ოზურგეთის მუნიციპალიტეტის სოფელ ჭანიეთის თემში, რომელშიც სოფელი ქაქუთიც შედის, ოცდახუთი წელია, ცენტრალური გზა ისეა დაზიანებული, რომ ორმოები ადამიანებს თუ მანქანებს ყოველ ფეხის ნაბიჯზე დაბრკოლებას უქმნის.
როგორც აქაურები ამბობენ, კომუნისტური მმართველობის შემდეგ, ამ გზის ორმული შეკეთებაც არ მომხდარა. კეთდებოდა მხოლოდ ის მონაკვეთი, რომელიც ბათუმის ცენტრალური ტრასის გადასახვევიდან სოფლის ცენტრამდე ნახევარი კილომეტრის მანძილს მოიცავს.
_ ესეც კეთდებოდა "ნაციონალური" მმართველობის დროს, მხოლოდ იმიტომ, რომ სოფლის ცენტრში ცხოვრობს ყოფილი პრეზიდენტის, მიხეილ სააკაშვილის ყოფილი მდივნის ცაცა ლომჯარიას ოჯახი. გზის ორმული შეკეთება ყოველ წელს, განსაკუთრებით ზაფხულში ხდებოდა. შემდეგ ორმულადაც არ შეკეთებულა, თუმცა, ერთხელ მოხრეშეს გარკვეული მონაკვეთები, მაგრამ ხრეში კი არა, ნახევარი ლოდები ეყარა, _ ამბობენ ჭანიეთელები.
აღსანიშნავია, რომ სამი წლის წინ, როცა ხელისუფლებამ გადაწყვიტა სოფლის გზის ის მონაკვეთი, რომელიც ძალიან დაზიანებულია და თითქმის, 900 მეტრი სიგრძისაა, გადაეხნა და მერე დაეტკეპნა, გზის გასწვრივ მცხოვრები რამდენიმე ოჯახი ამის წინააღმდეგი იყო. ამბობდნენ, რომ მტვერი შეაწუხებდათ და როცა გზის კაპიტალურად გაკეთების საშუალება იქნებოდა, მაშინ გაეკეთებინათ. გავიდა დრო და აღარც ასფალტირება, არც მოხვნა და დატკეპნა მოხერხდა.
_ 8 ოქტომბრის საპარლამენტო არჩევნების წინ, სოფელში იმგზავრა და საკუთარი თვალით ნახა გზის მდგომარეობა მაშინდელმა დეპუტატობის კანდიდატმა და ახლა უკვე დეპუტატმა არჩილ თალაკვაძემ. ის შეპირდა მოსახლეობას, რომ უგზოობის და ასევე, სხვა პრობლემები, რაც აწუხებთ აქაურებს, მოგვარდებოდა. იმედია, ამ დაპირებას ძალა ექნება, _ ამბობს მოსახლეობა.
ოზურგეთის მუნიციპალიტეტის 2017 წლის ბიუჯეტის საჯარო განხილვის დროს ითქვა, რომ მომავალ 2017 წელს მოხდება გზის პროექტირება, შემდეგ კი დაიწყება გაკეთება, თუმცა, კონკრეტული თარიღი არ დასახელებულა.
სოფელ ჭანიეთის მოსახლეობის წარმომადგენლები _ ჯუმბერ სურგულაძე, მარლენ ანთიძე, გიორგი ლომჯარია, ვლადიმერ ლომჯარია, ავთანდილ კალანდაძე, ბადრი კვირკველია, რამაზ კორტავა, ბახვა ღლონტი, სოსო ხინთიბიძე, სულიკო ზოიძე, ბესო ზოიძე და სხვები კონკრეტულ პასუხს ითხოვენ, როგორ და რა თანმიმდევრობით მოხდება გზის შეკეთება, რადგან 25 წელია, მხოლოდ დაპირება ესმით:
_ სოფლის ცენტრამდე ქალაქიდან ათ წუთში ამოსულ სასწრაფო დახმარების მანქანას, ამდენივე დრო სჭირდება ჩვენთან მოსასვლელად. ასეთი მდგომარეობა უნდა დასრულდეს, _ გვითხრეს მათ.
_ სოფლის მიკროავტობუსით იმგზავრა დეპუტატობის კანდიდატმა. ადრეულ წლებში მსგავსი რამ არ მომხდარა. გვიხარია, ამ ახალგაზრდა, პერსპექტიული კაცის აქტიურობა, მისი გამარჯვება. შეგვპირდა, რომ გზა გაკეთდებოდა. ვიცით, რომ ერთ დღეში არ დაიგება, მაგრამ დაზუსტებული პასუხი გვინდა, როდის და როგორ გაკეთდება. აღარც გვახსოვს, რამდენი წელია, რაც ამ გზაზე გავლა აღარ შეიძლება. დილაობით სამსახურში თუ სკოლაში ყველას აგვიანდება იმის გამო, რომ ავტობუსს ბევრი დრო ეკარგება ამ ორმოების გამო. რა ქნას მძღოლმა _ ყოველთვის გრაფიკს ხომ ვერ დაარღვევს? _ ამბობენ ქაქუთელები _ დალი ცერცვაძე და სოფო მარუქიანი.
ჩვენ მივმართეთ ოზურგეთის მუნიციპალიტეტის გამგებლის მოადგილეს ბადრი გობრონიძეს და ვთხოვეთ, დაესახელებინათ დრო, როდის და როგორი ფორმით შეკეთდება გზა სოფელ ჭანიეთში, რომელიც ბოლო 25 წელია, მუდმივად ფუჭდება და თითქმის, მთლიანად ორმოებად იქცა.
ბადრი გობრონიძის თქმით, მომავალ წელს აუცილებლად დაიწყება სოფელ ჭანიეთის გზის პროექტირება:
_ 2017 წელს აუცილებლად მოხდება სოფელ ჭანიეთის გზის პროექტირება, რომლის ხარჯიც უკვე გაწერილია ბიუჯეტში. ჩვენ ვიცით ამ გზის ავარიულობის შესახებ. ხოლო ასფალტირება დაიწყება 2018 წელს. რა შეეხება გზის შეკეთებას, 2017 წელს აუცილებლად მოხდება ამ გზის დახვნა, შემდეგ კი გაფხვიერება და დატკეპნა, რომ სანამ ასფალტი დაიგება, მანქანებმა ნორმალურად იმოძრაონ. რაც შეეხება ახლო მომავლის გეგმას, ანუ 2018 წელს ასფალტირებული გზის დაგებას, ეს უფრო იქეთ არ გადაიწევს და მოსახლეობას უნდა ჰქონდეს იმედი, რომ აუცილებლად გაკეთდება. გეტყვით იმასაც, რომ ეს არის გარდამავალი სამწლიანი პროექტი და ამ დროში ის მთლიანად დასრულდება. გასაგებია, რომ გზა ავარიულია და ხალხი სამართლიანად წუხს, თუმცა, ეს ჩვენც გვაწუხებს და გპირდებით, გაკეთდება შესაძლებლობის მაქსიმუმი, რომ უახლოეს მომავალში სოფელ ჭანიეთს საუკეთესო გზა ჰქონდეს, _ გვითხრა ბადრი გობრონიძემ.
