"თბილისობა 2016" წელს 15-16 ოქტომბერს აღინიშნება, რის გამოც, დედაქალაქის სხვადასხვა უბნებში კულტურული და სპორტული, ასევე საბავშვო ღონისძიებები მთელი დღის განმავლობაში ტარდებოდა და ხვალაც გაგრძელდება.
დედაქალაქში რამდენიმე ადგილზე, დამონტაჟებული სპეციალური სავაჭრო ობიექტებში, სხვადასხვა რეგიონიდან ჩამოსული გლეხები სოფლის ნობათს ყიდიან და თბილისელებს თუ სტუმრებს შემოდგომის ნობათით უმასპინძლდებიან.
ერთ-ერთი მსგავსი სავაჭრო პუნქტი წელს ფილარმონიასთან, ვერის ბაღის წინ იყო განთავსებული.
მოვაჭრე გიორგი ლომიძე, "გურია ნიუსთან" საუბარში აღნიშნავს, რომ მიუხედავად იმისა, პროდუქტებზე ფასები არ შეცვლილა დედაქალის მოსახლეობას სოფლის ნობათის შეძენა მაინც უჭირს.
"თბილისობისთვის" გამართულ ვაჭრობაში უკვე 15 წელია ვმონაწილეობ და თაფლს ვყიდი; ვისურვებდი, რომ მოსახლეობას ყიდვის უნარი ჰქონდეს. ვაკვირდები, რომ თბილისის მოსახლეობას სურს, სოფლის ნობათის შეძენა, მაგრამ უმეტესობას ამის საშუალება არ აქვს. მიუხედავად იმისა, რომ ფასებში სხვაობა არ არის,"_ამბობს ლომიძე.
ფესტივალის ფარგლებში სხვადასხვა სახის საბავშვო გასართობი ღონისძიება ჩატარდა რიყის პარკში, გარდა ამისა, პარკში განთავსდა რაგბის, მინი გოლფის, კალათბურთისა და ფეინთბოლის მოედნები, ასევე მოეწყო კულინარიის ქუჩა, სადაც გურმანებს ქართული და უცხოური სამზარეულოს დაგემოვნება ხვალაც შეუძლიათ.
გარდა სპორტული და საბავშვო ღონისძიებებისა, რიყის პარკის ამფითეატრში წარმოდგენა გამართა კლოუნების თეატრმა "სალუტმა".
როგორც "გურია ნიუსთან" საუბარში კლოუნების თეატრის დამაარსებელმა, გიორგი გომურაშვილმა აღნიშნა, დასი ფესტივალზე საზღვარგარეთიდან თბილისის მერიამ მოიწვია და მათ საქართველოში საკუთარი თეატრალური დარბაზი არ აქვთ.
„კლოუნების თეატრ "სალუტს", რომელსაც ადრე "სხვენი" ერქვა, სახელი უცხოელებმა შეარქვეს, რადგან სხვენს ვერ ამბობდნენ. ეს დასი დაახლოებით 12 წელია არსებობს. შედგება როგორც მოყვარული, ისე პროფესიონალი მსახიობებისგან. "თბილისობაზე" წელს მეორედ მივიღეთ მონაწილეობა და წარმოვადგინეთ მხიარული ნოველები, რაც საზღვარგარეთ დიდი პოპულარობით სარგებლობს და სხვადასხვა ქვეყნებიდან ბევრი მიწვევა გვაქვს. საქართველოში მეხუთედ ვითამაშეთ, აქ საკუთარი დარბაზი არ გვაქვს, დაქირავება ძვირი ჯდება, ამიტომ მოწვევებით ვდგამთ სპექტაკლებს,"_ ამბობს გომურაშვილი.
რიყის პარკში სხვადასხვა გასართობ ღონისძიებების გარდა, საქველმოქმედო აქციაც გაიმართა.
ის საერთაშორისო საქველმოქმედო ორგანიზაცია "ხსნის არმიამ" მოაწყო, საიდანაც შესული შემოწირულობა სოციალურად დაუცველ ადამიანებს, მრავალშვილიან ოჯახებს და მარტოხელებს გადაეცემათ.
"საერთაშორისო საქველმოქმედო ორგანიზაცია "ხსნის არმია" ვმართავთ საქველმოქმედო აქციას, საიდანაც შემოსული თანხით დავეხმარებით სოციალურად დაუცველებს, მრავალშვილიანებს, მარტოხელებს. ჩვენი საქმიანობით გვსურს ხალხს გავუზიაროთ უფლის სიყვარული. ბუშტებისგან ვაკეთებთ სხვადასხვა ფიგურებს და პატარებს ვჩუქნით, წარმოდგენილი გვაქვს სტენდი სადაც ასახულია ჩვენი საქმიანობა და დახმარების მსურველები, სურვილის და შესაძლებლობის მიხედვით თანხას შემოწირულობის სახით სპეციალურ ყუთში აგდებენ,"_ ამბობს ორგანიზაციის თბილისის ცენტრალური ოფისის ოფიცერი, თენგიზ თურგი.
რიყის პარკის გარდა ფესტივალის ფარგლებში ერთ-ერთი გასართობი კონცერტი ისნის რაიონის გამგეობამ მეტრო ავლაბართანაც გამართა.
როგორც "გურია ნიუსთან" საუბარში ისნის რაიონის კულტურის, განათლების და სპორტის განყოფილების უფროსმა, ელენე დადიანმა აღნიშნა, ისნის რაიონის გამგეობამ რაიონში მაცხოვრებელი ბავშვებისთვის პატარა ზეიმის მოწყობა სცადა.
"ისნის რაიონის გამგეობის ორგანიზებით, ტარდება საბავშვო გასართობი ღონისძიებები, რაშიც მონაწილეობას საბავშვო ანსამბლები, მოზარდმაყურებელთა თეატრის მსახიობები, ანიმატორები, ილუზიონისტები იღებენ. გარდა ამისა, პატარებს დავურიგეთ სხვადასხვა სახის ტკბილეული და ბუშტები. ბავშვებისთვის ასევე იმართება სხვადასხვა თამაშები და ვცდილობთ პატარა ზეიმი მოვუწყოთ რაიონის მაცხოვრებელ ბავშვებს,"_ამბობს დადიანი.
როგორც ცნობილია, "თბილისობა 2016"-ს დედაქალაქი ხვალ 16 ოქტომბერსაც უმასპინძლებს.
