„ადამიანის უფლებათა ცენტრის” დამკვირვებელს ფიზიკური შეურაცხყოფა მიაყენეს, – ამის შესახებ ”გურია ნიუსს"არასამთავრობო ორგანიზაციიდან აცნობეს.
მათი ინფორმაციით, მარნეულის 35-ე საარჩევნო ოლქში, სოფელ ქეშალოს 37-ე უბანზე ამომრჩეველს კონვერტის გარეთ გატანა სურდა, რის შესახებაც “ადამიანის უფლებათა ცენტრის” დამკვირვებელმა შენიშვნა მისცა კომისიის თავმჯდომარეს. საპასუხოდ, კომისიის თავმჯდომარემ და მისმა მოადგილეს დამკვირვებელს უყვირეს და ფიზიკური შეურაცხყოფა მიაყენეს.
როგორც ორგანიზაციაში აცხადებენ, უბანზე მომხდარი ინციდენტი გადაიღო საერთო სამოქალაქო მოძრაობა „მრავალეროვანი საქართველოს“ დამკვირვებელმა, სადაც ჩანს, თუ როგორ უყვირის კომისიის თავმჯდომარის მოადგილე, სამედ გაჯიევი რუსულ ენაზე “ადამიანის უფლებათა ცენტრის” დამკვირვებელს და უხეშად ხელითაც ეხება, ფიზიკური შეურაცხყოფა ვიდეოს გადაღების შემდეგაც გაგრძელდა, რასაც ადასტურებენ მოწმეები.
”შემთხვევის შესახებ ”ადამიანის უფლებათა ცენტრის” იურიდიული სამსახურის უფროსმა თამარ ავალიანმა პოლიციას შეატყობინა და ცოტა ხანში თვითონაც მივიდა ქეშალოს 37-ე უბანზე. მისი ინფორმაციით, ”ადამიანის უფლებათა ცენტრის” დამკვირვებელს აღენიშნება დაზიანებები. მას ასევე დაუხიეს ჩანაწერების რვეული. პოლიციამ დამკვირვებელი და მოწმეები პოლიციაში გადაიყვანა, სადაც დაიკითხნენ შემთხვევასთან დაკავშირებით.
”ადამიანის უფლებათა ცენტრმა” მომხდარის შესახებ ინფორმაცია ცესკოსაც მიაწოდა.
პოლიციამ სისხლის სამართლის საქმე აღძრა სსკ-ის 162-ე პრიმა მუხლის I ნაწილით (არჩევნებში, რეფერენდუმში ან პლებისციტში ნების განხორციელებისათვის ხელის შეშლა), რაზეც მაქსიმალური სასჯელის სახით შესაძლებელია 2 წლამდე თავისუფლების აღკვეთა”, – ნათქვამია ორგანიზაციის განცხადებაში.
