_ “გლობალ კონტაქტ კონსალტინგისადმი” საქართველოს კონტროლის პალატის მიმართვის მიუხედავად, ცალკეულ პირთა მხრიდან კვლავ გრძელდება ამომრჩევლებისთვის პოლიტიკური სუბიექტის მხარდაჭერის პირობით, სატელევიზიო ანტენების გადაცემა. საქართველოს პროკურატურა მიიჩნევს, რომ აღნიშნული ქმედება, შესაძლოა, შეიცავდეს დანაშაულის ნიშნებს. შესაბამისად, არსებობს საკმარისი საფუძველი, დაიწყოს გამოძიება. ამასთანავე, პროკურატურას მიზანშეწონილად მიაჩნია, გამოიყენოს სისხლის სამართლის საპროცესო კოდექსით მისთვის მინიჭებული უფლებამოსილება და გამოძიების დასრულებამდე სასამართლოს მიმართოს შუამდგომლობით შპს “გლობალ კონტაქტ კონსალტინგის” მფლობელობაში არსებული, დაუმონტაჟებელი სატელევიზიო ანტენების დროებით დაყადაღების შესახებ”, – ნათქვამია განცხადებაში.
დაყადაღების პროცესი, გადაწყვეტილების მიღებიდან რამდენიმე საათში მთელი საქართველოს მასშტაბით დაიწყო. დააყადაღა, ოზურგეთის მუნიციპალიტეტის ტერიტორიაზე, კერძოს შეკვეთილში აკვაპარკ “ციცინათელას” მიმდებარე ტერიტორიაზე არსებული საწყობიც, სადაც პოლიციელები, დაახლოებით, 4 საათისთვის მივიდნენ.
ადგილზე მობილიზებულმა გურიის სამხარეო პოლიციის მთავარი საამართველოს ხელმძღვანელობამ აღნიშნულ საწყობში შესვლის უფლება “გლობალტივის” ერთ-ერთ ადვოკატს, ირაკლი შავაძეს არ მისცა.
საწყობის გამგის, ბექა ლომიძის განმარტებით ამ წუთებში საწყობში არსებული ანტენების აღრიცხვა მიმდინარეობს.
_ პოლიციამ ოქმი მოიტანა. მასში წერია, რომ ამომრჩევლის მოსყიდვასთან დაკავშირებით საწყობი უნდა დაილუქოს. ამ წუთებში საწყობის ტერიტორიაზე არსებული ანტენების აღრიცხვა ხდება. ერთ ადგილზე დავაწყობთ და დალუქავენ, _ აღნიშნა “გურია ნიუსთან” საუბრისას ლომაძემ.
დაყადაღების პროცეს გურიის სამხარეო პოლიციის მთავარი სამმართველოს უფროსი, დავით ცირეკიძე ხელმძღვანელობს. პოლიციელები მედიასთან კომენტარს არ აკეთებენ და როგორც ყოველთვის პრესამსახურთან გვამისამართებენ.
“გლობალ ტვ”-ს გურიის საწყობში, სადაც ანტენებია დასაწყობებული, საწყობის გამგის გარდა არავინ იმყოფება. საქველმოქმედო ფონდ “ატუს” თანამშრომლები, რომელთა ოფისი “გლობალ ტვ”-ს საწყობის გვერდითაა, აღნიშნავენ, რომ ხელისუფლების ქმედებები ყოველ ზღვარს სცილდება:
_ ასე სანამდე გააგრძელებენ?! შემოვიდნენ და ალყაში მოგვაქციეს, თან ისე, რომ არაფერი აგვიხსნეს, ყაჩაღებივით მოვარდნენ. ასეთი უსამართლობა გაგონილა? ადამიანი კარგ საქმეს აკეთებდეს და ამის გამო დასაჯო? ამათი პარპაში დიდხანს არ გაგრძელდება და მალე ყველაფერი დასრულდება. ტყუილად ჰგონიათ, რომ რამეს მიაღწევენ, _ აღნიშნა ჩვენ გაზეთთან საუბრისას ფონდ “ატუს” თანამშრომელმა, თინა გუჯაბიძემ.
