საერთაშორისო საზოგადოებამ აღიარა საქართველოს საპარლამენტო არჩევნები, როგორც თავისუფალი და სამართლიანი, რაც ადასტურებს თქვენს პროგრესს რეფორმების გახორციელების გზაზე, _ ამის შესახებ ნატო-ს გენერალურმა მდივანმა იენს სტოლტენბერგმა საქართველოს პრემიერ-მინისტრთან შეხვედრის შემდეგ გამართულ ერთობლივ პრესკონფერენციაზე განაცხადა.
მან გიორგი კვირიკაშვილს საპარლამენტო არჩევნების ჩატარება და პრემიერ-მინისტრის თანამდებობაზე ხელახლა დანიშვნა მიულოცა. „ნატო მომავალშიც დაგიჭერთ მხარს რეფორმების განხორციელების პროცესში. ჩვენ მომავალშიც უზრუნველვყოფთ საქართველოს პოლიტიკურ და პრაქტიკულ მხარდაჭერას“, – აღნიშნა იენს სტოლტენბერგმა და ხაზი გაუსვა, რომ გიორგი კვირიკაშვილის ვიზიტი კიდევ ერთხელ ადასტურებს იმ პარტნიორობის სიმტკიცეს, რომელიც ნატო-სა და საქართველოს შორის წლების განმავლობაში ჩამოყალიბდა.
ნატო-ს გენერალური მდივნის თქმით, შეხვედრაზე პარტნიორობის განმტკიცების და შემდგომი გაღრმავების გზებზე, მათ შორის, შავი ზღვის უსაფრთხოების უზრუნველყოფის საკითზე იმსჯელეს.
„როგორც უკვე არაერთხელ განვაცხადე, საქართველოს აქვს ყველა პრაქტიკული ინსტრუმენტი, რათა გახდეს ნატოს წევრი. ჩვენ მომავალშიც დაგიჭერთ მხარს თქვენი მისწრაფებების ხორცშესხმაში და ნატო-სთან კავშირების განმტკიცებაში. გარდა ამისა, გავაგრძელებთ თანამშრომლობას საქართველოსთან შავი ზღვის რეგიონში არსებულ გამოწვევებთან საბრძოლველად. ჩვენ შევაფასეთ შავი ზღვის რეგიონში უსაფრთხოებასთან დაკავშირებული მდგომარეობა. რასაკვირველია, საქართველო, როგორც პატარა სახელმწიფო შავიზღვისპირეთში, ერთ-ერთია იმ ქვეყნებს შორის, ვისთანაც თანამშრომლობა ძალიან მნიშვნელოვანია ნატო-სთვის, რადგანაც შავი ზღვის რეგიონი სტრატეგიულად მნიშვნელოვანია ალიანსისთვის, ხოლო პარტნიორობა საქართველოსთან მისი მნიშვნელოვანი ნაწილია“, _ განაცხადა იენს სტოლტენბერგმა.
