“წავალ თბილისში, პრეზიდენტთან, სანდრასთან, ვინმე როგორ არ მომაქცევს ყურადღებას?!”

ქალბატონ გულნარას სახლი დაეწვა და დახმარებისთვის ხელისუფლებას მიმართა, თუმცა, ადმინისტრაციულ შენობაში არ შეუშვეს. როგორც თვითონ, ამბობს, ისე უჭირს, რომ შევა გამგეობაში და მესამე სართულიდან გადმოხტება.

ადგილობრივ ხელისუფლებას პარლამენტის თავმჯდომარე დავით ბაქრაძემაც გამოუგზავნა წერილი, სადაც მოუწოდებდა ჩინოვნიკებს, დახმარებოდნენ გულნარა სიორიძეს, თუმცა, მას ჯერჯერობით, არა თუ არავინ დახმარებია, არც შეხმიანებია.

პრეზიდენტის ოზურგეთში სტუმრობის დროს, ქალბატონი გულნარა ცდილობდა, სააკაშვილისთვის საკუთარი გაჭირვების შესახებ მოეთხრო, თუმცა, როგორც თავად ამბობს, გუბერნატორმა უთხრა, ოღონდ ახლა გაჩერდი და მე პირადად დაგეხმარებიო: _ მერე რომ ვნახე, მითხრა, რასაც შენ ითხოვ, იმის საშუალება არ მაქვსო. თუმცა, ერთხელ კი გადამიხადა 2 000 ლარი ჩიტაიშვილმა, ცოდვას ვერ ვიტყვი, ღმერთი არ მაპატიებს. ახლა კი ასე ამომხდება სადღაც სული ან თავს მოვიკლავ, _ ამბობს გულნარა სიორიძე.

იგი რამდენიმე დღის წინ "გურია ნიუსის" ოფისში მოვიდა, გვთხოვა, მასთან ჩავსულიყავით ნატანებში და გვენახა მისი საცხოვრებელი. ჩვენც ვესტუმრეთ და იქ ნანახმა გაჭირვებამ ყოველგვარ ზღვარს გადააჭარბა.

აღსანიშნავია, რომ ქალბატონი გვთხოვდა დაგვეფიქსირებინა, ასე მეუბნებიან, ჟურნალისტებთან რომ გაქვს საქმე, მთლად არ გადაგეკიდონ და აღარც დაგეხმარებიანო: _ რამაზ ნიკოლაიშვილი, როცა გუბერნატორი იყო, დამპირდა დახმარებას, მაგრამ ისე წავიდა, არ დამხმარებია. წავალ თბილისში, პრეზიდენტთან, სანდრასთან _ ვინმე როგორ არ მომაქცევს ყურადღებას? _ იმედი აქვს გულნარა სიორიძეს.