2011 წელს შევსებული დეკლარაციის თანახმად, გია გოგუაძის მეუღლე, მარინა მშვიდობაძე ლანჩხუთის სასამართლოში, მოსამართლის თანაშემწედ მუშაობდა და 2011 წელს მისმა წლიურმა შემოსავალმა 5 880 ლარი შეადგინა; გამგებლის რძალი, თამარ როყვა 2011 წელს ლანჩხუთის მუნიციპალიტეტის კულტურის ცენტრის მთავარი სპეციალისტი იყო და მისმა წლიურმა შემოსავალი 2 600 ლარი იყო; გამგებლის შვილი, დავით გოგუაძე 2011 წელს საქართველოს გაერთიანებული წყალმომარაგების კომპანიის ლანჩხუთის სერვისცენტრის ბილინგის მენეჯერად დაინიშნა და დღემდე ამ თანამდებობაზე მუშაობს.
2012 წელს შევსებული დეკლარაციის თანახმად ირკვევა, რომ გამგებლის ოჯახის წევრებმა სამსახური გამოიცვალეს _ მეუღლე მარინა მშვიდობაძე სასულიერო გიმნაზიის იურისტად დაინიშნა და მისმა წლიურმა შემოსავალმა 1 250 ლარი შეადგინა, რძალი _ თამარ როყვა კი “ტაო პროვატ ბანკის” ლანჩხუთის ფილიალის ოპერატორად გადავიდა და წლის განმავლობაში ხელფასის სახით 12 000 ლარი მიიღო.
აღსანიშნავია, რომ გია გოგუაძე 2011 წელს ხელფასს “საქართველოს ბანკში” იღებდა. 2012 წელს, რძლის “ტაო პრივატ ბანკში” დასაქმების შემდგომ, გამგებლის სახელფასო ანგარიში ამავე ბანკში გადავიდა.
თავად გამგებელის წლიურმა შემოსავალმა 2011 წელს 33 040 ლარი შეადგინა, მიმდინარე წელის დეკლარაციის თანახმად კი _ 33 100 ლარი.
2011 წელს, გია გოგუაძეს 4 სესხი ჰქონდა _ 44 200 დოლარი, 3 00 და 4 000 ლარი “საქართველოს ბანკში” და 4 000 ლარი _ “ტაო პრივატ ბანკში”.
2012 წელს შევსებულ დეკლარაციაში ლანჩხუთის გამგებლის სესხი არ ჩანს და სპეციალური გრაფა ცარიელია, რაც იმის მანიშნებელია, რომ მას სესხი აღარ აქვს.
გია გოგუაძე, “გურია ნიუსთან” საუბრისას ამბობს, რომ დეკლარაციაში “ალბათ, შეცდომაა”:
_ 4 სესხი მაქვს და არც ერთი არ დამიფარავს. ცარიელი როგორ იქნება?!
_ შეგიძლიათ, თავად ნახოთ ვებგვერდზე და დარწმუნდებით…
_ ალბათ, შეცდომაა.
_ დეკლარაციის შეცდომით შევსება ხომ კანონი ისჯება?
_ ალბათ, მეც დავისჯები, _ გვითხრა გოგუაძემ.
რაც შეეხება უშუალოდ ქონებას, ლანჩხუთის მუნიციპალიტეტის გამგებელი სოფელ აკეთში საცხოვრებელ სახლს და მიწის ნაკვეთს ფლობს; მას პირად მფლობელობაში აქვს ლანჩხუთში, თავისუფლების ქუჩა #56-ში მდებარე სახლი; ამავე მისამართზე დარეგისტრირებული 5 500 კვადრატული მეტრი მიწა გამგებლის დედის სახელზეა; გოგუაძე 300 კვადრატულ მეტრ მიწის ფართობს გრიგოლეთში ფლობს; გამგებლის ვაჟი, დავით გოგუაძე კი თბილისში, ვაშლიჯვრის უბანში მდებარე 80 კვადრატული ფართის ბინის მესაკუთრეა.
2012 წლის დეკლარაციის შევსების დროს, გია გოგუაძეს “ტაო პრივატ ბანკის” სახელფასო ანგარიშზე 1 300 ლარი ჰქონდა; “საქართველოს ბანკის” საანაბრე ანგარიშზე _ 110 ლარი; ამდენივე რაოდენობის ანაბარი აქვს “საქართველოს ბანკში” გამგებლის შვილიშვილს _ მარიამ გოგუაძეს.
