_ 2012 წლის ივლისის დასაწყისიდან შაუმიანის ზონაზე ვკურირებ კოალიცია “ქართული ოცნების” კარდაკარის პროგრამას და აქტიურად ვარ ჩართული ზემოაღნიშნულ საქმიანობაში.
მყავს მეუღლე, ელენე შოშიტაშვილი, რომელიც მასწავლებლად მუშაობს შაუმიანის #2 საჯარო სკოლაში და 5 შვილი.
ჩემი მეუღლე ასევე ჩართულია კარდაკარის პროგრამაში, არის ე.წ. რეგისტრატორი და ამოწმებს საარჩევნო სიებს.
როგორც კი ზემოაღნიშნულის შესახებ ცნობილი გახდა ადგილობრივი მამასახლისებისთვის, მათი მხრიდან ჩემი მისამართით განხორციელდა მუქარა და კონკრეტული ზეწოლა, რაც გამოიხატებოდა შემდეგში:
ჩემს სახლთან მანქანით მოვიდნენ ბატონები: თემურ ჭულუხაძე და გია (გივი) კობალაძე, რომლებმაც ჩამისვეს მანქანაში, დამიწყეს ყვირილი, მუქარა პირადად ჩემი და ოჯახის წევრების მისამართით.
აქვე მოგახსენებთ, რომ სოფელ ახკულის სკოლის დირექტორის _ ბატონ თორნიკე ტყეშელაშვილის მეუღლე, ქლაბტონი გიული შავაძე, ასევე ჩართულია კოალიცია “ქართული ოცნების” კარდაკარის პროგრამაში _ რეგისტრატორად და აზუსტებს საარჩევნო სიებს. მას შემდეგ რაც მამასახლისებმა ქალბატონ შავაძეზეც განახორციელეს მუქარა, მომმართეს დახმარებისთვის, რაც გავახმაურე და ვაცნობე “ქართული ოცნების” მარნეულის შტაბს,” _ აღნიშნავს ჭონიაშვილი.
მისივე განცხადებით, 6 ივლისს ტელეკომპანია “მაესტროს” ჟურნალისტებს კომენტარს აძლევდა ზემოაღნიშნული ფაქტების შესახებ. მას შემდეგ, რაც დაინახეს ჟურნალისტებთან, კოდის დევნილთა ჩასახლებიდან გამოიძახეს ბატონი ლერი ქრისტესიაშვილი, რომელიც “ზონდერის” სახელითაა ცნობილი.
_ ეს ადამიანი მივიდა ჩემს სახლში, სადაც იმ დროს ბავშვებთან ერთად იმყოფებოდა ჩემი მეუღლე და ითხოვდა მიეცათ ჩემი მობილურის ნომერი. ამის შემდეგ, ზემოაღნიშნულმა პიროვნებამ არ დატოვა სახლის მიმდებარე ტერიტორია, გარკვეული დროის განმავლობაში იგი ტრიალებდა ეზოში.
როგორც ზემოთ აღვნიშნე ბატონი ქრისტესიაშვილი ცნობილია თავისი დაუნდობლობით, სისასტიკით და ადვილი მისახვედრი იყო, თუ რა მიზეზით შეიძლებოდა დაინტერესებულიყო იგი ჩემი პიროვნებით.
ყოველივე ზემოაღნიშნულიდან გამომდინარე, როგორც საქართველოს მთავარ პროკურორს, ასევე საქართველოს შინაგან საქმეთა მინისტრს გთხოვთ, დაიწყოთ აღნიშნულ ფაქტთან დაკავშირებით გამოძიება, მიმართოთ კანონით გათვალისწინებულ ყველა ზომას, რათა გამოავლინოთ სისხლის სამართლებრივ პასუხისგებაში მისაცემი პირები, რომ მათ კანონის მთელი სიმკაცრით აგონ პასუხი. _ ამბობს ზურაბ ჭონიაშვილი.
“გურია ნიუსი” “ქართული ოცნების” ქვემო ქართლის იურიდიული სამსახურის უფროსს თედო კობახიძის დაუკავშირდა. ის ჩვენთან სატელეფონო საუბრისას ამბობს, რომ ხშირად ხდება “ქართული ოცნების” წევრებსა და აქტივისტებზე ზეწოლა. ისინი ყოველთვის მიმართავენ სამართალდამცავებს, რათა რეაგირების გარეშე არ დარჩეს არცერთი მსგავსი ფაქტი:
_ ეს ადამიანები ამბობენ, რომ ზეწოლები ხორციელდება საკრებულოს წევრებისგან, გამგეობის თანამშრომლებიდან, ასევე ე.წ. მამასახლისგებისგან. ჩვენი მხარდამჭერები, ჩვენი წევრები ჩივიან, რომ მათზე ხორციელდება ზეწოლები “ნაციონალური მოძრაობის” ფრთის მხრიდანაც. როდესაც ეს ადამიანები მოწმის სტატუსით მიდიან პოლიციაში, იქაც ხორციელდება ზეწოლა პოლიციის უფროსის მხრიდან, რომ გაიტანონ საჩივრები. მთელი სახელმწიფო მანქანა რეალურად ჩართულია იმაში, რომ ჩვენ აქტივისტებზე განახორციელონ ზეწოლა და შეაწყვეტონონ პარტიის მხარდამჭერი სააგიტაციო თუ სხვა საქმიანობა, რომელიც დავალებული აქვთ “ქართული ოცნებიდან”. მე, ვისთანაც მქონია ურთიერთობა, არავის უკან არ დაუხევია და მათ ბოლომდე მიჰყავთ საქმე _ უჩივიათ პოლიციის უფროსებს, გამგებლებს, საკრებულოს თავმჯდომარეებს, _ განაცხადა თედო კობახიძემ “გურია ნიუსთან საუბრისას.
_ არ მინდა ისეთი კომენტარი გავაკეთო, ისინი თავის პიარზე მუშაობენ და მსგავსი რამე მარნეულში არ დაფიქსირებულა. _ გვითხრა მარნეულის გამგეობის საქმის წარმოებისა და საზოგადოებასთან ურთიერთობის სამსახურის სპეციალისტმა ნესტან გუგუსიანმა.
