გეტყვით. ჯერ ზარალი უნდა დადგინდეს და შემდგომ შეგვეძლება ვთქვათ, რა და როგორ იქნება, _ გვითხრა თავართქილაძემ.
