საქართველოს პრემიერ-მინისტრი გიორგი კვირიკაშვილი თელავის საბავშვო ბაღების სისტემაში კვების რაციონთან დაკავშირებულ საკითხზე გავრცელებულ ინფორმაციას გამოეხმაურა.
როგორც პრემიერმა აღნიშნა, გავრცელდა ინფრომაცია, რომ რაციონი გადაიხედა და რაციონიდან ამოღებულია მნიშვნელოვანი საკვები.
„ეს არის ალბათ ადგილობრივ მუნიციპალიტეტის საქმე. მაგრამ მინდა, ჯანდაცვის და განათლების მინისტრებს ვთხოვო, რომ ჩაერიოთ ამ საკითხში. მინდა, განვაცხადო სრული სერიოზულობით – არ ვიცი, თუ ასეთი რამ რეალობაა, რომელ ჩინოვნიკს მოუვიდა თავში ასეთი გადაწყვეტილების მიღება. თუ ასეთი ჩინოვნიკი ბუნებაში არსებობს, მე მინდა, რომ ის ხვალ აღარ იყოს იმ თანამდეობაზე, სადაც ეს გადაწყვეტილება მიიღო. თუ ვინმემ ადმინისტრაციული ხარჯების ოპტიმიზაცია გაიგო ისე, რომ საბავშვო ბაღებში ბავშვებს რაციონი უნდა შეუმციროთ, ეს არის დანაშაულებრივი გადაწყვეტილება“,-განაცხადა გიორგი კვირიკაშვილმა.
მისივე თქმით, ადმინისტრაციული ხარჯების შემცირების უამრავი რესურსი არსებობს.
„არ არის აუცილებელი, მეათეხარისხოვან კონფერენციებზე ნახევარი სამინისტრების დასწერება. სამწუხაროდ, უნდა ვთქვა, რომ არის შემთხვევები. კიდევ ბევრი ხარჯი, რომელიც შეიძლება ყველანაირი მტკივნეული გადაწყვეტილების გარეშე შემცირდეს და სხვათაშორის იმის გარეშეც, რომ ჩვენ პროპორციულად 10% ადამიანების შევამციროთ. რა თქმა უნდა, ზოგიერთ ნაწილში მოგვიწევს შტატების ოპზიტიმიზაციაც იქ, სადაც ფუნქციონალურ რეფორმებთან გვაქვს საქმე. ამის გარეშე შეუძლებელია, მაგრამ კიდევ ერთხელ ვამბობ, თუ ვინმე შეეხო ბავშვების რაციონს, მიიღეთ ყველაზე მკაცრი გადაწყვეტილება, რადგან ეს არის აბსოლუტურად მიუღებელი გააწყვეტილება. ჩვენ არაფერი სამაგისო არ გვჭირს, გვაქვს საკმარისი რეზერვი, რომ დავაფინანსოთ ძალიან გაზრდილი მოთხოვნები, რაც გამომდინარეობს ჩვენი განვითარების ამბიციური გაგმებიდან და არავითარ შემთხვევაში ბავშვების კვების რაციონის ხარჯზე. კიდევ ერთხელ ვამბობ, რომ შეიძლება, ეს არ არის ინფორმაცია, რომელიც სიმართლეს შეესაბამება, მაგრამ ვინაიდან ეს ინფორმაცია მედიაში არის გასული უკვე, ვალდებული ვარ, საჯაროდ გავაკეთო რეაგირება ამ საკითხზე”, – აღნიშნა გიორგი კვირიკაშვილმა.
