რა ქონებას ფლობს ლევან კობიაშვილი საქართველოში და საზღვარგარეთ

5 ბინა, 3 საცხოვრებელი სახლი, 3 მიწის ნაკვეთი, ორი ავტომობილი და რამდენიმე ათასი  საბანკო ანგარიშებზე, _ ეს ყოფილი ფეხბურთელის, ამჟამად საქართველოს პარლამენტის დეპუტატის, ლევან კობიაშვილის ოჯახის ქონებაა.

როგორც კობიაშვილის ქონებრივ დეკლარაციაშია აღნიშნული, ის ფლობს ბინებს: თბილისში, შიო-მღვიმელის ქუჩაზე (ფართობი 281.00 კვ.მ); თბილისში, აბაშიძის ქუჩაზე (ფართობი 180.00 კვ.მ); ამავე ქუჩაზე მდებარე მეორე ბინას, რომლის ფართობიც 110.00 კვ.მ-ია და ბათუმში, მდებარე 70.00 კვ.მ-ის ფართობის ბინას.

თბილისში, კოსტავას მე-2 ჩიხში, მდებარე 150.00 კვ.მ-ის ფართობის კიდევ ერთი ბინა, მისი მეუღლე თამარ წულეისკირის საკუთრებაშია. გარდა ამისა, ლევან კობიაშვილის საკუთრებაშია გერმანიაში, დუსელდორფში, არსებული 425.00 კვ.მ-ის ფართობის საცხოვრებელი სახლი და 790.00 კვ.მ-ის ფართობის მიწის ნაკვეთი; ასევე, ბერლინში, მდებარე 550.00 კვ.მ-ის ფართობის საცხოვრებელი სახლი. აღსანიშნავია, რომ საზღვარგარეთ არსებული ქონების 50%-იანი წილი კობიაშვილის მეუღლის საკუთრებაშია.

ლევან კობიაშვილის 100%-იან საკუთრებაშია 450.00 კვ.მის ფართობის საცხოვრებელი სახლი წყნეთში და 2100.00 კვ.მ მიწის ნაკვეთი. ასევე, 6500.00 კვ.მ-ის ფართობის მიწის ნაკვეთი  ბაკურიანში.

გარდა ამისა, ლევან კობიაშვილი ფლობს მსუბუქ ავტომანქანა Mercedes benz-ს რომლის გამოშვების თარიღიც დეკლარაციაში მითითებული არ არის. მისი მეუღლის საკუთრებაში კი არის ავტომანქანა Audi.

რაც შეეხება ოჯახის ფინანსურ მდგომარეობას, როგორც დეკლარაციიდან ირკვევა, მათი შემოსავალი გასულ წელს მხოლოდ ლევან კობიაშვილის ხელფასი – 63334.00 ლარი ყოფილა, რაც მან საქართველოს ფეხბურთის ფედერაციის პრეზიდენტობისთვის მიიღო.

დეკლარაციის შევსების მომენტში კი, ლევან კობიაშვილის ვი–თი–ბი ბანკის საკრედიტო ანგარიშზე  50000.00 ევრო (კრედიტი(+) და ამავე ბანკის სახელფასო ანგარიშზე 6100.00 ლარი იყო.

ხოლო თამარ წულეისკირს საქართველოს ბანკის ანაბარზე 20000.00 დოლარი  (დებეტი(-) ჰქონდა, ამავე ბანკის მიმდინარე ანგარიშზე კი, 13400.00 დოლარი (დებეტი(-).

გარდა ამისა, ლევან კობიაშვილს ნაღდი ფულის სახით 8500.00 ლარი და 20 000 დოლარი ჰქონდა; თამარ წულეისკირს –  25000.00  დოლარი და 10000.00 ევრო.

რაც შეეხება ოჯახის გასავლებს, სალომე კობიაშვილი სწავლის გადასახადისთვის  8000.00 დოლარი, ხოლო ნიკა კობიაშვილის სწავლისთვის 35000.00 ევრო გაუციათ.

აქვე უნდა აღინიშნოს, რომ ლევან კობიაშვილს ქონებრივ დეკლარაციაში არ უწერია პარტია "ქართული ოცნება _დემოკრატიული საქართველოსთვის" შეწირული 55 000 ლარი. აუდიტის სამსახურის ვებ-გვერდზე გამოქვეყნებული ოფიციალური ინფორმაციიდან კი ირკვევა, რომ მან გასულ წელს პარტიას სოლიდური შემოწირულობა გაუკეთა. 

ცნობისთვის, ლევან კობიაშვილი საქართველოს პარლამენტში საარჩევნო ბლოკ "ქართული ოცნება – დემოკრატიული საქართველო"-ს წარმოადგენს.

როგორც პარლამენტის ვებ-გვერდზე განთავსებული ინფორმაციიდან  ირკვევა, მას განათლება საქართველოს ტექნიკურ უნივერსიტეტში აქვს მიღებული და ავტომობილებისა და საავტომობილო მეურნეობის სპეციალისტია.

1994 წლებში  იყო საფეხბურთო კლუბი „გორდა“-ს საქართველოს 19 წლამდე ასაკის ეროვნული ნაკრების ფეხბურთელი;

საფეხბურთო კლუბი "დინამო თბილისი“, საქართველოს 21-წლამდე ასაკის ეროვნული ნაკრები, ფეხბურთელი (1995 – 1998);

საქართველოს ეროვნული ნაკრები, საფეხბურთო კლუბი „ალანია“, ფეხბურთელი (1996 – 2001);

საფეხბურთო კლუბი „ფრაინბურგი“, ფეხბურთელი (1998 – 2003);

საფეხბურთო კლუბი „შალკე“, ფეხბურთელი (2003 – 2010);

საფეხბურთო კლუბი „ჰერტა“, ფეხბურთელი (2010 – 2014);

ბერლინის სკ „ჰერტას“ აკადემია, მენეჯერი (2014 – );

საქართველოს ფეხბურთის ფედერაცია, პრეზიდენტი (2015 – );

ააიპ ფეხბურთის განვითარების ფონდი, გამგეობის წევრი (2016 – ).