საპარლამენტო უმრავლესობა უახლოეს მომავალში საკონსტიტუციო ცვლილებებზე მსჯელობის დაწყებას გეგმავს, რის მიხედვითაც, ქვეყანაში საპრეზიდენტო არჩევნები შესაძლოა აღარ ჩატარდეს და ახალი პრეზიდენტი პარლამენტმა აირჩიოს.
„გურია ნიუსმა“ სცადა გაერკვია თუ როგორ აფასებს მოსახლეობა „ქართული ოცნების“ წევრების მოსაზრებას – ვინ უნდა აირჩიოს ქვეყნის პირველი პირი 5 წლის ვადით, ხალხმა თუ პარლამენტმა, რის გასარკვევადაც თბილისში შემთხვევითი შერჩევით მოქალაქეები გამოიკითხა.
ნანა კულუას თქმით, პრეზიდენტი ხალხმა უნდა აირჩიოს.
„პრეზიდენტი, რა თქმა უნდა, ხალხმა უნდა აირჩიოს იმიტომ, რომ ხალხი არის მთავარი და ძალიან მნიშვნელოვანი. ხალხი რომ არ იყოს, სახელმწიფოც არ იარსებებდა,“_თქვა კულუამ.
მოქალაქე ეკა მასურაშვილს კი მიაჩნია, რომ პრეზიდენტი პარლამენტის ასარჩევია.
„პრეზიდენტი უნდა აირჩიოს პარლამენტმა, რადგან ხალხს საუკეთესო არჩევანის გაკეთების უნარი არ აქვს,“_ ამბობს მასურაშვილი.
მსგავსი მოსაზრება აქვს კიდევ ერთ მოქალაქეს, რამაზ მეტრეველს.
„ქვეყნის მეთაური უნდა აირჩიოს პარლამენტმა, რამდენადაც საპარლამენტო მმართველობის ქვეყანა ვართ,“_ამბობს მეტრეველი.
მარიამ სირაძე კი მიიჩნევს, რომ პრეზიდენტი უნდა აირჩიოს ხალხმა და არა პარლამენტმა.
„პრეზიდენტი უნდა აირჩიოს ხალხმა და არა პარლამენტმა, მით უმეტეს ამ შემადგენლობის პარლამენტმა, რაც დღეს გვყავს,“_ თქვა სირაძემ.
„გურია ნიუსთან“ საუბრისას მსგავსი მოსაზრება კიდევ ერთმა მოქალაქემ, დააფიქსირა:
„ყველას თავისი შეხედულება აქვს, მაგრამ პრეზიდენტი, მით უმეტეს ახალი პარლამენტიდან გამომდინარე, ხალხმა უნდა აირჩიოს.
პრეზიდენტს არა აქვს ფართო უფლებები, ამიტომ უკეთესი იქნება შედარებით პატარა სასახლე ჰქონდეს. ასევე პარლამენტი ისევ თბილისში იყოს, რაც გამოიწვევდა ხარჯების შემცირებას და ქვეყნისთვის უკეთესი იქნებოდა“.
ირინა დევაძის თქმით, პრეზიდენტი ხალხს ემსახურება და შესაბამისად ხალხმა უნდა აირჩიოს.
„ორი აზრი არ არსებობს, რომ პრეზიდენტი და არამარტო პრეზიდენტი, არამედ ნებისმიერი მთავრობა, ხალხმა უნდა აირჩიოს, რადგან ის ხალხს ემსახურება,“_ამბობს დევაძე.
როგორც „გურია ნიუსთან“ საუბრისას ლამარა სახიაშვილმა აღნიშნა პრეზიდენტი ხალხმა უნდა აირჩიოს, ხოლო მთავრობის მოვალეობა ხალხზე ზრუნვაა.
„პრეზიდენტი უნდა აირჩიოს ხალხმა და არა პარლამენტმა. პარლამენტარების, ისევე როგორც მთავრობის სხვა წევრების და თავად პრეზიდენტის მოვალეობაც ხალხზე ზრუნვაა, მაგრამ საერთოდ არ ფიქრობენ პენსიონერებზე, არ ფიქრობენ პენსიების ზრდაზე, პირიქით, რა პენსიაც პენსიონერებს გვაქვს ჩვენი მასხრად აგდებაა. დღეს 300 ლარსაც კი არ აქვს ძალა და 180 ლარით როგორ უნდა ვიცხოვროთ მოხუცმა ხალხმა, წამლები ვიყიდოთ თუ საკვები. უსამართლობაა, რაც ქვეყანაში ხდება, პენსიონერებს წინასწარ ნუ დაგვხოცავენ,“_ ამბობს სახიაშვილი.
ქვეყანაში არსებულ მწვავე სოციალურ ვითარებაზე საუბრობს ასევე თბილისის კიდევ ერთი მაცხოვრებელი ნინო იოსელიანი და დასძენს, რომ ქვეყანაში შექმნილ მდგომარეობაში ხალხია დამნაშავე.
„ პრეზიდენტი უნდა აირჩიოს ხალხმა, მაგრამ რაც დღეს ქვეყანაში ხდება ამაში ხალხია დამნაშავე. ახალგაზრდებს მუშაობა არ სურს, შვილებს გააჩენენ და მათი ოჯახები მთავრობამ უნდა არჩინოს, სოფლებიც დაიცალა და ყველას დედაქალაქში ცხოვრება სურს, რაც დაუშვებელი და შეუძლებელია,“_ამბობს იოსელიანი.
ნიკა ჟღენტი კი მიიჩნევს, რომ ქვეყანაში გადაწყვეტილებებს ხალხის აზრის გაუთვალისწინებლად იღებენ.
„პრეზიდენტის არჩევა ხალხის გადაწყვეტილებით უნდა მოხდეს და არა პარლამენტის, მაგრამ გადაწყვეტილებებს მაინც ისე იღებენ, თითქოს ხალხი ქვეყანაში არაფერს წარმოადგენდეს,“_ამბობს ჟღენტი.
შეგახსენებთ, რომ პრეზიდენტის არჩევის წესის შესაძლო ცვლილებასთან დაკავშირებით განცხადება დღეს „ქართული ოცნების“ წევრმა, გია ვოლსკმა გააკეთა.
პარტიაში ასევე ამბობენ, რომ არის გარკვეული აცდენა მოქმედი კონსტიტუციით არჩეულ პრეზიდენტის ლეგიტიმაციასა და პრეზიდენტის უფლებებს შორის და ეს საკითხი გამოსასწორებელია.
ამავე თემაზე:
„მიჯირყვნის მცდელობა“ თუ ნონსენსის გამოსწორება – პრეზიდენტი შესაძლოა ხალხმა აღარ აირჩიოს
