დეპუტატის პროტესტი _ „აღმასრულებელი ხელისუფლება თავის შეხედულებებს არ უნდა გვახვევდეს!“

2 ნოემბერს გამართულ  ლანჩხუთის საკრებულოს რიგგარეშე სხდომაზე დეპუტატებმა "მწვანე შუქი აუნთეს" მიმდინარე წლის მთავარ საფინანსო დოკუმენტში  მორიგი ცვლილების გახორციელებასთან დაკავშირებით ადმინისტრაციული წარმოების დაწყებას. ცვლილების ინიციატივა  გამგეობას ეკუთვნის და იგი დეპუტატებს ამავე უწყების საფინანსო სამსახურის უფროსმა, როლანდ ლაშხიამ გააცნო.   ინიციატივა, განსაკუთრებით, სამხარაულის ექსპერტიზის ბიუროსთვის გადასარიცხი ცხრა ათასი ლარი მთლად მისაღები ვერ დარჩა დეპუტატებისთვის,

როგორც გამგეობის საფინანსო სამსახურის უფროსის, როლანდ ლაშხიას მოხსენებიდან გაირკვა,  ბიუჯეტში ცვლილების გახორციელება მიზნად ისახავს  საკრებულოს სხვა ხარჯების მუხლის შემცირებას 20 300 ლარით, საიდანაც  11 300 ლარი  ამავე სისტემაში შტატგარეშე  მუშაკების შრომის ანაზღაურებას მოხმარდება.  ცხრა ათასი ლარი კი სპორტული დარბაზის საპროექტო სახარჯთაღრიცხვო დოკუმენტაციის ექსპერტიზის სამუშაოების დასაფინანსებლადა საჭირო.
პირველი, ვინც ლაშხიას წარმოდგენილი საკითხი გააპროტესტა, სუფსის მაჟორიტარი ჯუმბერ ბლაგიძე იყო, რომელსაც აშკარად არ მოეწონა, რომ გამგების ინიციატივით  საკრებულოს ხარჯების შეკვეცა ხდება _ მისი აზრით, ეს თანხები  დეპუტატებისთვის პრემიების გაცემას უნდა მოხმარდეს.
„რატომ მაინცდამაინც საკრებულოს სხვა ხარჯებიდან აპირებენ  თანხის წაღებას. მხოლოდ ჩემს არა, კოლეგების ინტერესსაც გამოვხატავ, რომ უნდა წახალისდეს წარმატებული მუშაკი. აქ ადამიანები სამუშაო საათების მერეც  მუშაობენ, ასეთებს კი წახალისება და ჯილდო სჭირდება. მალე წლის ბოლო მოვა და აღმოჩნდება, რომ თანხა არ არის საკმარისი“, _  თქვა ბლაგიძემ, რომელიც უკვე მერამდენე სხდომაა მოითხოვს, რომ ბიუჯეტში გათვალისწინებული იყოს თანხა საკრებულოში პრემიების გასაცემად. 

ლაშხიას პასუხით, ამ დროისთვის საკრებულოს სხვა ხარჯების ფონდია დაუტვირთავი, ამიტომაც  სწორედ მის ხარჯზე ხდება ცვლილება ბიუჯეტში.
იურიდიულ საკითხთა კომისიის ხელმძღვანელის, რომან ბიწაძის აზრით, რახან თანხა საკრებულოს ეკუთვნის, ცვლილების ინიციატორიც თავად უნდა იყოს.

„ინიციატივა უნდა მოდიოდეს საკრებულოდან და აღმასრულებელი ხელისუფლება თავზე არ უნდა გვახვევდეს თავის შეხედულებებს _ ეს მარტივი ჭეშმარიტებაა!  შეცდომა მაშინ დავუშვით, 100 ლარიანი ობიექტისთვის სამსახარაულის ექსპერტიზის ბიუროსთვის თანხა რომ გამოვყავით.  არსებობს შესაბამისი სამსახურები ადგილზე იმათ ჩაებარებინათ. თუ ვაღიარებთ რომ ის სატანადო დონის სპეციალისტები არ არიან, მაშინ გამოვაცხადოთ კონკურში, უამრავი მაღალი კლასის მშენებელ-ინჟინერი სახლში ზის. მომავალ წელს მაინც გავითვალისწინოთ  და მსგავსი სამუშაოებისთვის ფული აღარ იყოს საჭირო".

დეპუტატმა დარეჯან ბურჭულაძემ  საფინანსო სამსახურის უფროსისგან განმარტება ითხოვა, თუ რატომ ითვალსწინებს ცვლილება საკრებულოში შტატგარეშე თანამშრომლებისთვის დამატებით 11 300 ლარის გამოყოფას _ „რა ხდება, თანამშრომელთა რაოდენობამ მოიმატა თუ სახელფასო ანაზღაურებამ?“
"რიცხოვნობა არ მომატებულა. უბრალოდ, თავიდან შტატგარეშეების რიცხოვნობა იყო 2%-ით განსაზღვრული. გამგეობაში _ რვა, საკრებულოში კი შვიდი ადამიანია შტატგარეშედ დასაქმებული.  ბიუჯეტი როცა შედგა, ის 7 კაცი არ იყო ბიუჯეტში გათვალისწინებული", _ უპასუხა ლაშხიამ.

საბოლოოდ, საკითხთან დაკავშირებით ადმინისტრაციული წარმოება სხდომაზე მყოფი 22-ვე დეპუტატის თანხმობით დაიწყო,  თუმცა, საკითხის კომისიებსა და ფრაქციებში განხილვის შემდეგ რას გადაწყვეტენ საკრებულოს წევრები, ეს მომავლის საქმეა.