მართალია, შარშანდელი "მოცურავე ტიტას" ხის მსგავსად, მაგნოლიამ ისეთი პოპულარობა ვერ მოიპოვა, მაგრამ ჩაქვის ნაპირებიდან, კომპანია „ზიმოს“ დახმარებით, მანაც ამაყად შეცურა ზღვაში და დენდროლოგიური პარკისკენ გაემგზავრა.
„ჩაქვში მოეწყობა ნაპირთან მისასვლელი გზა, სადაც სპეციალურ ტრანსპორტზე გადავიტანთ ამ ორ ხეს და გურიაში დენდროლოგიურ პარკში გადავრგვათ. ვმუშაობთ აქტიურად, თუ ამინდი შეგვიწყობს ხელს ასწლოვან ხეებს დროულად გადავიტანთ. აჭარიდან გურიაში ხეების გადატანა ეტაპობრივად მოხდება", _ განაცხადა კომპანია „ზიმოს“ ინჟინერმა ირაკლი შანავამ.
ქართული საზოგადოების გული თეთრმა მაგნოლიამ ვერ დაიპყრო, რადგან კვირის ტოპ-ნიუსის ადგილს, კალაძის ომერტა არ თმობს. საპარლამეტო თუ არასაპარლამენტო ოპოზიციის, მესამე სექტორის, მედიის თუ უბრალო მოსახლეობის ზეწოლის მიუხედვად, კალაძე დუმილს ამჯობინებს _ „გაზპრომთან“ საიდუმლო ხელშეკრულების გამჟღავნება მაინც ვერ მოხერხდა.
ეკონომისტები მიიჩნევენ, რომ „გაზპრომთან" დადებული ხელშეკრულებით საქართველო მილიონობით დოლარს დაკარგავს. ეკონომისტები, დაახლოებით, 12 მლნ-ზე, თუმცა, რუსულ მხარესთან მიღწეული "შეთანხებით", გამორიცხული არ არის, საქართველომ 20 მლნ. დოლარი იზარალოს. "გაზპრომისგან" მიღებული თანხა კი დამატებით შესაძენი გაზის რაოდენობას სანახევროდაც არ ეყოს. იმის გამო, რომ ხელშეკრულების კომერციული დეტალები, ჯერჯერობით, არ ხმაურდება. ექსპერტებს უჭირთ ზუსტი ანალიზი, თუ რა დარჩება ქვეყანას ახალი გარიგების სანაცვლოდ.
"ჩემი აზრით, ტარიფის შენარჩუნება მომავალი წლიდან გაგვიჭირდება. ფასი და ტრანსპორტირების ღირებულება იქნება იმ სტანდარტში, რაც ევროპის ქვეყნებშია. აქამდეც ველოდით, რომ თანამშრომლობის არსებული ფორმა შეიცვლებოდა, მაგრამ რატომ მაინცდამაინც წელს, ამაზე ვერ მივიღეთ პასუხი. როგორც ჩანს, რუსეთს აღმოაჩნდა დამატებითი არგუმენტები, რის გამოც წავაგეთ. არ ვიცი, რა იყო ეს არგუმენტი, როგორი იყო შემხვედრი წინადადება _ მუქარა თუ სხვა რამ, რაზეც საქართველომ უარი ვერ თქვა", _ განაცხადა ხუხაშვილმა bpn-სთან საუბრისას.
მესამე სექტორი ქვეყნის უსაფრთხოების და სუვერენიტეტის რისკებზე საუბრობს და ხელშეკრულების გასაჯაროებას ითხოვს.
„ვინაიდან საკითხი ცდება ჩვეულებრივი კომერციული მოლაპრაკებების ჩარჩოებს და სერიოზული რისკების შემცველია, ეროვნული უსაფრთხოებისა და ქვეყნის სუვერენიტეტისათვის, ჩვენ კიდევ ერთხელ დაბეჯითებით მოვითხოვთ, რომ უახლოეს დღეებში, საქართველოს ხელისუფლების წარმომადგენლების მიერ მოხდეს ჩატარებული შეხვედრებისა და გამართული მოლაპარაკებების დეტალების გასაჯაროება, ხოლო საქართველოს პარლამენტში შედგეს ხსენებული საკითხის ღია საკომიტეტო განხილვა. როგორც ჩვენი 5 ნოემბრის წერილში აღვნიშნავდით, "გაზპრომი" არის რუსული პოლიტიკური გავლენის სერიოზული იარაღი და მსოფლიოში ერთ-ერთი ყველაზე კორუმპირებული, არაგამჭვირვალე ორგანიზაცია.
შესაბამისად, ქართულ ბაზარზე გაზპრომის რაიმე ფორმით დაბრუნება და ამით მისთვის საქართველოს პოლიტიკაზე გავლენის სერიოზული ბერკეტის გადაცემა სრულიად დაუშვებლად მიგვაჩნია, რადგან ეს ზიანს მიაყენებს, საქართველოს უსაფრთხოებას და სასიცოცხლო ინტერესებს", _ ნათქვამია განცხადებაში, რომელსაც 80 არასამთავრო ორგანიზაცია აწერს ხელს. ხელისუფლება დუმს.
და ბოლოს, როგორც იქნა ჩატარდა ნაწვალები ენმ-ს მეშვიდე ყრილობა. ნაწვალები იმიტომ, რომ გაყრილებმა დარჩენილებს სააკაშვილის მონები უწოდეს, დარჩენილებმა წასულებს _ ივანიშვილის მოთამაშეები.
ასე იყო თუ ისე, სააკაშვილმა გული მაინც არ გაიტეხა, საპატიმროდან ახალგამოსულ უგულავას ბრუტუსი არ უწოდა და „რუსთავი2“-ის ეთერში განაცხადა, რომ გიგი წერეთლის მამის შექმნილ რაღაც პარტიაში, მხოლოდ რამდენიმე ადამიანი გადავიდა.
მართალია, ეს რამდენიმე- 62 კაცია, მაგრამ ძველი ენმ-ელები გულს მაინც არ იტეხენ. დღეს სპორტის სასახლეში საკმაო რაოდენობის მხარდამჭერების შეკრებაც შეძლეს და სააკაშვილს ერთგულება კიდევ ერთხელ დაუმტკიცეს. ყრილობამ რეზოლუცია მიიღო _ „სამშობლოდან გაქცეულ“ უპირობო ლიდერს უსასრულოდ დაელოდება და სააკაშვილის საქართველოში დაბრუნებამდე ლიდერს არ აირჩევს.
რაც შეეხება ნიკა მელიას, ყრილობამ ის ენმ-ს პოლიტსაბჭოს თავმჯდომარედ აირჩია, ზაზა ბიბილაშვილი და ლევან ვარშალომიძე კი მელიას მოადგილეები იქნებიან.
ყრილობაზე სიტყვით გამოვიდა ყოფილი საგარეო საქმეთა მინისტრი გრიგოლ ვაშაძე და არც მეტი და არც ნაკლები, თანაპარტიელებს ხელისუფლებაში დაბრუნების შემდეგ, პირველი 30 დღის სამუშაო გეგმის შემუშავება სასწრაფოდ მოსთხოვა.
”იმისათვის, რომ გავაგებინოთ საქართველოს მოქალაქეებს ჩვენ მათთვის რა გვინდა, ძალიან გთხოვთ, ყრილობას, მომავალ პოლიტსაბჭოს დაავალოთ, გამოიმუშაოს და დასამტკიცებლად წარმოადგინოს პროგრამა, რას გააკეთებს ეს მოძრაობა. ეს პარტია ხელისუფლებაში დაბრუნების პირველ 30 დღეში. მაგალითისთვის ვიტყვი, აღარასოდეს აღარ უნდა იყოს საქართველში ბიუჯეტის ხარჯვა ”ტუსოვკების” , წინასაარჩევნოდ მოსათაფლად, აღარასოდეს უნდა იყოს ბიუროკრატიის რაოდენობის ზრდა და მათი პრივილეგიების ზრდა, მთელი ეს დაზოგილი თანხები პირველ 30 დღეში უნდა გადამისამართდეს განათლებაში, ჯანდაცვასა და თავდაცვაში. პირველ 30 დღეში უნდა გამოვაცხადოთ ტენდერი, მხოლოდ ევროპის კავშირის წევრი ქვეყნების კომპანიების მონაწილეობით, რომ საქართველოში ერთი წლის განმავლობაში დავასრულოთ ბავშვებისთვის სამი კლინიკის მშენებლობა: ონკოლოგიური, ჰემატოლოგიური და ფართო პროფილის. ეყოფა ჩვენს მშობლებს შვილის გადასარჩენად თურქეთსა და გერმანიაში მათხოვრობა”, _ განაცხადა ვაშაძემ.
