“წლევანდელი “ალეგრობა” გაცილებით მასშტაბურია”

ქალაქ ოზურგეთში, დღეს სახალხო  დღესასწაულს _ „ალეგრობას“  ზეიმობენ, რომელსაც უძველესი ტრადიცია აქვს და თავდაპირველად საქველმოქმედო ხასიათს ატარებდა.

ქალაქის  მერიის ინიციატივით და ორგანიზებით, დღეს აქ სხვადასხვა ღონისძიება  ტარდება.

„ჭადრების ბაღში“ საზეიმო განწყობაა, რასაც უჩვეულოდ თბილი, მზიანი ამინდი და ბავშვების ჟრიამული კიდევ უფრო საზეიმოს ხდის.

_ წლევანდელი „ალეგრობა“  განსაკუთრებით მასშტაბურია, ვიდრე წინა წლების. ამ ზეიმს ემთხვევა ოზურგეთის 170 წლის იუბილე და სწორედ, ეს საიუბილეო წელი თავისებურ ლაზათს მატებს დღესასწაულს.  გამოფენა, სპორტული ღონისძიებები, საბავშვო კონცერტი, „საპატიო ოზურგეთლების“ წარდგენა, საბოლოოდ კი გალა კონცერტი  გაიმართება. ხედავთ, რამდენი ბავშვია და უსაზღვროდ ბრდღვიალა გიორგობის  მზეც საგნგებოდ გვასხივებს, რაღაცნაირად ღვთის ძალას ვგრძნობ. გიორგი კეკელიძის  „წიგნების ბუდე“ ჩვენი პატარებისთვის, ახლაგაზრდებისთვის  მართლაც სანატრელ, თბილ და მყუდრო  ბუდედ იქცა.  როგორც გავიგე, ის ჩვენი ქალაქის საპატიო მოქალაქე უნდა გახდეს და ამ საზეიმო წუთებსაც განსაკუთრებით ველოდებით დღეს, _  თქვა„გურია ნიუსთან“ ოზურგეთის კულტურისა და პარკი დირექტორმა ინგა დუმბაძემ.