ხარაგაულის მუნიციპელიტეტის სოფელ ზვარეში რკინიგზის ლიანდაგის მშენებლობაზე დასაქმებული რამდენიმე ქართველი მუშა ჩინური კომპანიის "23-ე ბიუროს" წარმომადგენლებმა სცემეს. 4 მათგანი მძიმე დაზიანებებით ზესტაფონის საავადმყოფოში არიან გადაყვანილები. ნაწილი კი, წუხელ ხაშურის საავადმყოფოში მოათავსეს.
როგორც "გურია ნიუსს" ზვარეში რკინიგზის ლიანდაგის მშენებლობაზე ერთ-ერთმა დასაქმებულმა (ვინაობას მისი თხოვნით არ ვასახელებთ, ავტ.) განუცხადა, კონფლიქტი მშენებლობაზე დასაქმებულებსა და ჩინური კომპანიის წარმომადგენლებს შორის უახლოეს წარსულში რამდენჯერმე მოხდა.
"ეს არ არის პირველი შემთხვევა, რომ ასეთი კონფლიქტი ხდება და მიდის ხელჩართული ჩხუბი დასაქმებულებსა და დამსაქმებელი კომპანიის წარმომადგენლებს შორის. რამდენიმე თვის წინაც მოხდა მსგავსი შემთხვევა, თუმცა, დავიწყეთ მოლაპარაკებები და ვაგრძელებდით მუშაობას. წინა თვეში ხელშეკრულებებთან დაკავშირებით გაფიცვა გვქონდა, ესეც მოვაგვარეთ ნაწილობრივ. ხარვეზები იყო, მთლად კმაყოფილები არ იყვნენ ჩვენით, რადგან კანონმდებლობიდან გამომდინარე გვქონდა სამართლიანი მოთხოვნები. რაც როგორც ჩანს, კომპანიისთვის ზედმეტ ხარჯებთან იყო დაკავშირებული და ცუდი თვალით გვიყურებდნენ.
გუშინ რა მოხდა კონკრეტულად არ ვიცი, რადგან მე არ ვყოფილვარ სამსახურში. როგორც მითხრეს, ჩინელებსა და რამდენიმე დასაქმებულს შორის მოხდა კონფლიქტი, თუმცა, ჩინელები მეტნი იყვნენ, დაახლოებით, 50 კაცი 3-4 ქართველის წინააღმდეგ, "არმატურებით" შეიარაღებულები. ეს "არმატურები" სპეციალურად ჰქონდათ გამზადებული, დახვეული იყო წებოვანი ლენტი, რომ ხელიდან არ გაცურებოდათ. ამ კონფლიქტის გამო, ჩემს ხელთ არსებული ინფორმაციით, სამი ადამიანი გადაიყვანეს ხაშურის საავადმყოფოში.
რაც შეეხება დღევანდელ კონფლიქტს, როცა მივედი სამსახურში დავიწყეთ გარკვევა რა მოხდა გუშინ, ვსაუბრობდით, როცა ჩხუბის ხმა გავიგონეთ. გამოვედით გარეთ და ვნახეთ, რომ ისევ ჩხუბი იყო ეზოში. ქართველებს სცემდნენ ჩინელები. ისევ "არმატურებით", დანებით და ჩინური საკეპი ნაჯახით მიდიოდა ხელჩართული ბრძოლა. გვყავს დაჭრილები და დაშავებულები, უმოწყალოდ სცემეს რამდენიმე ადამიანი. ხელშიშველი ადამიანები, რადგან არ აქვს წინააღმდეგობის გაწევის უნარი, დანიან კაცებსრას უზამდნენ?! ერთ-ერთი თანამშრომელი ნაჯახით არის დაჭრილი, რომელიც მე წამოვიყვანე ზესტაფონის საავადმყოფოში. ამის შემდეგ რა მოხდა არ ვიცი", _ამბობს დასაქმეული.
მისივე ინფორმაციით, ამ დროისთვის ზესტაფონის საავადმყოფოში 4 დაზარალებული იმყოფება.
"ერთს ხელი აქვს გასიებული. ორს მრავლობითი ჭრილობა აქვს თავზე მიყენებული, გატეხილი აქვს ბლაგვი საგნით და მძიმე რკინით, მათ ნაკრები დაადეს უკვე. ერთი ადამიანი კი, ნაჯახით არის დაჭრილი ზურგზე, ბეჭის ქვემოთ. 10 სანტიმეტრამდე ჭრილობა აქვს. 7 ნაკერი დაადეს", _ ამბობს ის.
"_ერთადერთი ჩვენი მოთხოვნაა, უფროსობა, რომელიც ასეთ აგიტაციას მიმართავს ქართველების წინააღმდეგ, უშვებს ხელჩართულ ჩხუბებს და ქართველებზე ზეწოლას, მოგვაშორონ. ამ პირობებში მუშაობა შეუძლებელია. ამიტომ ვითხოვთ მათ გამოცვლას", _ ამბობს ის.
როგორც "გურია ნიუსს" შსს-სში განუცხადეს ზვარეში მომხდარ შემთხვევაზე უწყებას გამოძიება აქვს დაწყებული.
"გამოძიება დაწყებულია 125-ე მუხლით, რაც ცემას გულისხმობს. მიმდინარეობს აქტიური საგამოძიებო მოქმედებები", _ აცხადებენ შსს-ში.
კითხვაზე: არის თუ არა დაკავებული ვინმე?- უწყებაში ჯერჯერობით კომენტარს არ აკეთებენ:
"დღის განმავლობაში მოგაწვდით დამატებით ინფორმაციას", _ გვითრეს შსს-ში.
რაც შეეხება "საქართველოს რკინიგზას", რომლის დაქირავებითაც მუშაობს ზვარეში ჩინური კომპანია "23-ე ბიურო", აღნიშნულთან დაკავშირებით კომენტარს არ აკეთებენ.
"ჩვენ ამასთან დაკავშირებით კომენტარს ვერ გავაკეთებთ, რადგან ცალკე კომპანიაა, ჩვენი ქვეკონტრაქტორი კომპანია. მათი შიდა ამბებზე, თანამშრომლებთან ურთიერთობაზე, ჩვენ არ გვაქვს უფლება კომენტარი გავაკეთოთ", _ უთხრეს "გურია ნიუსს" "საქართველოს რკინიგზის" პრესსამსახურში.
"გურია ნიუსი" ცდილობს კომპანია "23-ე ბიუროს" წარმომადგენლობასთან დაკავშირებას, რომელთა პოზიციასაც მოგვიანებით შემოგთავაზებთ.
