რამდენიმე დღის წინ, რაჭაში, ქალაქ ამბროლაურში მერვედ გაიმართა მსოფლიოს ორ გზის ჩემპიონის, ოლიმპიური თამაშების ვერცხლის მედლის მფლობელის, გურამ საღარაძის სახელობის საერთაშორისო ტურნირი თავისუფალ ჭიდაობაში, სადაც მასპინძელი ქვეყნის ფალავნებთან ერთად, თავი მოიყარა აზერბაიჯანის, სომხეთის, რუსეთის წარმომადგენლებმა. სულ 300 სპორტსმენი მონაწილეობდა რაჭის ტურნირში.
აღნიშნულ ტურნირზე ლანჩხუთის სპორტული ცენტრის რვა აღსაზრდელიც იღებდა მონაწილეობას: რეზო ქამადაძე (32კგ.), ამირან პაქსაძე (42კგ.), გიორგი გემაზაშვილი (42კგ.), დემეტრე მახარაძე (46კგ.), ლუკა გოგიტიძე (50კგ.), გიორგი კვირკველია (54კგ.), გიორგი აფხაზავა (58კგ.) და ბექა ართილაყვა (63კგ.).
წარმატებული გამოდგა გიორგი აფხაზავასა და ბექა ართილაყვას ასპარეზობა. გიორგიმ ფინალური შეხვედრა დათმო სომხეთის წარმომადგენელთან ქულების უპირატესობით და ვერცხლის მედალი მოიპოვა. ბექამ კი ფინალში გადასასვლელი შეხვედრა წააგო, შემდგომ კი ბრინჯაოს მედლისათვის სძლია ამბროლაურის წარმომადგენელს ქულების უპირატესობით.
ამ ტურნირზე საასპარეზოდ ლანჩხუთელთა გუნდი მწვრთნელებმა კახა აფხაზავამ და კახა გოგოლიშვილმა მოამზადეს.
"გურამ საღარაძის სახელობის ტურნირი ტრადიციულია და ყოველწლიურად ტარდება ამბროლაურში. იგი ერთ-ერთ მაღალი დონის ტურნირად არის მიჩნეული, რადგან აქ სხვადასხვა ქვეყნის უძლიერესი გუნდები იყრიან თავს. წელსაც ხუთი ქვეყნის წარმატებული ფალავნები იყვნენ წარმოდგენილები, აქედან გამომდინარე, ჩვენ მიერ მოპოვებული ვერცხლი და ბრინჯაო კარგ შედეგად ითვლება. გიორგი აფხაზავას შეეძლო ჩემპიონი გამხდარიყო, რომ არა მსაჯთა არაობიექტურობა, სამი ქულა წაგვართვეს და 6-4 წავაგეთ ფინალური შეხვედრა სომეხ სპორტსმენთან, რაც ძალიან გულდასაწყვეტია.
ბექას გამოსვლაც შედეგიანი დარჩა, მან მხოლოდ ერთი შეხვედრა დათმო ოთხიდან. თავისი შესაძლებლობები ვერ გამოიყენეს დემეტრე მახარაძემ და გიორგი კვირკველიამ, მიზეზი ჯერჯერობით გაურკვევლია, მაგრამ რა თქმა უნდა ანალიზს გავაკეთებთ, მათგან კარგ შედეგს მოველოდით“, _ ამბობს ლანჩხუთელთა ერთ-ერთი მწვრთნელი კახა აფხაზავა.
