ქვეყნის მართვა იმ გუნდს ვანდეთ, რომელსაც მართვის მოწმობა არ ჰქონდა, _ განაცხადა "რესპუბლიკური პარტიის" ერთ-ერთმა ლიდერმა ლევან ბერძენიშვილმა ”პალიტრანიუსის” გადაცემა ”ჩემი კითხვის” ეთერში.
მაყურებლის კითხვაზე _ როგორ ფიქრობთ, ბიძინა ივანიშვილს რომ არ ეაქტიურა საეთერო სივრცით ლევან გოგიჩაიშვილი, გიორგი ვოლსკი, გიორგი კახიანი, ეკა ბესელია და მანანა კობახიძე არ ეყოფოდათ ”რესპუბლიკურ პარტიას” საპირწონედ და დასამარცხებლად?
ლევან ბერძენიშვილის თქმით, ბიძინა ივანიშვილმა დაამარცხა არა მარტო რესპუბლიკელები, არამედ ყველა პარტია, გარდა სახელისუფლებო პარტიებისა.
”ჩვენ ბიძინა ივანიშვილმა დაგვამარცხა და ჩვენ კი არ დაგვამარცხა, არამედ საქართველოში, ყველა პოლიტიკური პარტია დაამარცხა. წაგებულებში მარტო ”რესპუბლიკური პარტია” არ არის, აქ წააგო ყველა პარტიამ, რომელიც მონაწილეობდა, გარდა სახელისუფლებო პარტიებისა და სახელისუფლებო პარტიების წარმატება უზრუნველყვეს მათმა პირდაპირმა ლიდერებმა. კვაჭანტირაძეს არ მოუგია ჩვენთვის და იმ ხალხს, თუ იმას გულისხმობთ, რომ უსუფაშვილი მართლა ლევან გოგიჩაიშვილმა დაამარცხა, ეგ არ არის გულწრფელი ლაპარაკი. უსუფაშვილი დაამარცხა იმ გოგიჩაიშვილმა, რომლის უკან იგულისხმება ბიძინა ივანიშვილი. ის ხალხი, ვინც თქვენ დაასახელეთ, ცალსახად აღიარებული დიდი პოლიტიკოსები არ არიან. ამ ჩამონათვალში რაღაც ისე ვერ ვიგრძნი თავი, ვიღაც გიგანტებს მისახელებენ და ჩვენ ჭიანჭველები ვართ ახლა.უსუფაშვილი ნებისმიერ დებატებს მოუგებს ყველას, გნებავთ ცალ-ცალკე, გნებავთ ერთად. აქ ამაში არ ყოფილა საქმე, რომ ეკა ბესელია ინტელექტით აღემატება კორძაიას. ამაზე საუბარი არ ყოფილა, ლაპარაკია იმაზე, რომ ეკა ბესელიას გულშემატკვრობს ბიძინა ივანიშვილი და ქართველი მოსახლეობის დიდი ნაწილი.”, _ განაცხადა ლევან ბერძენიშვილმა.
ბერძენიშვილის თქმით, ადვილია იმ პარტიაში ყოფნა, სადაც ხალხი იმარჯვებს და არჩევნებში ”რესპუბლიკური პარტიის” დამარცხება განაპირობა არა პერსონალურმა უპირატესობამ, არამედ პარტიულმა კუთვნილებამ.
”დიახ, იმ პარტიაში ყოფნა ადვილია, სადაც ხალხი იმარჯვებს. თქვენ მიერ ჩამოთვლილ ხალხს ბევრ საკითხზე პოზიციაც კი არ გააჩნდა, ეს ის ადამიანები არიან, ვისაც ძლივს მივაღებინეთ ანტიდისკრიმინაციული კანონი. აქ ლაპარაკი არ არის იმაზე, რომ ეს ძალიან ძლიერი გუნდია. ეს ძალიან სუსტი გუნდია. გარდა ამისა, თქვენ დაასახელეთ ხალხი, ვისაც იცნობთ და მათ გარდა 120 ადამიანია პარლამენტში შეყვანილი, რომელთაც არ იცნობთ. არც თქვენ იცნობთ, არც მე ვიცნობ და დიდი ეჭვი მაქვს, არც კვირიკაშვილი იცნობს. ვანდეთ ქვეყნის მართვა იმ გუნდს, რომელსაც მართვის მოწმობა არ შევუმოწმეთ”, – აღნიშნა ლევან ბერძენიშვილმა.
