ოზურგეთიდან ბთუმისკენ მიმავალ ცენტრალურ გზაზე, სოფელ ლიხაურის და ჭანიეთის მონაკვეთზე, ჩოლოქის ხიდამდე გზა ისეა დაზიანებული, ყოველ წუთს მოსალოდნელია, ავტოკატასტროფა მოხდეს. მძღოლები ორიეტაციას კარგავენ და არ იციან, ორმოებს აუარონ გვერდი თუ ერთმანეთს. სწორედ ამ პრობლემის გამო მოხდა გუშინ აქ ავტოსაგზაო შემთხვევა.
ცენტრალური ტრასა, სადაც ტრანსპორტის ხშირი და სწრაფი მოძრაობაა, ასეთ მდგომარეობაშია, თითქმის, ნახევარი წელია, რაც მძღოლებისა და მგზავრების მხრიდან სამართლიან გულისწყრომას იწვევს.
„ამ ყველაფერს პატრონი ჰყავს? ავტოკასტროფების კასკადს ელოდებიან? სოფლის გზები აღარაა ასე დაფლეთილი. ღამით არ უნდა ეძინოთ და ისე გააკეთონ. მით უფრო, როცა უამრავი არაკვალიფიციური მძროლი დაქრის უაზრო სიჩქარით. კვალიფიციურიც რომ იყოს, მაინც კისერს მოიტეხს. ცენტრალურ ტრასაზე ურმის სიჩქარით ხომ არ ივლის ადამიანი? ცოტა თუ აჩქარდი, აქ აუცილებლად ორმოში ჩავარდები. თუ ღამეა და მძღოლი ამ ტრასაზე პირველად მგზავრობს, მთლად უარესი _ ის ნაკლებად წარმოიდგენს, რომ ამ მნიშვნელობის ტრასა ორმოებითაა სავსე“, _ ამბობენ ისინი.
„გურია ნიუსი“ ოზურგეთში, შპს „გზამშენი-18“-ის ხელმძღვანელს, თემურ ჯახვას დაუკავშირდა და ჰკითხა ოზურგეთი-ბათუმის ცენტრალურ გზაზე არსებული პრობლების შესახებ, რატომ არ მოხერხდა გზის თუნდაც ორმული შეკეთება.
_ ვიცი ამ გზის მდგომარეობის შესახებ. გუშინაც ვიყავი იქ. ეს გზა ჩინელების მანქანებმა სულ მოსპო, როცა ქობულეთის ავტობანის მშენებლობის დროს ქვიშას ეზიდებოდნენ. მე საავტომობილო გზების დეპარტამენტში უკვე გაგზავნილი მაქვს მოთხოვნა, ორშაბათს ველოდებით თბილისიდან წარმომადგენლების ჩამოსვლას. მომავალი წლის გეგმაშია, ანასეულის გადასახვევიდან ჩოლოქის ხიდამდე არსებული გზის სრული რეაბილიტაცია. რაც შეეხება დაზიანებულ მონაკვეთებს და ორმოებს, ახლა წვიმს და როგორც კი გამოიდარებს, აუცილებლად მოვახდენთ ორმოების შევსებას, _ გვითხრა თემურ ჯახვამ.
