„ქართული ოცნება“ თბილისში აქციის გამართვას არ გეგმავს _ ამის შესახებ საქართველოს ვიცე-პრემიერმა კახა კალაძემ "რუსთავი 2"-ის ეთერში განაცხადა, რითაც მმართველი გუნდისადმი „ნაციონალური მოძრაობის“ მოწოდებას გამოეხმაურა, რომ თბილისში აქციის გამართვის თარიღი დაასახელოს.
„ნაციონალური მოძრაობა“ თუ აპირებს, ამასთან დაკავშირებით თვითონ გააკეთოს განცხადება. „ქართულ ოცნებას“ არ გაუკეთებია არანაირი განცხადება, რომ რაიმე შეკრებას გეგმავს. მაშინ, როდესაც არჩევნებამდე დარჩენილია 13-14 დღე, ვფიქრობ, არ არის მიზანშეწონილი, ასეთი შეკრება. გუნდში არ ყოფილა ამაზე მსჯელობა“, _ განაცხადა კალაძემ.
გარდა ამისა, ვიცე-პრემიერი მეწარმეებისადმი პარლამენტის თავმჯდომარის, დავით უსუფაშვილის იმ მიმართვას გამოეხმაურა, რომლითაც პარლამენტის თავმჯდომარე მეწარმეებს სთხოვს, აღარასდროს გააკეთონ პოლიტიკური არჩევანი ”პოლიტ კორექტულობის” გადმოსახედიდან. უსუფაშვილი განცხადებაში აღნიშნავს, რომ ბიზნესმენებმა ხმა უნდა მისცენ იმ პარტიას და ლიდერს, ვინც ყველაზე უკეთ ეხმიანება არა დღევანდელ ბიზნესინტერესებს, არამედ ხვალინდელ მშობლიურ ინტერესებს.
კალაძემ „რესპუბლიკურ პარტიას“ „ნულპროცენტიანი“ უწოდა.
„0,3 პროცენტიანი პარტიის აბსურდულ განცხადებაზე, ვფიქრობ, პასუხის გაცემა არ არის მიზანშეწონილი“, _ აღნიშნა კალაძემ „რუსთავი 2“-თან საუბარში.
