ბოლო თვეების განმავლობაში, ნატანები-ურეკის დამაკავშირებელი 35-კილომეტრიანი საავტომობილო გზა მნიშვნელოვნად დაზიანდა და სავალალო მდგომარეობაშია. ასფალტის საფარი ორმოებით ისეა სავსე, რომ ავტომობილებს თავისუფლად გადაადგილება უჭირთ, გზის აღნიშნულ მონაკვეთზე ხშირად ხდება ავტოსაგზაო შემთხვევებიც. გზის გაფუჭების მიზეზი კი ქვა-ღორღით დატვირთული 30-ტონიანი მანქანების მოძრაობაა.
როგორც ადგილობრივები "გურია ნიუსთან" ამბობენ, სატვირთო მანქანები მთელი ღამის განმავლობაში მოძრაობენ, რის გამოც საცხოვრებელ სახლებს ბზარები გაუჩნდა.
რამდენიმე ხნის წინ სოფელ მერიის მოსახლეობამ აქციის მოწყობა გადაწყვიტა, თუმცა, აქციის მოწყობამდე მერიაში გზის რამდენიმე მონაკვეთზე ასფალტის საფარი "ჩააკერეს".
მოსახლეობა შეშფოთებულია და წუხილს გამოთქვამს. ისინი ხმამაღლა აპროტესტებენ პრობლემას და ამბობენ, რომ თუ სახელმწიფო დროულად არ მოაგვარებს და არ შეაჩერებს სატვირთო ავტომანქანების გადაადგილების პროცესს, გადაკეტავენ ცენტრალურ გზას, მოაწყობენ აქციებს, რაც მნიშვნელოვნად უარყოფითად აისახება ხელისუფლებაზე.
ბადრი დეკანოიძე: "ხალხი აჯანყდება მალე. სახლები დაბზარულია, ჩემი სახლი რომ ნახოთ _ პატარა "კუხნა" მაქვს, გახსნილია შუაზე. მანქანები ისეთი სიჩქარით დადიან, ზანზარებენ სახლები, ყველაფერი მტვრითაა სავსე".
ბეჟან ვასაძე: "დღე და ღამე მუშაობენ. ყრიან გზაზე ქვებს, არ ერიდებიან არავის, არაფერს. კატასტროფული მდგომარეობაა".
რეზო გოგიტაური: "სახლი გამებზარა, მეშლება უკვე, მივედი ოზურგეთის გამგეობაში, მოვითხოვე კომპენსაცია და რის კომპენსაციას ითხოვთო, აქეთ მომდეს შარი. ხალხი ყრუ ჰგონიათ ამათ. გადაკეტო უნდა გზა, მოაწყო აქციები და მაგასაც გავაკეთებთ. ათი დღის წინ ვერ აუარეს გვერდი ერთმანეთს დიდმა მანქანებმა და ბავშვს დაეჯახნენ. კიდევ კარგი, გადარჩა".
ოზურგეთის მუნიციპალიტეტის გამგებელი მერაბ ჭანუყვაძე "გურია ნიუსთან" ამბობს, რომ აღნიშნული საგზაო მონაკვეთის რეაბილიტაცია 2017 წლის გაზაფხულზე დაიწყება:
"ბოლო თვეების განმავლობაში, ნატანები-ურეკის დამაკავშირებელი 35-კილომეტრიანი საავტომობილო გზა მნიშვნელოვნად დაზიანდა. მოგეხსენებათ, ეს გზა სახელმწიფო მნიშვნელობისაა, რომელზეც მძიმეწონიანი სატვირთო ტექნიკა და "ტრაილერის" ტიპის ავტომობილები ინტენსიურად გადაადგილდებიან, რამაც გზის დაზიანება გამოიწვია.
ნატანები-ურეკის დამაკავშირებელი გზის რეაბილიტაცია საქართველოს საავტომობილო გზების დეპარტამენტის კომპეტენციაა. როგორც მაქვს ინფორმაცია, აღნიშნული საგზაო მონაკვეთის რეაბილიტაცია 2017 წლის გაზაფხულზე დაიწყება. დამატებითი ინფორმაციისთვის შეგიძლიათ მიმართოთ საქართველოს საავტომობილო გზების დეპარტამენტს", _ ამბობს მერაბ ჭანუყვაძე.
აღნიშნულ პრობლემასთან დაკავშირებით, რამდენიმე ხნის წინ, ოზურგეთის დემოკრატიულ ჩართულობის ცენტრში იურისტებმა ოზურგეთის მაჟორიტარ დეპუტატს არჩილ თალაკვაძესაც მიმართეს:
"მნიშვნელოვანი და ყურადსაღები საკითხია ოზურგეთი-ნატანების გზა, რომელიც ძალიან სავალალო მდგომარეობაშია. მძიმეწონიანი მანქანები, რომლებიც, დაახლოებით, 30 ტონას იწონის, ქვა-ღორღით დატვირთული გადაადგილდებიან ამ ტრასაზე და, ფაქტობრივად, გაფუჭებასაც ვერ დავარქმევთ ამას _ გაანადგურეს გზა. ეს პრობლემა დროულად მოსაგვარებელია", _ უთხრეს დეპუტატს, რაზეც რაზეც დეპუტატმა ასეთი პასუხი გასცა:
"ნატანების გზა, მართლაც სერიოზულადაა დაზიანებულიფ. აქ ორი საკითხია _ კლიმატის ცვლილებასთან დაკავშირებული მიზეზები დაემატა ძირითად მიზეზს _ სატვირთო მანქანების გადაადგილებას. ვერ გეტყვით, რომ ჩვენ დღეს უკვე გვაქვს პრობლემის მოგვარების გზა, მაგრამ ვეთანხმებით მოსახლეობის მოთხოვნას. ვერც იმას გეტყვით, რომ უახლოეს პერიოდში ეს ავტომანქანები ამ გზით აღარ ისარგებლებენ. ვიზიარებთ მოსახლეობის გულისტკივილს და ვეთანხმებით პოზიციას, რომ სატვირთო ავტომანქანებისთვის გაკეთდეს ალტერნატიული გზა".
