ოზურგეთის მუნიციპალიტეტის დაბა ნარუჯაში არჩევნები "ნაციონალურმა მოძრაობამ" მოიგო. ნარუჯა ერთ-ერთი მრავალრიცხოვანი დასახლებაა ოზურგეთის მუნიციპალიტეტში. აქ 520 ოჯახი, 740 კომლი და 3200 მცხოვრებია. დაბაში 2 100 ამომრჩეველია.
რა გახდა კიდევ ერთ დაბაში ხელისუფლების მარცხის მიზეზი? ამასთან დაკავშირებით "გურია ნიუსი" დაბა ნარუჯის მოსახლეობას შეხვდა და მათი პრობლემების შესახებ კიდევ ერთხელ მოისმინა.
"არც ოპოზიციის იმედი გვაქვს, მაგრამ პრინციპის საკითხია _ არ გაგვიკეთეს არაფერი და არც ჩვენ არ მივეცით პრინციპულად ხმა "ქართულ ოცნებას". "ნაციონალები" იყვნენ და ასე ვიყავით _ ხომ არ გგონიათ, რომ ისინი გვიდგამდნენ ქარვასლებს?! სულ ასე ვყავართ ყველა ხელისუფლებას აბუჩად აგდებული _ 9 წელი იყვნენ და რა გააკეთეს? ან ახლა?
არც გზა გაუკეთებიათ და არც ცენტრში მდებარე სახლები გადაუხურავთ. თუ წამოხვალთ, ნახავთ, რა გაჭირვება გვაქვს ყველა ოჯახს. დიდი თუ პატარა თურქეთშია გადახვეწილი ლუკმაპურის საშოვნელად,"_ ამბობენ "გურია ნიუსთან" დაბა ნარუჯის მცხოვრებლები.
ნარუჯის მეხუთე რაიონში მცხოვრები 68 წლის თეიმურაზ ტარიელაძე, "გურია ნიუსთან" ამბობს, რომ აქაურებმა პრინციპულად არ მისცეს ხმა ხელისუფლებას:
"წყალი გვაქვს. ჩვენი პირველი პრობლემა არის უგზოობა. მეორე პრობლემა ისაა, რომ არ არის შემოყვანილი გაზი. აქ ცხოვრობენ ადამიანები, რომლებსაც სოციალური დახმარება ეკუთვნოდათ, მაგრამ მოუხსნეს. ძალიან უჭირს მოსახლეობას და დახმარება უნდა," _ ამბობს ტარიელაძე და არჩევნებში ხელისუფლების წაგების მიზეზებზე საუბრობს: "არჩევნებში წაგების მიზეზი არის ის, რომ ადგილობრივმა ხელისუფლებამ ყურადღება არ მოგვაქცია _ დაიმსახურეს და წააგეს კიდეც. პრინციპის საკითხი იყო _ რამდენიმე წელია ეს გზა ასეთ დღეშია და არ გააკეთეს, ვითომ მოხრეშეს შიდა გზები და ნახეთ რას ჰგავს _ სულ ჩარეცხილია წვიმისგან. თან ნაწილ-ნაწილ არის ვითომ მოხრეშილი. ეს არ არის მოსახლეობის აბუჩად აგდება? გვეუბნებიან, ჩვენ მეტის საშუალება არ გვაქვსო. სად, რატომ და როგორ იხარჯება სოფლის თანხები, არავინ აკონტროლებს, არავინ არ სთხოვს პასუხს არავის. არ ვიცით, სად წავიდა სოფლის პროგრამის ფული _ გაკეთებული არაფერი ჩანს. ეს მარტო ჩვენი სოფლის გამგებლის ბრალი არ იქნება _ მუნიციპალიტეტმა უნდა მიაქციოს ყურადღება."
გაიოზ ტარიელაძე: "ერთი საათი დაგჭირდებათ ქალაქში ჩასვლაზე, ესაა საქმე?! ერთი კულტურის სახლი გვქონდა, ისიც დაგვინგრიეს _ უზარმაზარი შენობა, რომელიც ხალხს ეკუთვნოდა, 7 000 ლარად გაყიდეს. გაპარტახებულია მთელი ცენტრი და ნაგვით არის სავსე. სკოლა ოთხი წლის განმავლობაში ერთხელ არ უნდა გაარემონტონ? გაზი არ გვაქვს, ყურადღება არავისგან გვაქვს. აქ სამუშაო ვერ ვნახე, ხალხმა წაბლი უნდა მონახოს ტყეში, რომ გაყიდოს და პური იყიდოს. ჩვენი სამსახური თურქეთია. წავალ ახლა ერაყში და ორ წელს ვერავინ მნახავს."
მანანა გოგუაძე: "ყველანაირად გვიჭირს, სამუშაო არ არის, დახმარება არ მაქვს, პენსიონერი ჯერ არ ვარ, მეუღლეც ავადმყოფი მყავს, მუშაობა არ შეუძლია _ მუდმივად სჭირდება წამალი."
მეათე რაიონში მცხოვრები 19 წლის ჯუნა ჯიმშერაძე ამბობს, რომ მათ საცხოვრებელ მრავალბინიან სახლში წვიმა რამდენიმე წელია ჩამოდის: "გზა არ გვაქვს, ყურადღებას არავინ გვაქცევს. გვემუქრებიან _ "ნაციონალებს" რომ მიეცით ხმა, აღარაფერი გეღირსებათო. მანამდე ხომ გვიკეთებდნენ რამეს?! ერთი კლუბი გვქონდა და ისიც როგორ დაგვიშალეს! არც ბინები გადახურეს _ რომ გაწვიმდება, სახლში წვიმა ჩამოდის. სამაგიეროდ, "ოცნების" წევრებს და მხარდამჭერებს გადაუხურეს სახლები."
რა გახდა არჩევნების წაგების მიზეზი ნარუჯაში, რა ბედი ეწია ნარუჯის კულტურის სახლს, ხომ არ გახდება წაგებული არჩევნები დაბაში ინფრასტრუქტურული სამუშაოების შეჩერების მიზეზი? _ამ კითხვებთან დაკავშირებით ოზურგეთის მუნიციპალიტეტის გამგებლის მერაბ ჭანუყვაძის პოზიცია ასეთია: "ეს ადგილობრივი მოსახლეობის არჩევანია, რომელსაც პატივი უნდა ვცეთ. ჩატარდა ყველაზე დემოკრატიული არჩევნები და მოსახლეობამაც ყოველგვარი იძულების გარეშე გამოხატა საკუთარი პოზიცია. რაც შეეხება, დაბა ნარუჯაში არსებულ კულტურის სახლს, შენობა იყო ამორტიზებული, მოხდა მისი დემონტაჟი და გაიყიდა აუქციონის წესით. ოზურგეთის მუნიციპალიტეტი გააგრძელებს ინფრასტრუქტურულ პროექტებს ყველა სოფელში, მათ შორის, ნარუჯაშიც," _ ამბობს გამგებელი.
