გურიაში, ოზურგეთის მუნიციპალიტეტის დაბა ნასაკირალში, ხელისუფლებამ არჩევნები უკვე მეორედ წააგო. რატომ უთხრა მოსახლეობამ უარი "ქართულ ოცნებას", რა მოხდა ნასაკირალში არჩევნების დღეს, რატომ იყო ხელისუფლების თითქმის ყველა წარმომადგენელი საარჩევნო უბნის ტერიტორიაზე მობილიზებული მაშინ, როცა, უკვე დარწმუნებულნი იყვნენ, რომ "ქართული ოცნება" აუცილებლად გაიმარჯვებდა?
ხელისუფლების წარმომადგენლები აცხადებენ, რომ დაბა ნასაკირალში მაქსიმუმი გაკეთდა _ ყველა ნასაკირალელს, რომელმაც დახმარებისთვის მუნიციპალიტეტს მიმართა, გაეწია სათანადო დახმარება.
ნასაკირალში კი ამბობენ, რომ პრინციპის გამო "ქართულ ოცნებას" ჯიბრში ჩაუდგნენ, რაშიც მათ სოფელში, არც თუ ისე დიდი ხნის წინ, სოფლის დეპუტატისა და რწმუნებულის დაჭერის ფაქტს გულისხმობენ. ამბობენ, რომ ასე გადაწყვიტა ახალგაზრდობამ და ეს არჩევანიც მათი გადაწყვეტილებაა.
"გურია ნიუსი" კიდევ ერთხელ დაინტერესდა დაბა ნასაკირალის მოსახლეობის პრობლემებით:
"მოვითხოვთ ადგილობრივი ხელისუფლების მხარდაჭერას და შუამდგომლობას _ დაინახონ სიმართლე და ჩვენც, სამაგიეროდ, არჩევნებზე დავუდგებით მხარში. წინააღმდეგ შემთხვევაში, დაბა ნასაკირალში და მთელ იმ სოფლებში, სადაც აჭარული მოსახლეობა ცხოვრობს, დღევანდელი ხელისუფლება არჩევნებზე ერთ ხმასაც ვერ მიიღებს! იმედი გვაქვს, გონივრულად მოიქცევიან", _ ასე ეხმაურებოდა ნასაკირალის მოსახლეობა სოფლის დეპუტატის შოთა ართმელაძისა და რწმუნებულის ტარიელ ანთაძის დაკავების ფაქტს.
78 წლის მევლუდ ადაძე ამბობს, რომ "ახალგაზრდები დარწმუნებულები იყვნენ გამარჯვებაში": "ახალგაზრდობამ გადაწყვიტა, ხმა არ მიეცათ "ქართული ოცნებისთვის". ისინი ფიქრობენ, რომ სწორი გადაწყვეტილება მიიღეს. ახლაც ასე მიაჩნიათ.
ყველაზე მთავარი პრობლემაა ისაა, რომ, რასაც დაგვპირდნენ, არ შეგვისრულეს. ჩვენ რომ აქ ჩამოგვასახლეს, მიწებზე პრობლემები იყო, თუმცა, არც ერთ ხელისუფლებას ამბავი არ უკითხავს და არ დაგვხმარებია. აქ სულ ტყეები და ეკალბარდები იყო, ვეპატრონეთ, გავწმინდეთ, გავაშენეთ და ბაღებად ვაქციეთ, თუმცა, ეს მიწები არ დაგვირეგისტრირეს. მერე ტერიტორიის გაყიდვა დაიწყეს და ჩვენ არაფერი გვკითხეს _ ისეთმა ვინმემ იყიდა, რომელიც ნასაკირალში ნამყოფიც არ იყო და მას ათობით ჰექტარი მიწა მისცეს. მოვიდა ის და შემოგვთავაზა, ამ მიწებს მოგყიდითო, თან დიდ თანხას ითხოვდა. ეს არ არის ადამიანის უფლებათა დარღვევა?" _ამბობს ადაძე და ხაზს უსვამს შოთა ართმელაძის დაკავების ფაქტს:
"დაგვიჭირეს დეპუტატი. აქ არ არსებობს ისეთი ადამიანი, რომელიც შოთას პატივს არ სცემდა. ვთხოვეთ, ვემუდარეთ ხელისუფლებას, გამოუშვით ეს კაცი, თქვენ დაუგეთ მახე შოთას და თქვენ ჩააგდეთ ციხეში, ვეუბნებოდით. შოთა ართმელაძე რომ გამოეშვათ, არჩევნებს არ წააგებდნენ და "ნაციონალებს" აღარ დაუჭერდა სოფელი ხმას. პრინციპის საკითხია _ ვერ გამოვუშვებთ ართმელაძესო, გვითხრეს. მაშინ რატომ არ დაიჭირეთ ქრთამის მიმცემი და ის რატომ არ ჩანს?! ვკითხეთ. ესე იგი, მთავრობამ მოუწყო ეს შოთა ართმელაძეს, რომელსაც დიდი ავტორიტეტი ჰქონდა, სოფლისთვის ბევრს აკეთებდა. არ დაიჯერეს და წააგო "ოცნებამ"!
ყველა ქრისტიანი ჩემი დაა, ჩემი ძმაა, არ უნდა ჩამოვარდეს ქრისტიანსა და მუსლიმს შორის შუღლი. ჩვენ ყველა გვიყვარს. ნასაკირალში კარგის მეტი არაფერი გვიკეთებია _ ჩამოვედით და თავდაუზოგავად ვშრომობთ. თურქეთის მონებად გადაიქცა მთელი ახალგაზრდობა. მათი 98 პროცენტი თურქეთში მუშაობის გამო დაავადებულია, ეს "ნაციონალების" დროსაც ხდებოდა _ განა მათ დაგვაყარეს რაიმე ხეირი? მეტსაც გეტყვით, თუკი აქედან ვინმე ჩავიდა მუნიციპალიტეტის გამგეობაში დახმარების სათხოვნელად, ყველას დაეხმარნენ, მაგრამ ძირითადი მიზეზი, რის გამოც ნასაკირალის მოსახლეობამ ხელისუფლებას უარი უთხრა, არის მიწების და შოთა ართმელაძის ამბავი. არ იყო შოთა ამის ღირსი _ ამან გამოიწვია ხალხის განაწყენება. ასევე, საარჩევნო შტაბში არ ჰყავდათ სანდო ხალხი. მე თვითონ ჩავედი ოზურგეთში რამდენჯერმე და ვუთხარი "ოცნების" იქაურ შტაბს, გღალატობენ,-მეთქი, მაგრამ არ დამიჯერეს. ბევრმა აიღო ხელფასი, ხმა კი "ნაციონალებს" მისცა", _ ამბობს ადაძე.
ტარიელ ფუტკარაძე: "ვფიქრობ, წაგება იმის ბრალია, რომ დეპუტატი აქაური იყო და იმან გადაიბირა ხალხი. ამბობდა, მე გუბერნატორი ვიქნებიო, მის მეგობარზე კი ამბობდა _ ეს გამგებელი იქნება, მეორე _ პოლიციის უფროსიო და დაიჯერა ხალხმა. ყველა ერთი ჭკუის ხომ არაა? ხელისუფლება როგორ არ მუშაობდა _ რაც ახლა გაკეთდა, იმდენი არასდროს გაკეთებულა."
ხატიჯე მახარაძე: "შვილი ავღანეთში მომიკვდა. განცხადება დავწერე დახმარების თხოვნით და არ დამეხმარნენ. არავის არ მივცემ ხმას!"
მაყვალა გორგაძე: "მე მომწონს "ოცნება". ბიზნესი მაქვს, მშვიდად და კარგად ვარ, მაგრამ ახალგაზრდობამ გადაწყვიტა ასე და რა ვქნათ?!"
ომარ მგელაძე: "თვალი ხარბია _ დღეს ერთი რამ გინდა, ხვალ _ ორი, ზეგ მანქანა გინდა და მერე თვითმფრინავი და სიკვდილს არავინ ელის. ნამეტანი პატივისცემა არ შეიძლება. დაპირება ბევრი იყო _ ახლაც და მაშინაც, მაგრამ არ აასრულეს _ არც ამ მთავრობამ და არც წინამ".
ოზურგეთის მუნიციპალიტეტის გამგებლის წარმომადგენელი დაბა ნასაკირალში დავით ტუნაძე "გურია ნიუსთან" ამბობს, რომ ხელისუფლება ბოლო წუთამდე დარწმუნებული იყო, რომ "ქართული ოცნება" გაიმარჯვებდა, მაგრამ მოსახლეობამ მათ უარი უთხრა:
"მოსახლეობის არჩევანი ეგ იყო. აქ ყველაფერი კეთდება, ხალხის აზრს ვერ შევცვლით, გვქონდა მოლოდინი, რომ გავიმარჯვებდით, მაგრამ დავმარცხდით.
რადგან ამბობს მოსახლეობის უმეტესი ნაწილი, რომ აქ შოთა ართმელაძის დაკავების ფაქტორია და იმიტომ არ დაუჭირეს მხარი "ქართულ ოცნებას", ალბათ, ასეა," _ამბობს დავით ტუნაძე.
