წელიწადნახევრის წინ იგი მარიხუანას მოხმარებისა და დიდი რაოდენობით შენახვის გამო დააკავეს ლანჩხუთის პოლიციის სამმართველოს თანამშრომლებმა. ხვიჩა სვანიძე აღიარებს, რომ მარიხუანას წლების წინ მართლაც მოიხმარდა, მაგრამ დიდი რაოდენობით ნარკოტიკი სახლში არასოდეს შეუნახია.
“კარგად ვიცი, რომ მარიხუანას მოწევა კანონსაწინააღმდეგო და დასჯადი ქმედებაა, მაგრამ ამისთვის სხვებს მხოლოდ 500 ლარით აჯარიმებენ. ეტყობა, “ნაციონალური ინტერესები” გადავკვეთე და ჩემით ამიტომ დაინტერესდა პოლიცია. ნიგვზიანის ბაღის მშენებლობაზე ვმუშაობდი დღეში ათ ლარად, მაგრამ მშენებლობის დამთავრების შემდეგ ხელფასი არ მომცეს. ამ მშენებლობაზე მომუშავეთა დიდ ნაწილს არ მისცეს ხელფასები. ამის გამო დავუპირისპირდი ნიგვზიანის გამგებელს. “ნაციონალური მოძრაობის” აქტივისტი ვიყავი და ვთქვი, მე რომ ასე მექცევით, სხვას რაღას უზამთ,-მეთქი. ამის შემდეგ დაიწყო დაუსრულებელი პრობლემები. ერთ დღეს ლანჩხუთის პოლიციის თანამშრომლებმა ჩემს სახლში, კარადაში 5,7 გრამი მარიხუანა “აღმოაჩინეს”. ყველამ იცის, რომ მე ნარკოტიკის გამყიდველი არ ვარ. ვიღაცას ჭირდებოდა ჩემი გაჩუმება თუ შეშინება. სხვებთან თუ 500-ლარიან ჯარიმას ჯერდებიან მსგავს შემთხვევაში, მე 4000 ლარამდე გადავიხადე და 5-წლიანი პირობითი სასჯელიც შემიფარდეს.
_ როგორ ფიქრობთ, რატომ მოგექცნენ ასე მკაცრად, ვის ინტერესებში შედიოდა ეს?
_ ძალიან მაწუხებდნენ, ზეწოლას ახდენდნენ ჩემზე, რომ მაგათი ინფორმატორი ვყოფილიყავი, მთავაზობდნენ (იგულისხმება ლანჩხუთის პოლიცია), რომ ინფორმაციები მიმეწოდებინა სოფელში არსებულ მდგომარეობაზე, მათ მომხრეებსა თუ მოწინააღმდეგეებზე. მაშინ დიმიტრი ბაკაშვილი იყო ლანჩხუთის პოლიციის უფროსი. მთავაზობდა, იმეგობრეთ ჩვენთან და სანამ მე აქ ვმუშაობ, ვერავინ შეგეხებაო. მათ მოთხოვნას დავთანხმდი, მაგრამ რეალურად არაფერს ვაკეთებდი, არ ვთანამშრომლობდი მათთან და, ალბათ, ამან გამოიწვია პოლიციის გაღიზიანება.
_ თქვენ ამბობთ, რომ მუსიკოსი ხართ, მაგრამ ლანჩხუთის ოფიციოზი არ გაძლევთ კონცერტების გაკეთების საშუალებას. კონკრეტულად ვინ გიპირისპირდებათ?
_ კლუბური მუსიკა ჩვენთან ნარკოტიკებთანაა ასოცირებული და ამიტომ სახელმწიფო არ სწყალობს. 2 წლის წინ, კონცერტი გავაკეთეთ ლანჩხუთის გამგეობის წინ. ორგანიზატორი იყო ლანჩხუთის მუნიციპალიტეტის ახალგაზრდულ საქმეთა განყოფილება და მისი ხელმძღვანელი ალექსანდრე იმნაიშვილი. როცა მუსიკოსისგან დადებითი ენერგია მოდის, ხალხი გრძნობს ამას და თვითონაც იხსნება. ეტყობა, ვიღაცეები გაღიზიანდნენ, მოვიდნენ და გამითიშეს მუსიკა. მაშინ გავმწარდი და პირველად გამოვთქვი პროტესტი. ვთქვი, რამოდენიმე თვე გაქვთ დარჩენილი,-მეთქი _ “ნაციონალური მოძრაობა” ვიგულისხმე. ამის შემდეგ მთვრალი პოლიციელი მომადგა (ვინაობა დღესაც არ ვიცი) და საქმის გარჩევა დამიწყო, უცენზურო გამოთქმებს არ იშურებდა. მისმა თანამშრომლებმა ძლივს დააწყნარეს. ვინ მოაგზავნა ან რა უნდოდა, დღესაც არ ვიცი. ხალხმა მოითხოვა კონცერტის გაგრძელება, მაგრამ არ გაგვაგრძელებინეს. აპარატურა მოხსნეს და წაიღეს. ხმამაღლა ვამბობ, რომ ლანჩხუთის კულტურის სახლის დირექტორი სოფიკო ჭელიძე წინააღმდეგია, რომ კულტურის სახლში ჩემი კონცერტი ჩატარდეს. ეტყობა, მას ვიღაცა უბრძანებს, რომ ამის საშუალება არ მომცეს. არც ჰონორარი გადამიხადეს იმ კონცერტიდან, ჩემმა ძმის შვილმა მიზერული თანხა მოითხოვა _ 100 ლარი და დიდი წვალების შემდეგ იმნაიშვილმა 80 ლარი გაუგზავნა, თან შეუთვალა 20 პროცენტი საშემოსავლო დაგექვითაო. სად ხდება, რომ დიჯეის საშემოსავლოს უქვითავდნენ?
იმიტომ მიპირისპირდებიან, რომ რაღაცეებით დავინტერესდი _ ჩვენთან, სოფელში გზა კეთდება, როგორც ამბობენ, ნახევარი მილიონი ლარია გადმორიცხული. 2 მილიონ ლარზე მეტია სკოლაზე დახარჯული ბოლო 10 წლის განმავლობაში, სკოლა კი ავარიულია და არც ღობე აქვს. ხუთზე მეტი გრანტია მოსული სტადიონის გასაკეთებლად, სტადიონი კი არ ვარგა. დაინტერესდეს ვინმე, სად მიდის ეს ფული?
ნიგვზიანის გამგებელმა ირაკლი გუჯაბიძემ მითხრა, რომ თუ “გლობალ ტვ”-ის ანტენას დავიდგამდი, პრობლემები შემექმნებოდა. რაღაც შავ სიაზე მელაპარაკებოდა. ესენი პოლიციასთან ერთად ადგენენ შავ სიებს და მასში არასასურველი ხალხი შეჰყავთ. სხვათაშორის, პოლიციაში მითხრეს, რომ ჩემზე ინფორმაცია სწორედ გამგებლისგან შევიდა. ახლა მპირდებიან, რომ მომიხსნიან პირობითს, თუ არჩევნებზე მათ დავეხმარები.
_ ვისგან იყო ასეთი შემოთავაზება და კონკრეტულად რისი გაკეთება დაგევალათ?
_ არაოფიციალურად შემომთავაზეს პოლიციიდან. ნაციონალების აქტივისტთა სიაშიც ჩამწერეს. შემომითვალეს, რომ საარჩევნოდ ხმების სანაცვლოდ, პირობით სასჯელს გამიუქმებდნენ.
ჩვენ დავუკავშირდით ნიგვზიანის რწმუნებულს ირაკლი გუჯაბიძეს და ხვიჩა სვანიძის ბრალდებებთან დაკავშირებით კომენტარი ვთხოვეთ. ირაკლი გუჯაბიძემ ჩვენთან საუბრისას განაცხადა: “ეს არის აბსურდი, აბსოლუტური სიცრუე. არასოდეს მითქვამს მისთვის, რომ ანტენა არ დაედგა. პოლიციაში ინფორმაციის გაგზავნაზე ხომ ლაპარაკიც ზედმეტია. ასეთი რაღაც თქვენგან მესმის პირველად.”
ხვიჩა სვანიძის თქმით, მიუხედავად იმისა, რომ პირობით მსჯავრს იხდის, არაფრის არ ეშინია და მზადაა, თუ საჭირო გახდება, მისი მისამართით დასმულ ყველა უხერხულ კითხვას უპასუხოს.
