“სახლის შეკეთებას ვერ შევძლებთ”

პირველი სართული საცხოვრებლად უვარგისია, ასასვლელი კიბე _ ავარიულ მდგომარეობაში, სახლის იატაკი ირყევა და კედლები ამორტიზებულია. ამ შენობის ნახევარ ფართზე ცხოვრობს ახალგაზრდა ცოლ-ქმრის _ ტარიელ და მაია გობრონიძეების ოთხშვილიანი ოჯახი.
ოჯახში მისულებს დიასახლისი მაია გოგია დაგვხვდა: _ ბავშვები დედამთილთან გავუშვი დროებით. ვცხოვრობთ ღარიბულად, ჩვენი ძირითადი შემოსავალი სოციალური დახმარებაა, თვეში _ 150 ლარი. ესეც რომ არ იყოს, ბავშვები მშივრები მეყოლებოდა. ოთხი შვილი მყავს, ადრე ინტერნატში სწავლობდნენ, მერე მეოთხე საჯარო სკოლაში გადმოვიდნენ. ახალი და კარგი ტანსაცმელი არ აცვიათ. მადლობა ღმერთს, პრეტენზიას ხმამაღლა არ გამოთქვამენ, მაგრამ მე ხომ ვხვდები, რას ფიქრობენ?! როგორც  სოციალურად დაუცველებს, საკლასო სახელმძღვანელოები სკოლაში გადასცეს. ცუდად არ სწავლობენ, მაგრამ მეტი ხელშეწყობა სჭირდებათ. წელს პატარა სკოლაში უნდა გამეშვა, მაგრამ არ მქონდა იმის ეკონომიკური შესაძლებლობა, მეოთხე მოსწავლე მყოლოდა და ვარჩიე, ისევ ბაღში ევლო _ იქ გადასახადისგან გათავისუფლებული ვართ. რაც შემიძლია, ხელს ვუწყობ და სიღარიბის გამო არ მინდა დაიჩაგრონ ბავშვები,  _ გვითხრა მან.
გობრონიძეების სახლში ერთადერთი დადებითი გარემოება  ის არის, რომ სახურავიდან წყალი არ ჩადის.
_ ბავშვები რომ გაიზრდებიან, რა მეშველება, არ ვიცი, _ აგრძელებს ჩვენთან საუბარს ქალბატონი მაია, _ ყველას ერთ ოთახში გვძინავს და გვეშინია, სახლი არ დაიშალოს სიძველისგან. კიბე გადავარჩინეთ და სამაგრი გავუკეთეთ, თუმცა, ძალიან ძველია და ნელ-ნელა იშლება. ფიზიკურად ვერ შევძლებთ, სახლი რომ გავაკეთოთ. ერთში მაინც გაგვიმართლა _ ჯერ თავზე არ გვაწვიმს. ვფიქრობ და ვერ მომიფიქრებია, მომავალში რა უნდა გავუკეთო ჩემს შვილებს. მეხმარება კეთილი ხალხი, ხელს მიწყობენ კარგი ადამიანები და გაგვაქვს ცხოვრება. სამსახური არც ჩემს ქმარს აქვს და არც მე, სანამ გავძლებთ ასე, არ ვიცი.
წელს გობრონიძეებმა საახალწლო ნობათი მიიღეს, რითაც დიდად გაიხარა ოჯახმა _ ნობათში კვების პროდუქტები იყო.
მათ სახლში ფუფუნების საგანს ვერ ნახავთ _ ერთი შავ-თეთრი ტელევიზორი შეიძინეს სოციალური დახმარების თანხით და ამის გამო ბავშვები, დროებით, სულ მშიერნი დარჩნენ: _ ძალიან უნდოდათ, რომ ტელევიზორი ეყიდათ. უარი ვერ ვუთხარი. მერე სანერვიულო გამიხდა, როგორ გამომეკვება შვილები. მაქვს სამედიცინო პოლისი, ჩემი ვაჟიშვილი საოპერაციოა _ მინდოდა მისთვის ოპერაციის გაკეთება, მაგრამ უფულობის გამო ვერ შევძელი. მაშინ პოლისი არ მქონდა. ვაპირებ, ახლა გავუკეთო ოპერაცია _ ვნახოთ რას მეტყვიან. ბუნებრივი აირი, რის ვაი-ვაგლახით შემოვიყვანეთ, ისიც კეთილი ადამიანების შემწეობით, თუმცა, ორი თვეა, გამორთული გვაქვს დავალიანების გამო. ამას  ჯარიმაც დაერთო და სულ ვეღარ გადავიხადე _ გახარჯული აირის საფასურზე მეტია საჯარიმო თანხა. სანამ დახმარებას არ ავიღებ, ვერ გადავიხდი. არადა, ვიცი,  ჯარიმა კიდევ მომემატება, _ გვითხრა ახალგაზრდა დედამ.