რამდენიმე დღის წინ, ჩოხატაურის მუნიციპალიტეტის სამხატვრო სკოლის მოსწავლეებმა და პედაგოგებმა საქველმოქმედო გამოფენაში მიიღეს მონაწილეობა.
სკოლის დირექტორი მზია კვინტრაძე და დირექტორის მოადგილე სასწავლო დარგში ჯუმბერ უჯმაჯურიძე, 100 ნახატითა და ასზე მეტი ხელოვნების ნიმუშით ეწვივნენ ბერი ანდრიას სახელობის სარეაბილიტაციო სახლს.
გამოფენაზე წარმოდგენილი იყო ფერწერა, გრაფიკა, თექა, კერამიკა, მაკრამე.
ჩოხატაურელმა სტუმრებმა სარეაბილიტაციო სახლს გადასცეს 200 ლარის ღირებულების საჩუქარი.
"დიდი სიხარულით შეგვეგება ამ სახლის მასპინძელი _ დედა თინათინი, რომელმაც ჩვენთან საუბრის დროს აღნიშნა. რომ ბერი ანდრიას სახელობის სარეაბილიტაციო სახლში მყოფი 55 ბავშვიდან ნაწილი ქიმიოთერაპიას გადის. დედა თინათინი თავადაც მუშაობს ხალხური რეწვის ნიმუშებზე და რეალიზაციით შემოსული თანხები მთლიანად ხმარდება რეაბილიტაციის სახლს.
დედა თინათინმა მადლობა გადაგვიხადა სტუმრობისთვის, დაგვლოცა და შემდგომი წარმატებები გვისურვა", _ თქვა "გურია ნიუსთან" საუბრისას სამხატვრო სკოლის დირექტორმა მზია კვინტრაძემ.
ქეთევან კუკულავა
