“პირველსაათიანი აქციის შემდეგ ეს ადამიანები პირველ კორპუსში შემოიჭრებიან” _ კვირიკაშვილი

თსუ-ს თვითმმართველობის პრეზიდენტის მოვალეობის შემსრულებელი ბახვა კვირიკაშვილი უნივერსიტეტის რექტორს, უსაფრთხოების სამსახურს და ყველა შესაბამის ორგანოს მოუწოდებს, უზრუნველყონ თვითმმართველობის არჩევნების მშვიდობიან გარემოში ჩატარება. კვირიკაშვილის განცხადებით, მას აქვს ინფორმაცია, რომ “აუდიტორია 115”-ის წევრები პირველ კორპუსში შეჭრას და მეორე და მესამე სართულების დაკავებას აპირებენ, სადაც ოთხი საარჩევნო უბანია განლაგებული:

”ჩვენ მოგვაწოდეს ინფორმაცია, რომ პირველსაათიანი აქციის შემდეგ ეს ადამიანები პირველ კორპუსში შემოიჭრებიან და მეორე და მესამე სართულს აიღებენ, სადაც ოთხი საარჩევნო უბანია განლაგებული. მათი მიზანია, არჩევნების ჩაშლა და პიკეტირების მოწყობა. მოვუწოდებთ უნივერსიტეტის რექტორს, ადმინისტრაციას, უნივერსიტეტის უსაფრთხოების სამსახურს და ყველა უფლებამოსილ ორგანოს, უზრუნველყონ არჩევნების მშვიდობიან გარემოში ჩატარება და არ დაუშვან ვანდალების კიდევ ერტხელ შემოჭრა”, _ განაცხადა ბახვა კვირიკაშვილმა.

შეგახსენებთ, რომ თბილისის სახელმწიფო უნივერსიტეტში თვითმმართველობის არჩევნები 10 საათზე დაიწყო. სტუდენტებმა უნივერსიტეტის 7 ფაკულტეტზე, რეგისტრირებული 174 კანდიდატიდან 140 დელეგატი უნდა აირჩიონ,

კენჭისყრის პროცესი 18:00 საათამდე გაგრძელდება. საუბნო საარჩევნო კომისიები კენჭისყრის შედეგებს დაითვლიან და არჩევნებიდან დაახლოებით 2 საათის განმავლობაში თბილისის სახელმწიფო უნივერსიტეტის სტუდენტური თვითმმართველობის ცენტრალური საარჩევნო კომისია არჩევნების შედეგებს გამოაცხადებს.

ამავე თემაზე: "ბრძოლას ვაგრძელებთ იქამდე, სანამ ჩვენი მოთხოვნები არ შესრულდება" _ "აუდიტორია 115"

თბილისის სახელმწიფო უნივერსიტეტში თვითმმართველობის არჩევნები მიმდინარეობს