საქართველოს ცენტრალური საარჩევნო კომისიის თავმჯდომარის, თამარ ჟვანიას ოჯახის საკუთრებაში ბინა, საცხოვრებელი სახლი, მიწის ნაკვეთი და ორი ავტომობილია. ამის შესახებ ჟვანიას ქონებრივ დეკლარაციაშია აღნიშნული, რომელიც მან 2016 წლის 28 ნოემბერს შეავსო.
დეკლარაციის თანახმად, თბილისში, ვაჟა- ფშაველას გამზირზე მდებარე 116.10 კვ.მ-ის ფართობის ბინა თამარ ჟვანიას 100%-იან საკუთრებაშია. ხოლო დუშეთში (ჭოპორტი) სოფელ ახატანში მდებარე 200.00 კვ.მ-ის ფართობის საცხოვრებელი სახლი და ამავე მისამართზე არსებული 600.00 კვ.მ-ის მიწის ნაკვეთი, მისი მეუღლის, მიხეილ ყაველაშვილის საკუთრებაა. გარდა ამისა, მიხეილ ყაველაშვილი ფლობს 2007 წელს გამოშვებულ მსუბუქ ავტომანქანა Lexus GX -ს, ხოლო თამარ ჟვანიას შვილის, გიორგი ყაველაშვილის საკუთრებაშია 2008 წელს გამოშვებული მსუბუქი ავტომანქანა Mercedes E 350.
რაც შეეხება ოჯახის შემოსავლებს, დეკლარაციის თანახმად, მიხეილ ყაველაშვილს სამართლიანი არჩევნებისა და დემოკრატიის საერთაშორისო საზოგადოება – ISFED-დან (ლოჯისტიკი, მომარაგება/ტრანსპორტირება) 21 994.75 ლარი აქვს მიღებული.
თამარ ჟვანიას შემოსავალი, გასულ წელს, სსიპ-საარჩევნო სისტემების განვითარების, რეფორმებისა და სწავლების ცენტრიდან (ლექტორი) 1260.00 ლარი ყოფილა, ხოლო საქართველოს ცენტრალური საარჩევნო კომისიიდან 115 683.23 ლარი ყოფილა, რაც წინა წელთან შედარებით 38 801 ლარით ნაკლებია. 2015 წელს შევსებულ დეკლარაციაში აღნიშნულია, რომ თამარ ჟვანიამ საქართველოს ცენტრალური საარჩევნო კომისიიდან 154 484.55 ლარის შემოსავალი მიიღო.
რაც შეეხება 2014 წელს შევსებულ დეკლარაციას, იქ აღნიშნულია, რომ საქართველოს ცენტრალური საარჩევნო კომისიის თავმჯდომარეობისთვის ჟვანიას 74 256.00 ლარი აქვს მიღებული, ხოლო გაეროს განვითარების პროგრამა – UNDP პროექტის ხელმძღვანელი/მენეჯერის პოსტიდან – 44 301.81 ლარი; რაც შეეხება ცესკოს თავმჯდომარეობამდე მის შემოსავლებს, 2013 წელს შევსებულ დეკლარაციაში აღნიშნულია, რომ თამარ ჟვანიას აშშ-ს ეროვნული დემოკრატიული ინსტიტუტი – NDI-ს, პროგრამის ხელმძღვანელი/მენეჯერის (ნიგერია) პოსტიდან 25 273.19 დოლარის შემოსავალი აქვს მიღებული, ხოლო გაეროს განვითარების პროგრამა – UNDP პროექტის ხელმძღვანელი/მენეჯერის პოსტიდან – 42 171.92 ლარი.
2016 წელს, დეკლარაციის შევსების მომენტში, თამარ ჟვანიას თი–ბი–სი ბანკის მიმდინარე ანგარიშზე 8.45 დოლარი ჰქონდა; პროკრედიტ ბანკის მიმდინარე ანგარიშზე 20.00 ლარი და 262.75 დოლარი; საქართველოს ბანკის სახელფასო ანგარიშზე 10985.32 ლარი და 399.98 ევრო; გარდა ამისა, თამარ ჟვანიას ნაღდი ფულის სახით 2500.00 ევრო ჰქონდა. მიხეილ ყაველაშვილის სახელფასო ანგარიშზე პროკრედიტ ბანკში კი, 3.25 ლარი ირიცხებოდა.
დეკლარაციის თანახმად, თამარ ჟვანიას სახელზე 16 000.00-დოლარიანი იპოთეკური სესხია, რომელიც მას 2013 წლის 10 აპრილს აუღია და ვადა 2018 წელს ეწურება. სესხის პროცენტის დასაფარად კი, გასულ წელს 4368.00 დოლარი გადაუხდია.
აღსანიშნავია, რომ გასულ წელს თამარ ჟვანიას ოჯახს ჯამში 13 675 ლარისა და 33 120 დოლარის გასავალი ჰქონდა.
მიხეილ ყაველაშვილის ხარჯებში დაფიქსირებულია, რომ ავტომანქანის დაზღვევა მას 1020.00 დოლარი დაუჯდა; მსუბუქი ავტომობილის გზავნილების ხარჯისთვის კი, 3500.00 დოლარი გადაიხადა.
თამარ ჟვანიამ კი, ოჯახის ჯანმრთელობის დაზღვევისთვის 1650.00 ლარი გადაიხადა; ასევე, დაფარა ოჯახის (4 პირი) საზაფხულო დასვენების ხარჯი 3200 ლარი;
გარდა ამისა, დეკლარაციაში აღნიშნულია, რომ თამარ ჟვანიას, შვილების, თამთა ყაველაშვილისა და გიორგი ყავლაშვილის სწავლის გადასახადი, ჯამში, 8825 ლარი დაუფარავს; შეუძენია ორი მსუბუქი ავტომანქანა, რომელშიც 9600.00 და 19000.00 დოლარი აქვს გადახდილი; თუმცა, ჟვანიას საკუთრებაში არცერთი ავტომობილი არ არის.
„გურია ნიუსმა“ აღნიშნულთან დაკავშირებით დამატებითი ინფორმაციის მისაღებად ცესკოს პრესსამსახურს მიმართა. როგორც პრესსამსახურში გვითხრეს, თამარ ჟვანიამ ავტომანქანები ოჯახის წევრებისთვის შეიძინა. კერძოდ, მეუღლისთვის და შვილისთვის. ცესკოს პრესსამსამსახურში განმარტეს, რომ ჟვანიამ ერთი ავტომობილი მეუღლისთვის 2014 წელს გამოიწერა, თუმცა იმავე წელს თანხა არ გადაუხდია.
„Lexus GX 2014 წლის ბოლოს არის შეძენილი, თუმცა, თანხა იმავე წელს არ გადაუხდიათ. ამიტომ მოხვდა ის როგორც 2014, ისე 2015 და 2016 წლების დეკლარაციებში. რაც შეეხება მეორე ავტომანქანას, Mercedes E 350-ს რომელიც თამარ ჟვანიას შვილის საკუთრებაა, ის გასულ წელს შეიძინეს“, _ გვითხრეს პრესსამსახურში.
აღსანიშნავია ისიც, რომ 2014 წელს, თამარ ჟვანიას დეკლარაცია 15 ნოემბერს აქვს შევსებული, დეკლარაციაში მისი მეუღლის საკუთრებაში ორი ავტომანქანა – 2003 წელს გამოშვებული Mercedes ML და 2007 წელს გამოშვებული Lexus GX-ია.
2015 წელს შევსებულ დეკლარაციაში კი აღნიშნულია, რომ მიხეილ ყაველაშვილმა ავტომობილი 9000.00 დოლარად გაყიდა. ამავე წელს, თამარ ჟვანიამ ავტომანქანის გაყიდვა/გასხვისებიდან 4000.00 დოლარის შემოსავალი მიიღო. აღნიშნული ავტომობილი (Mitsubishi Pajero IO, 1998 წ) ჟვანიას საკუთრებაში 2013 წელს შევსებულ დეკლარაციაში წერია.
