აუდიტის სამსახურმა პარტიების მიერ 8 ოქტომბრის ჩათვლით გაწეული ხარჯების ჩამონათვალი უკვე გამოაქვეყნა. დოკუმენტების თანახმად, მმართველ პარტიას, ამ პერიოდში 2 110 775,45 ლარი აქვს დახარჯული.
თანხაში შედის ხელფასები, რეკლამები, მივლინებები და კონცერტებისთვის გაცემული თანხებიც.
როგორც ირკვევა 3 ოქტომბერს „ქართულმა ოცნებამ“ ეკა კახიანს მუსიკალური ნომრის შესრულებისთვის 1 250 ლარი გადაუხადა. ამავე დღეს მიიღო, ასევე მუსიკალური ნომრის შესრულებისთვის, 1 250 ლარი ლაშა რამიშვილმა; 1 875 ლარი _ თემურ მჟავიამ; 1 250 ლარი _ მაია ჯაბუამ; 2 500 ლარი _ ანრი ჯოხაძემ.
საკონცერტო პროგრამის შესრულებისთვის 1 562,5-1 562,5 ლარი ერგოთ ნინო ახობაძეს, მანანა მაისურაძეს, ზურაბ მანჯავიძეს და ირინე კახნიაშვილს (ანსამბლი „ფორტე“); ელექტრონული მუსიკის შესრულებისთვის 1 250 ლარი მიიღო ლევან მდინარაძემ, საკონცერტო პროგრამის შესრულებისთვის ელენე კალანდაძეს 1 500 ლარი გადაუხადეს, 1250 ლარი _ სალომე ბაკურაძეს, 1 875 _ ლარი სოფო ბედიას, 1 250 ლარი _ ნინო ბუზალაძეს.
ღონისძიების წაყვანისთვის 1 250 ლარი გადაუხადეს ნინო გოგიჩაიშვილს, 1 875 ლარი _ კი _ ლევან გოგორელიანს.
გაცილებით იაფი დაჯდა „ქართული ხმების“ კონცერტი _ 7 ოქტომბერს, საკონცერტო პროგრამის შესრულებისთვის, 125-125 ლარი გადაუხადეს რობერტ გოგოლაშვილს, მალხაზ თალაკვაძეს, ლევან თამაზაშვილს, ზურაბ ჩხაიძეს (კომპანია „ასკანელების“ ერთ-ერთი დამფუძნებელი), ვასილ დოლიძეს, დავით აბესაძეს, გია ჭირაქაძეს, ზურაბ ლოლაძეს, გივი ჭიჭინაძეს (იმერეთის გუბერნატორი) და თემურ ჭკუასელს (პარლამენტის დეპუტატი).
თემურ ჭკუასელი „გურია ნიუსთან“ საუბრისას ამბობს, რომ „ქართულ ხმებს“ ჰონორარი არ მოუთხოვია:
_ ჩვენ ზესტაფონში ჩავატარეთ კონცერტი და თავიდანვე უარი ვთქვით ჰონორარზე. თუმცა, გვითხრეს, რომ უფასოდ არ შეიძლებოდა და ამიტომ, სიმბოლური თანხა გადმოგვირიცხეს, _ აღნიშნა ჩვენთან საუბრისას ჭკუასელმა.
მისივე თქმით, ამ კონცერტზე ბევრი საინტერესო დეტალი გამოიკვეთა:
_ ჩვენ ცენტრში გვქონდა კონცერტი, „ნაციონალურ მოძრაობას“ კი _ სტადიონზე. ბევრი მომღერალი მათთან წავიდა, ბევრი ჩვენთან დარჩა. მაგალითად, ნინი ბადურაშვილმა უარი თქვა „ნაციონალების“ კონცერტზე და „ქართული ოცნების“ ღონისძიებაზე გამოვიდა, _ აღნიშნა ჭკუასელმა.
როგორც დოკუმენტებიდან ირკვევა, „ქართულ ოცნებას“ ამ კონცერტზე ბადურაშვილის მხარდაჭერა 3 750 ლარი დაუჯდა; ამდენივე მიიღო მარიამ ზამბახიძემ. ამ კონცერტის ღონისძიების სცენარის მომზადებისთვის 1 250 ლარი გადაუხადეს კოტე მჟავიას, ხოლო კონცერტის წაყვანისთვის ედმონდ მინაშვილს 1 250 ლარი მისცეს.
„ქართული ოცნების“ მხარდასაჭერ კონცერტზე მუსიკალური ნომრის შესრულებისთვის, 8 ოქტომბერს 437,5 ლარი გადაუხადეს მაგდა ვასაძეს, 1 375 ლარი _ დავით გაგუას, 437,5 _ ელგუჯა მჭედლიშვილს, 437,5 ლარი _ ზაზა ზუკატოვს, 1 000 ლარი _ გურამ მაკალათიას, 437,5 _ იოსებ კაპანაძეს, 437,5 _ ნიკოლოზ წიკლაურს.
17 სექტემბერს, საკონცერტო პროგრამის შესრულებისთვის 62,5-62,5 ლარი მიიღეს _ მირზა მამსირაშვილმა, მინდია მამსირაშვილმა, არჩილ გელაშვილმა და ზურაბ დათიკაშვილმა.
15 სექტემბერს, საკონცერტო პროგრამის შესრულებისთვის 250 ლარი გადაუხადეს გიორგი იოსელიანს, სცენისა და რეჟისურისთვის კი 625 ლარი მიიღო გიორგი კვატაშიძემ.
შეგახსენებთ, რომ ეს თანხები 8 ოქტომბრის ჩათვლით გაწეული ხარჯებია.
