როგორც მათ “გურია ნიუსთან” საუბარში აღნიშნეს, ახალგარემონტებული ბინის სახურავიდან წყალი ჟონავს, აივნები ძალიან მძიმე მდგომარეობაშია და ვერ გაუძლებს იმ დაშენებას, რასაც აკეთებენ: _ ჩვენ კი გაგვიხარდა, როცა დაიწყეს ეს მშენებლობა, მაგრამ ასე თუ გაგრძელდა და ამ ფორმით, ეს ბინები მალე დაინგრევა, _ აცხადებენ ისინი.
შეგახსენებთ, რომ ამ ბინის შესახებ “გურია ნიუსი” უკვე წერდა. სტატიაში “სახლს, რომელსაც ხელისუფლებამ დაშენება გაუკეთა, სახურავი ჩამოენგრა”, ბინის მე-5 სართულზე მცხოვრები მაია ლომიძე ამბობდა, რომ დაშენების დროს სახურავი ჩამოინგრა და ბინა საცხოვრებლად უვარგისი გახდა.
ინგა ვასაძე: _ ეს ბინა ვერ გაუძლებს ამხელა მშენებლობას და აივნებზე დაშენებას. იცით, ერთ-ერთ ოჯახში როგორ ჩამოინგრა ჭერი და ძლივს გადარჩნენ, თანაც დიდი ზარალი ნახეს. განცხადებით მივმართეთ ოზურგეთის მუნიციპალიტეტის გამგეობას. ამ ბინებში სულ 34 ოჯახი ცხოვრობს, ახლა ზოგი ადგილზე არაა და განცხადებას ხელს 24 ოჯახი აწერს. სულ ჩაიშალა აივანი. ჩემმა მეუღლემ თვითონ დაასხა ცემენტი, დროებით. არ ვიცი, რა გვეშველება!
მარკრიტ სარუხანიანი: – ვცხოვრობ მეოთხე სართულზე. სახლში მიცვალებული მესვენა და წყალი პირდაპირ ოთახში მოდიოდა. ეს რა უბედურებაა! უფრო უარესად გააკეთეს, მალე თავზე დაგვენგრევა სახლი. 50 წელია ამ ბინებში ვცხოვრობ და არ გვახსოვს, წყალი ჩამოსულიყოს. ესაა გაკეთებული? ერთი კვირა არცაა, რაც მეუღლე დავკრძალე. იმ ოთახში სადაც მიცვალებული ესვენა, ჭირისუფალს თავზე წვიმის წყალი შადრევანივით ესხმებოდა. რატომ ანგრევენ ამ ბინებს და აივნებს?
_ ოთახებში სულ დაბზარულია კედლები, ჯერ გვიხაროდა, სახურავს გამოგვიცლიანო, მაგრამ ასე თუ გაკეთდებაა და წყალი ჩამოგვივა, სულ არ გვინდა. მოგვაქციონ ყურადღება, ისე გააკეთონ, როგორც საჭიროა _ გულით და ხარისხიანად, _ აცხადებენ “გურია ნიუსთან” რუსთაველის ქუჩის მცხოვრებლები.
