2016 წლის 9 თვეში საქართველოს პროკურატურამ სისხლისსამართლებრივი დევნა 12 348 პირის მიმართ (სრულწლოვნები და არასრულწლოვნები) დაიწყო, წინა წლის ანალოგიურ მაჩვენებელთან შედარებით 694 საქმით ნაკლებია, _ აღნიშნულის შესახებ მთავარი პროკურორის, ირაკლი შოთაძის ერთწლიანი მუშაობის ანგარიშშია აღნიშნული, რომელიც მან დღეს საპროკურორო საბჭოს წარუდგინა.
ანგარიშის მიხედვით, სისხლისსამართლებრივი დევნის დაწყების ყველაზე მაღალი მაჩვენებელი ფიქსირდება ქურდობის (177 მუხლი), ნარკოტიკული საშუალების ექიმის დანიშნულების გარეშე უკანონოდ მოხმარების (273-ე მუხლი); ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო დამზადება, წარმოება, შეძენა, შენახვა, გადაზიდვა ან გადაგზავნის (260-ე მუხლი), ცემისა (125-ე მუხლი) და ოჯახში ძალადობის (1261 მუხლი) დანაშაულებზე.
„2016 წლის მსგავსად, 2014-2015 წლებშიც სისხლისსამართლებრივი დევნის დაწყების ყველაზე მაღალი მაჩვენებელი ფიქსირდებოდა საქართველოს სსკ-ის 177-ე, 273-ე და 260-ე მუხლებით გათვალისწინებულ დანაშაულებზე. კერძოდ, 2014 წელს ბრალდებულთა 51.4%-ს და 2015 წელს ბრალდებულთა 38.5%-ს, სწორედ ზემოაღნიშნული მუხლებით გათვალისწინებული დანაშაულის ჩადენაში ედებოდათ ბრალი. ვინაიდან ნარკოტიკული დანაშაული წარმოადგენს ერთ-ერთ ყველაზე გავრცელებულ დანაშულს, 2016 წელს საქართველოს მთავარი პროკურატურის ინიციატივით, 28.11.2016 4 სასჯელაღსრულებისა და პრობაციის სამინისტროსთან თანამშრომლობით, განხორციელდა ნარკოტიკული საშუალების მოხმარების გამომწვევი მიზეზების კვლევა. საქართველოს 10 რეგიონში გამოკითხული იქნა საქართველოს სსკ-ის 273-ე მუხლით მსჯავრდებული 1163 პირი. აღნიშნული კვლევის ანგარიში შეიცავს მნიშვნელოვან ინფორმაციას ნარკოტიკული საშუალების მოხმარების გამომწვევი მიზეზების შესახებ და რეკომენდაციებს ამ მიმართულებით არსებულ საჭიროებებზე. კვლევის შედეგებს საქართველოს პროკურატურა გამოიყენებს ნარკოტიკული დანაშაულის წინააღმდეგ პრევენციული ღონისძიებების დაგეგმვისას. გარდა ამისა, იგეგმება კვლევის ანგარიშის გასაჯაროება. ვიმედოვნებთ, რომ კვლევის შედეგები დაეხმარება შესაბამის საჯარო სამსახურებს და არასამთავრობო ორგანიზაციებს სამომავლო პროექტებისა და ინიციატივების განხორციელებაში, რაც, თავის მხრივ, ხელს შეუწყობს ნარკოტიკული დანაშულის წინააღმდეგ ბრძოლას“, _ აღნიშნულია ანგარიშში.
საქართველოს მთავარმა პროკურორმა ირაკლი შოთაძემ საპროკურორო საბჭოს ერთი წლის ანგარიში წარუდგინა, რომელიც ძირითადად შეეხებოდა საქართველოს პროკურატურაში განხორციელებულ და მიმდინარე რეფორმებს, ასევე უწყების მიღწევებსა და განვითარების სტრატეგიას. მთავარმა პროკურორმა საპროკურორო საბჭოს წევრებს ინფორმაცია მიაწოდა პროკურატურის განვითარების ექვსწლიან სტრატეგიაზე და სამოქმედო გეგმაზე. ისაუბრა უწყების სტრატეგიულ მიმართულებებზე და ხაზი გაუსვა, რომ გადაწყვეტილების მიღების პროცესში პროკურორთა დამოუკიდებლობის უზრუნველყოფა და დაზარალებულთა ინტერესების დაცვა პროკურატურის ერთ-ერთ პრიორიტეტს წარმოადგენს. ირაკლი შოთაძემ ასევე საქართველოს პროკურატურის იმ პრიორიტეტულ მიმართულებებზე გაამახვილა ყურადღება, როგორიცაა ლიბერალური სისხლის სამართლის პოლიტიკა, არასრულწლოვანთა მართლმსაჯულება, ოჯახური დანაშაულის და ქალთა მიმართ ძალადობის წინააღმდეგ ბრძოლა, სქესობრივი კავშირი 16 წლის ასაკს მიუღწეველთან, რელიგიური, დისკრიმინაციული და სიძულვილით მოტივირებული დანაშაულის, ტრეფიკინგისა და ტერორიზმის წინააღმდეგ ბრძოლა, შეზღუდული შესაძლებლობების მქონე პირთა უფლებების დაცვა და ამ მიმართულებებით გატარებულ ღონისძიებებზე ისაუბრა. ასევე ანგარიშის წარდგენისას საპროკურორო საბჭოს წევრებმა მთავარი პროკურორისგან მოისმინეს პროკურატურის, როგორც საგამოძიებო უფლებამოსილების განმახორციელებელი ორგანოს შედეგები.
მთავარმა პროკურორმა საბჭოს წევრებს მიაწოდა ინფორმაცია მთავარი პროკურატურის მიერ უკანონოდ ჩამორთმეული ქონების დაბრუნებისა და დაზარალებულთა აღდგენილ უფლებებზე, მაღალი საზოგადოებრივი ინტერესის მქონე საქმეებზე სისხლის სამართლის დევნის დაწყებისა და განაჩენების მაჩვენებლებზე, გენერალური ინსპექციის მუშაობის შედეგებზე და დანაშაულის პრევენციის კუთხით გატარებულ ღონისძიებებზე.
მთავარმა პროკურორმა ყურადღება გაამახვილა იმ ნაბიჯებზე, რომელიც საქართველოს პროკურატურამ გადადგა გამოძიებისა და საპროკურორო საქმიანობის ხარისხის ამაღლების მიმართულებით. ასევე ისაუბრა პროკურორთა პროფესიული განვითარებისა და კვალიფიციური კადრების მოზიდვის აუცილებლობაზე. შეგახსენებთ, რომ ირაკლი შოთაძე მთავარ პროკურორად საქართველოს პარლამენტის მიერ ერთი წლის წინ იქნა არჩეული. მთავარი პროკურორი ვალდებულია ექვს თვეში ერთხელ წარადგინოს ანგარიში საპროკურორო საბჭოს წინაშე, რომელიც შეეხება დანაშაულთან ბრძოლის პოლიტიკას, სტატისტიკურ მაჩვენებლებს, სამართალწარმოების პროცესში ადამიანის უფლებებისა და თავისუფლებების დაცვას, მაღალი საზოგადოებრივი ინტერესის მქონე საკითხებს, პროკურატურის საქმიანობის პრიორიტეტულ მიმართულებებს, პროკურორთა პროფესიული გადამზადებისა და განვითარების პროგრამებს და არ შეიცავს კონკრეტული სისხლის სამართლის საქმის გამოძიებასთან, სასამართლოში მის განხილვასთან ან/და საქმის ცალკეულ გარემოებებთან დაკავშირებულ საკითხებს.
