ნინო სარიშვილი ოზურგეთის მუნიციპალიტეტის სოფელ მთისპირის საჯარო სკოლის მერვე კლასის მოსწავლეა. ახლახან ის გადაცემა „ეტალონის“ შესარჩეევი ტურის გამარჯვებული გახდა და გაზაფხულზე, ფინალში ოზურგეთს წარადგენს. სწავლაზე განსაკუთრებულად ორიენტირებული გოგონა, როგორც თვითონ ამბობს, ბუნებით მუდამ სიახლის და გამარჯვების მაძიებელია და ამჯერად მოლოდინმა გაუმართლა.
_ „ეტალონში“ მონაწილეობა იმ წუთშივე გადავწყვიტე, როცა ჩემმა საყვარელმა ქართული ენისა და ლიტერატურის მასწავლებელმა მარინე ძავაშვილმა კლასში ტესტები შემოიტანა და კონკურსში მონაწილეობა შემოგვთავაზა.
ტესტების შევსება არ გამჭირვებია, რადგან ბევრი კრებული მაქვს, ხშირად ვავსებ, ვვარჯიშობ და კითხვაც ძალიან მიყვარს, კარგად სწავლასთან ერთად. სკოლაში 100-დან 80 ქულა მოვაგროვე და მალე წავედით ურეკის კულტურის სახლში, სადაც უკვე „ეტალონის“ წამყვანის, გოჩა ტყეშელაშვილის წინაშე, ოზურგეთელ მოსწავლეთა შემადგენლობაში გამოვედი. თამაშის დასრულებისას აღმოჩნდა, რომ მე 73 ქულით პირველ ადგილზე გავედი და უკვე ფინალურ ტურში, რომელიც გაზაფხულზე თბილისში გაიმართება, ოზურგეთს წარვადგენ. ეს არის ჩემთვის უდდესი სიხარული და ამდენივე პასუხისმგებლობა. ამასთანავე, გოჩა ტყეშელაშვილმა აღნიშნა, რომ რეგიონებში გამარჯვებულ მოსწავლეებს შორის, მე ყველაზე მაღალი _ 73 ქულა მაქვს! ამ ფაქტმა უფრო იმედით ამავსო, _რაკი ყველაზე მაღალი ქულა მაქვს, შესაძლებელია, ფინალშიც გავიმარჯვო, სადაც ოზურგეთის სახელით უნდა წარვსდგე! _ ამბობს ნინო სარიშვილი. უხარია, რომ ოზურგეთის მუნიციპალიტეტის გამგებელმა მერაბ ჭანუყვაძემ, მას, მეტი მოტივირებისთვის, ფულადი ჯილდო, 500 ლარი გადასცა.
„გურია ნიუსი“ ულოცავს ძალიან ნიჭიერ, ინტერესიან გოგონას ამ წარმატებას და ფინალურ ტურში, გულშემატკივრის პოზიციიდან, გამარჯვებას უსურვებს!
