“სატელევიზიო ანტენების უსასყიდლოდ გადაცემით ამომრჩეველთა მოსყიდვის ფაქტებზე, 2012 წლის 20 ივნისს დაწყებული გამოძიების ფარგლებში, დადგენილ იქნა, რომ პოლიტიკური ორგანიზაცია “ქართულ ოცნებასთან” დაკავშირებული კომპანია „ელიტა ბურჯის” ხელმძღვანელ პირთა დავალებით, კომპანია „მაესტრომ” საქართველოში შემოიტანა დიდი ოდენობით ანტენები.”
“გურია ნიუსმა” პროკურატურის ბრალდებასთან დაკავშირებით კომენტარი მამუკა ღლონტს თხოვა.
_ ბატონო მამუკა, რამდენად ჯდება გონიერების ფარგლებში პროკურატურის ეს ქმედება?
_ პროკურატურის ეს ქმედება და ბრალდება არის აბსოლუტური აბსურდი. მითუმეტეს, პროკურატურა აცხადებს, რომ რაღაც დამამტკიცებელი საბუთები აქვთ. კარგი იქნებოდა, თუ დადებენ ამ საბუთებს, ვნახოთ ერთი, რა უნდათ, რას გვერჩიან.
_ რას აპირებს ტელეკომპანია “მაესტროს” ხელმძღვანელობა?
_ ჩვენ გავივლით საქართველოს სასამართლოებში ყველა ინსტანციას და შემდეგ მივმართავთ ევროპის სასამართლოებს. ეჭვიც არ გვეპარება იმაში, რომ საქართველოში ამ საქმეს წავაგებთ და პირველივე საქმეს მოვიგებთ ევროპაში.
_ როგორ ფიქრობთ, არის ეს მედიაზე ზეწოლის მცდელობა?
_ აუცილებლად. შეგახსენებთ, რომ “მაესტრო” არის საკაბელო ტელევიზია. თბილისის საზღვრებს გარეთ ჩვენ ვრცელდებით მხოლოდ თეფშის მეშვეობით. შესაბამისად, ის რომ საკაბელო ტელევიზიას სურვილი აქვს საკაბელო არეალის გაფართოების, ეს საოცარი ამბავია? საქართველოს პროკურატურა და ხელისუფლება თუ ამაში პრობლემას ხედავს, ამ ხელისუფლებას აქვს… არ ვიცი… რაღაც აფრიკულ – ირანული სინდრომი.
_ მთავრობა და საპარლამენტო უმრავლესობა დათანხმდა არასამთავრობო ორგანიზაციების წინადადებას წინასაარჩენოდ “მასთ ქერთან” დაკავშირებით. სანამ წინასაარჩევნოდ “მასთ ქერი” გავრცელდება მოსახლეობაზე, “მაესტროს” უარი უთხრეს თეფშებით ინფორმაციის გავრცელებაზე. თქვენი აზრით, “მასთ ქერთან” დაკავშირებით იგივე პრობლემა შეიქმნება?
_ რა თქმა უნდა. უკვე დაწყებულია. ჩვენ როგორც ვიცით, ზესტაფონის ერთ-ერთი საკაბელო დაიკეტა გაკოტრების მოტივით. ჯერ კიდევ საკითხავია, როგორ ჩაივლის ეს “მასთ ქერი”. გარდა ამისა, შეგახსენებთ რომ საკაბელო ტელევიზიები არის მხოლოდ მსხვილ რაიონულ ცენტრებსა და ქალაქებში და არ არის სოფლებში. სოფლის მოსახლეობა ამომრჩეველი არ არის?! ჩვენი ქვეყნის მოქალაქე არ არის?!
