საქართველოს ეროვნული ბანკის საბჭო წევრს, ვიცე-პრეზიდენტს და საქართველოს ბანკის ყოფილ გენერალურ დირექტორს, მურთაზ კიკორიას, ხელფასის სახით, 2015 წელს, 3133 280 ლარი აქვს აღებული.
ამის შესახებ ქონებრივ დეკლარაციაშია აღნიშნული, რომელიც მან 2016 წლის 31 დეკემბერს შეავსო.
კიკორია სს "საქართველოს ბანკის" აღმასრულებელი დირექტორი 2015 წლის სექტემბრიდან, 2016 წლის სექტემბრამდე იყო. სწორედ ამ პერიოდში აქვს მას მიღებული 3 133 280 ლარი.
დეკლარაციის მიხედვით, 2015 წელს, გარდა ზემოთ აღნიშნული თანხისა, კიკორიას შემოსავალი სს "ბელორუსიის სახალხო ბანკის" სამეთვალყურეო საბჭოს თავმჯდომარის, სს "ალდაგის" სამეთვალყურეო საბჭოს წევრის, სს "ბიჯი ფაინენშალის" დირექტორის მოადგილის, "ბენდერლოკ ინვესტმენტ ლიმიტედის" დირექტორის და საქველმოქმედო ფონდის " სიცოცხლის ხე" გამგეობის თავმჯდომარის პოსტიდან, მიღებული არ აქვს.
ფინანსები
რაც შეეხება ბანკირის ფინანსურ ანგარიშებზე არსებულ თანხებს, დეკლარაციის შევსების მომენტში, მურთაზ კიკორიას თი–ბი–სი ბანკის დეპოზიტზე 2 100 000 ლარი; ამავე ბანკის საკრედიტო ანგარიშზე 2549.58 დოლარი; მიმდინარე ანგარიშზე – 85.33 დოლარი და 57600.00 ლარი ჰქონდა; ხოლო საქართველოს ბანკის მიმდინარე ანგარიშზე 1588500.00 ლარი; სახელფასო ანგარიშზე 140439.09 ლარი დებეტი(-); საკრედიტო ანგარიშზე 19000.00 გირვანქა სტერლინგი დებეტი(-); ქართუ ბანკის მიმდინარე ანგარიშზე კი, 114.06 დოლარი ერიცხებოდა. გარდა ამისა, მურთაზ კიკორიას ნაღდი ფულის სახით 1000.00 ლარი ჰქონდა.
კიკორიას მეუღლეს, ნინო კოღუაშვილს კი, საქართველოს ბანკის დეპოზიტზე 1 000000 ლარი ხოლო მიმდინარე ანგარიშზე 90000.00 ლარი ჰქონდა.
აღსანიშნავია, რომ ნინო კოღუაშვილმა სადაზღვევო კომპანია "იმედი L"-ის გენერალური დირექტორის პოსტიდან, 2015 წელს, 236 931.00 ლარის შემოსავალი მიიღო.
უძრავ-მოძრავი ქონება
რაც შეეხება ოჯახის უძრავ ქონებას, როგორც დეკლარაციაშია აღნიშნული, 2 ბინა, 3 საცხოვრებელი სახლი; 4 მიწის ნაკვეთი, არასაცხოვრებელი ფართი და 2 მიწის ნაკვეთია.
კერძოდ, მურთაზ კიკორიას 100%-იან საკუთრებაშია საცხოვრებელი სახლი თბილისში, დიღმის სასწავლო საცდელი მეურნეობის ტერიტორიაზე, რომლის ფართობიც 523.00 კვ.მ-ია; ასევე, თბილისი, ჭავჭავაძის გამზირზე მდებარე 145.27 კვ.მ -ის ფართობის ბინა და ამავე მისამართზე არსებული 129.03 კვ.მ-ის ფართობის არასაცხოვრებელი სახლი; საცხოვრებელი სახლი მცხეთაში, სოფელი ბიზმენდში, რომლის ფართობი 250.00 კვ.მ-ია და ამავე მისამართზე 2500.00 კვ.მ-ის ფართობის მიწის ნაკვეთი; ასევე, 4500.00 კვ.მ-ის ფართობის მიწის ნაკვეთი მცხეთაში, სოფელი შანკევანში და 1000.00 კვ.მ-ის ფართობის მიწის ნაკვეთი თბილისში, დიღმის სასწავლო საცდელი მეურნეობის ტერიტორიაზე.
ნინო კოღუაშვილის საკუთრებაში კი, თბილისში, რჩეულიშვილის ქუჩაზე მდებარე 178.00 კვ.მ-ის ფართობის ბინა; თბილისში, დაბა კიკეთში, მდებარე 150.00 კვ.მ-ის ფართობის საცხოვრებელი სახლი და დაბა კოჯორში მდებარე 857.00 კვ.მ-ის ფართობის მიწის ნაკვეთია.
გარდა ამისა, მურთაზ კიკორიას 100%-იან საკუთრებაშია ორი მსუბუქი ავტომობილი – 2013წელს გამოშვებული BMW M6 და 2010 წელს გამოშვებული BMW 550.
სამეწარმეო საქმიანობა
რაც შეეხება ოჯახის სამეწარმეო საქმიანობაში მონაწილეობას, დეკლარაციაში აღნიშნულია, რომ ნინო კოღუაშვილი სს დოთგრინ-ის აქციონერია; ასევე, შპს ქართული აგროპროდუქტის პარტნიორი; მურთაზ კიკორია კი, შპს ეფსისის პარტნიორია.
გასავლები
აღსანიშნავია ისიც, რომ მურთაზ კიკორიამ 2015 წელს შვილისთვის მადრიდში 500000.00 ევროს ღირებულების ბინა შეიძინა. 2016 წლის 19 იანვარს კი, მადრიდის ნოტარიუსთან შვილის ბინის გასარემონტებლად 182785.00 ევროს ღირებულების ხელშეკრულება აქვს დადებული.
გარდა ამისა, დეკლარაციაში აღნიშნულია, რომ მურთაზ კიკორიამ ერთი შვილის სწავლისთვის 12000.00 ევრო ხოლო მერე შვილის სწავლისთვის 7000.00 ევრო აქვს გადახდილი; ქველმოქმედებისთვის კი, 55000 ლარი გაიღო.
ბიოგრაფია
ცნობისთვის, საქართველოს ეროვნული ბანკის საბჭოს წევრი, ვიცე-პრეზიდენტი მურთაზ კიკორია 1973 წლის 9 თებერვალს დაიბადა.
1997 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტი, ფინანსებისა და კრედიტის სპეციალობით.
2016 წლის დეკემბრიდან – საქართველოს ეროვნული ბანკის საბჭოს წევრი, ვიცე-პრეზიდენტი.
2015/09 – 2016/09 წწ. – სს "საქართველოს ბანკის" აღმასრულებელი დირექტორი.
2014/11 – 2015/09 წწ. – სს "საქართველოს ბანკის" ფინანსური დირექტორი.
2012/11 – 2014/11 წწ. – სს "ალდაგი – საქართველოს" აღმასრულებელი დირექტორი.
2011/07 – 2012/11 წწ. – სს "საქართველოს ბანკის" გენერალური დირექტორის მოადგილე.
2009/06 – 2001/05 წწ. – "ბიჯი ბანკი", უკრაინა, გენერალური დირექტორის მოვალეობის შემსრულებელი.
2008/08 – 2009/06 წწ. – სს "საქართველოს ბანკის" აღმასრულებელი დირექტორის მოადგილე.
2007/08 – 2008/07 წწ. – შპს "ზარაფხანას" გენერალური დირექტორი.
2005/08 – 2007/07 წწ. – ევროპის რეკონსტრუქციისა და განვითარების ბანკის მთავარი ბანკირი.
2001/12 – 2005/04 წწ. – საქართველოს ეროვნული ბანკის საბანკო ზედამხედველობისა და რეგულირების დეპარტამენტის უფროსი.
2001/10 – 2001/12 წ. – საქართველოს ეროვნული ბანკის პრეზიდენტის თანაშემწე.
2001/08–2001/09 წწ. – გაერთიანებული ქართული ბანკი – ფილიალების მართვისა და მარკეტინგის დეპარტამენტის უფროსი.
1995/10 – 2000/06 წწ. – კომერციული ბანკი "სილქროუდის" (ყოფილი ბანკი "სიონი") მმართველი დირექტორი.
1995/07 – 1995/10 წწ. – გაერთიანებული ქართული ბანკის კორპორატიული სავალუტო ოპერაციების დეპარტამენტის უფროსის მოადგილე, საერთაშორისო ანგარიშსწორების დეპარტამენტის უფროსი.
1992/09-1995/09 წწ. – საქართველოს ექსპორტ-იმპორტ ბანკი, უცხოური ვალუტისა და აქტივების მართვის ოპერაციების დეპარტამენტის დილერი, სავალუტო ანგარიშებისა და საერთაშორისო ტრანსაქციების დეპარტამენტის მთავარი ეკონომისტი, სავალუტო ანგარიშებისა და საერთაშორისო ოპერაციების დეპარტამენტის უფროსი.
