ამ ქუჩაზე რამდენიმე დღის წინ დაიწყო წყლის მილების გამოცვლისა და ქუჩის მოწესრიგების სამუშაოები. მაგრამ დღეს იქ მისულ საზოგადოებას და ჟურნალისტებს, დიდი რაოდენობით ტექნიკა და მუშახელი დახვდათ მობილიზებული. სუფთა სპეცტანსაცმელში და ჩაფხუტებში გამოწყობილი ადამიანები არაფრით არ ჰგავდნენ მძიმე სამუშაოთა შემსრულებლებს. ჩვენი ეჭვები შეხვედრის დასრულების შემდეგ გამართლდა, როცა ნიკოლაიშვილი და მისი თანმხლები პირები ჯიპებში გადანაწილდნენ და კვირკველიას ქუჩა დატოვეს, ე.წ. “მუშებმაც” დაიწყეს სპეცტანსაცმლის გახდა და მანქანაში ჩასხდნენ, რომელსაც ასეთი წარწერა ჰქონდა “რეგიონული განვითარებისა და ინფრასტრუქტურის სამინისტრო, საავარიო ჯგუფი”. ეტყობა, მინისტრისთვის საჩვენებლად მუშები არ ეყოთ და მათი რიგების ინფრასტრუქტურის სამინისტროს თანამშრომლებით შევსება გახდა საჭირო.
როგორც მათი საუბრიდან გახდა ცხადი, დელეგაცია ლესაში გაემგზავრა, სადაც უცხოელებისთვის კიდევ ერთ საჩვენებელ აქციას აწყობდნენ. მინისტრის წასვლისთანავე მძღოლებმა ახალთახალი ტრაქტორები და ბულდოზერები აამუშავეს და კვირკველიას ქუჩა დატოვეს, ადგილზე კი მხოლოდ ლანჩხუთის წყლის კომპანიის ნამდვილი მუშები დარჩნენ.
ნიკოლაიშვილმა მოკლედ მოგვითხრო პროექტის შესახებ და სიტყვასიტყვით გაიმეორა ლანჩხუთის პრესსამსახურის მიერ გავრცელებულ პრეს-რელიზის შინაარსი, რომელშიც წერია: “ლანჩხუთის მოსახლეობისთვის ხარისხიანი წყლის მიწოდების გაუმჯობესების მიზნით მიმდინარე სამუშაოებს მინისტრი ადგილზე გაეცნობა. სტაბილურ წყალმომარაგებას ლანჩხუთში მცხოვრები 8 ათასზე მეტი ადამიანი მიიღებს. სამუშაოების დასრულების შემდეგ ლანჩხუთის მოსახლეობის თითქმის ასი პროცენტი უგრაფიკო წყალმომარაგებით იქნება უზრუნველყოფილი. ბოლოს აღნიშნულია, რომ ამ პროექტს ევროპის საინვესტიციო ბანკი აფინანსებს და მასში 50 ადამიანია დასაქმებული”.
როცა მინისტრი სამთავრობო ტელევიზიების კამერების წინ მომავალ გეგმებზე საუბრობდა, ახალგაზრდა ქალმა, რომელიც ნიკოლაიშვილს ახლდა, “მუშებს” ხმადაბლა ჩაულაპარაკა –_ იმუშავეთ ახლა ცოტა, აამოძრავეთ ეგ ნიჩბებიო(!?)
რასაკვირველია, მივესალმებით, თუ ქუჩების რეაბილიტაცია მოხდება, მაგრამ ასეთი ფორმა საზოგადოებისთვის ნამდვილად მიუღებელია _ ასეთი შენიშვნა ამ შეხვედრაზეც გამოთქვა მოსახლეობამ, რასაკვირველია, მას შემდეგ, რაც ჩინოსნები იქაურობა დატოვეს.
