ოზურგეთის მუნიციპალიტეტის საკრებულოს რიგგარეშე სხდომაზე, რომელიც 17 ოქტომბერს შედგა, ერთი საკითხი განიხილეს _ ოზურგეთის მუნიციპალიტეტის 2017 წლის ბიუჯეტის დამტკიცების შესახებ ოზურგეთის მუნიციპალიტეტის საკრებულოს დადგენილების მისაღებად საჯარო ადმინისტრაციული წარმოების დაწყების თაობაზე.
საკრებულოს თავმჯდომარის მოადგილემ, დიმიტრი კვერღელიძემ მიმოიხილა ოზურგეთის მუნიციპალიტეტის 2017 წლის ბიუჯეტის პროექტი, რომელიც დარგობრივმა კომისიებმა შეისწავლეს და სხდომაზე შენიშვნებით წარადგინეს.
_ ვიცი, როგორც კომისიების მიერ შესრულებული სამუშაო შესახებ, ისე ფრაქციების აზრი და გამოკვეთილია, რომ 25 ნოემბრისთვის ბიუჯეტის პროექტს დავაბრუნებთ, რათა შენიშვნები იქნას გათვალისწინებული. მთავარია, რომ ჩვენი ბიუჯეტი იქნება პროგრამული, ხალხს ეცოდინება, რაში დაიხარჯება მისი ფული, _ თქვა დიმიტრი კვერღელიძემ და მოუწოდა დეპუტატებს, მუნიციპალიტეტის გამგებლის წარმომადგენლებს სოფლებში, რომ 21 ნოემბერს, 2017 წლის ბიუჯეტის საჯარო განხილვაზე, რომელიც შედგება ოზურგეთის დემოკრატიული ჩართულობის ცენტრში, მოიწვიონ მოქალაქეები, რათა ყველამ გამოთქვას საკუთარი მოსაზრება.
კვერღელიძემ ისაუბრა პრიორიტეტებზე და გაიხსენა გასული წლები, როცა მთავარი პრიორიტეტი სოციალური საკითხი იყო: _ ახლა კი უპირველესი ინფრასტრუქტურის მოწესრიგებაა და ეს ასეც უნდა იყოს, _ თქვა მან და განმარტა, რომ ოზურგეთის 2017 წლის ბიუჯეტი 10 მილიონ 241600 ლარით განისაზღვრება. მასში არაა სოფლის მხარდამჭერი პროგრამის თანხის მოცულობა, ვინაიდან თანხების გამოყოფა ხდება წლის დასაწყისში, ფინანსთა სამინისტროს მიერ. ასევე, არ შედის ტრანსფერი _ 5816, 9 ათასი ლარი, მათ შორის, გათანაბრებითი ტრანსფერი _ 5642, 9 ათასი ლარი და მიზნობრივი დანიშნულების ტრანსფერი _ 174,0 ათასი ლარი.
დიმიტრი კვერღელიძემ როცა ბიუჯეტის პროგრამულობაზე ისაუბრა, თქვა, რომ უარს ამბობენ პრემიებზე.
_ არც ერთ მუხლში არ არის ჩადებული მსგავსი რამ. იმიტომ არა, რომ ვუფრთხით პრემიებს, მაგრამ, როცა ყველა იმ მუხლს შევასრულებთ სრულყოფილად, რაც განსაზღვრულია და პრობლემები მოგვარდება, მერე შესაძლებელია პრემიების გაცემა, _ თქვა მან.
საფინანსო-საბიუჯეტო სამსახურის უფროსმა გია მამაკაიშვილმა თქვა, რომ ოზურგეთის ბიუჯეტი ორიენტირებულია ინოვაციებზე. ასევე კიდევ ერთხელ ისაუბრა პრიორიტეტებზე.
დეპუტატები შეჯერდნენ, რომ თითქმის ყველა შენიშვნას გაცნობილები არიან, დარგობრივმა კომისიებმა კარგად იმუშავეს და საბოლოოდ კენჭი უყარეს ოზურგეთის მუნიციპალიტეტის 2017 წლის ბიუჯეტის საჯარო ადმინისტრაციულ წარმოებაზე დაყენებას.
