ლანჩხუთისა და ჩოხატაურის მაჟორიტარი დეპუტატობის კანდიდატის, ნინო წილოსანის მამის წინააღმდეგ თბილისის საქალაქო სასამართლოში პროცესი 27 ოქტომბერს გაიმართა.
შეგახსენებთ, რომ დავა, რომელიც დაახლოებით 8 წლის წინ დაიწყო, დღესაც გრძელდება. საქმე 2008 წლის 17 სექტემბერს, "ელექტროვაგონშემკეთებელი ქარხნის" წილის 52.63%-ის 3 მილიონ ლარად წილოსანის კომპანიისთვის გადაცემას ეხება, რომელიც "ელექტროვაგონშემკეთებელი ქარხნის" ყოფილი მეწილეების მტკიცებით, იძულებით დაათმობინეს.
წერილი ამ სასამართლო პროცესის მიმდინარეობის შესახებ ჩვენ მკითხველს გუშინ შევთავაზეთ, რომელშიც "ელექტროვაგონშემკეთებელი ქარხნის" სამეთვალყურეო საბჭოს ყოფილმა თავმჯდომარემ ავთანდილ საყვარელიძემ, რომელიც წილის იძულებით გადაფორმებაზე საუბრობდა, საკმაოდ ვრცელი კომენტარი გააკეთა.
გუშინვე ჩვენ შევხვდით ბადრი წილოსანის ადვოკატს დავით სამხარაშვილს, რომელმაც საკუთარი პოზიცია დააფიქსირა:
"ავთანდილ საყვარელიძე კვლავ აგრძელებს ბინძურ ცილისმწამებლურ კამპანიას ლანჩხუთისა და ჩოხატაურის აჟორიტარობის კანდიდატის, ნინო წილოსანის მამის, ბადრი წილოსანის წინააღმდეგ. ფაქტია, მისი ეს გააქტიურება იმან გამოიწვია, რომ ნინო წილოსანმა ლანჩხუთ-ჩოხატაურის ოლქში დიდი მხარდაჭერა მოიპოვა, ხოლო თვითონ 2%-იც ვერ მოაგროვა. თან ეს იმ დროს, როცა თავადვე განაცხადა, მაჟორიტარად კენჭისყრა იმის შემდეგ გადავწყვიტე, რაც გავიგე ნინო წილოსანი არჩევნებში მონაწილეობას იღებდაო.
ვცდილობდით, არ გვეპასუხა საყვარელიძის ცრუ ბრალდებებისთვის და დავლოდებოდით სასამართლო გადაწყვეტილებას, მაგრამ საყვარელიძის თავხედობა ყოველგვარ ზღვარს გადასცდა.
შევეცდები ძალიან მოკლედ, მხოლოდ ფაქტებით მოგიყვეთ, რა მოხდა რეალურად და წარმოგიდგინოთ ამ ფაქტების დამადასტურებელი დოკუმენტები.
ავთანდილ საყვარელიძის კომპანია "თ.ჯ. თრეიდსა" და ს/ს "ელექტროვაგონშემკეთებელ ქარხანას" შორის ურთიერთობა 2001 წელს დაიწყო. "თ. ჯ. თრეიდის" დაკვეთით, ქარხანა სარკინიგზო მოძრავი შემადგენლობების შეკეთების სამუშაოებს ახორციელებდა. 2004 წელს საყვარელიძის კომპანიას ქარხნის ვალი დაუგროვდა, დაახლოებით 2,5 მილიონი ლარი. წილოსანის მიერ საყვარელიძისთვის დავალიანების მოთხოვნას საეჭვოდ ემთხვევა ის ფაქტი, რომ წინა ხელისუფლება აპატიმრებს ს/ს "ელექტროვაგონშემკეთებელი ქარხნის" აქციების ძირითადი პაკეტის მფლობელ ბადრი წილოსანს და ციხეში, ჩუქების ხელშეკრულებით, სახელმწიფოსთვის ათმობინებს აქციების საკონტროლო პაკეტს. რამდენიმე თვეში, ფორმალური პროცეურების მოგვარების შემდეგ, სახელმწიფო, უშუალოდ მიხეილ სააკაშვილის ხელმოწერით, ქარხნის საკონტროლო პაკეტს პირდაპირი მიყიდვის წესით აძლევს ავთანდილ საყვარელიძეს. ძალიან საინტერესოა, ის ფაქტიც, რომ ბატონი საყვარელიძე აქციების ღირებულებას მას შემდეგ იხდის, რაც ნაყიდ ქონებას ბანკში აგირავებს.
ავთანდილ საყვარელიძე დაახლოებით სამი წელი მართავდა ქარხანას და ამ პერიოდში 70 მილიონ ლარამდე დავალიანება დაუგროვდა. მათ შორის სახელფასო დავალიანება აღწევდა დაახლოებით 2 მილიონ ლარს. ეს იმ დროს, როცა ამავე პერიოდში, მაშინდელი ხელძღვანელობის მითითებით, სხვადასხვა მაქინაციური გზით სალაროდან მილიონობით ნაღდი ფული გაჰქონდათ. ასევე ძალიან საეჭვოა ისიც, რომ ქარხანას მოულოდნელად წარმოეშვა თავათ საყვარელიძის კომპანიების დავალიანება, 28 მილიონ ლარზე მეტი.
მოკლედ, საყვარელიძემ იქამდე მიიყვანა საქმე, რომ მისივე მმართველობის პერიოდში დაიწყო ქარხნის გაკოტრების საქმის წარმოება. ძალიან მარტივად რომ გითხრათ, საყვარელიძემ თავადვე გააკოტრების პირას მიიყვანა ქარხანა და იძულებული გახდა მის გაყიდვაზე ეფიქრა. მიუხედავად იმ საეჭვო გარემოებებისა, რაზედაც ზემოთ ვისაუბრე, შედგა მოლაპარაკება ბადრი წილოსანსა და ავთანდილ საყვარელიძეს შორის და ბადრი წილოსანმა გაკოტრების პროცესში მყოფი ქარხნის აქციებში 2 მილიონ 200 ათასი აშშ დოლარი გადაიხადა. ამასთან ერთად გაისტუმრა ქარხნის დავალიანებები, რომელიც ავთანდილ საყვარელიძემ დააგროვა.
ამ ყველაფერს, რაზეც ზემოთ ვისაუბრე, დოკუმენტური დადასტურება ახლავს. არსებობს ციხეში გაფორმებული, ბადრი წილოსანის მიერ სახელმწიფოსთვის აქციების ჩუქების ხელშეკრულება, სააკაშვილის ბრძანება ქარხნის საყვარელიძისთვის პირდაპირი მიყიდვის შესახებ, საყვარელიძის მმართველობისას ქარხნის დავალიანებების დოკუმენტაცია და წართმეული ქარხნის ბადრი წილოსანის მიერ ხელმეორედ ყიდვის დოკუმენტები. ნოტარიუსი, რომელმაც დამოწმა საყვარელიძისგან წილის ნასყიდობის ხელშეკრულება ცალსახად აცხადებს, რომ არავითარ ძალადობას ადგილი არ ჰქონია. პირიქით წილის გადაფორმებისას გამყიდველი მხარე ხშირად თვითონ აყენებდა მოთხოვნებს, რომელიც კმაყოფილდებოდა მეორე მხარის მიერ. ან როგორ შეიძლება ძალადობით იყოს დადებული კონტრაქტი, სადაც წერია, რომ თუ ბადრი წილოსანი ქარხნის აქციების ღირებულებას იმავე დღეს არ გადაიხდიდა, დაეკისრებოდა სოლიდური საჯარიმო სანქციები, ხოლო რამდენიმე დღეში კონტრაქტი საერთოდ გაუქმდებოდა.
ძალადობაზე აბსოლუტურად არავინ საუბრობს საყვარელიძისა და მასთან ნათესაურ და სამსახურებრივ კავშირში მყოფი პირისა. ამ გზით ეს ადამიანი, მცირე ჯგუფთან ერთად ცდილობს სიყალბისა და ცილისწამების გზით ისევ ხელში ჩაიგდოს ქარხანა.
ამ ფაქტების შემდეგ თქვენ და მკითხველმა გააკეთეთ შეფასება, რეალურად ვინ არის დაზარალებული და ვინ გამომძალველი? ვინ იყო წინა ხელისუფლებასთან შეკრული, ბადრი წილოსანი, რომელიც დააპატიმრეს და ქონება დაათმობინეს თუ საყვარელიძე, რომელსაც, სააკაშვილის ხელმოწერით პირდაპირი მიყიდვის წესით ხელში ჩაიგდო ქარხანა?
ამ საკითხზე სასამართლო გადაწყვეტილება ძალიან მალე იქნება და ყველაფერს თავისი სახელი დაერქმევა", _ უთხრა "გურია ნიუსს" დავით სამხარაშვილმა.
მოსამართლე ლია ავალიშვილის გადაწყვეტილებით, სასამართლო პროცესი 14 ნოემბერს, გაგრძელდება.
