სამაუწყებლო კომპანიის “რუსთავი 2”-ის გენერალურ დირექტორს, ბატონ გოგა გეგეშიძეს, გადაცემის “ვის უნდა ოცი ათასი” წამყვანს, ბატონ მამუკა გამყრელიძეს
რამდენიმე წელია, ტრაგიკული შემთხვევის გამო, ოზურგეთის მუნიციპალიტეტის სოფელ მთისპირში მცხოვრები თამუნა ჯემალის ასული შავაძე საწოლსაა მიჯაჭვული.
სხვადასხვა პერსონების დახმარებით, მან მკურნალობის კურსი გაიარა უკრაინაში, ქალაქ საკის სპეციალიზებულ კლინიკაში; წელს კი, თურქეთში სპეციალური გამოკვლევის შედეგად დადგინდა _ თამუნას მკურნალობის კურსი თუ გაგრძელდება, იგი სიარულს შეძლებს!
სამწუხაროდ, შავაძეების ოჯახი სიღარიბის ზღვარს მიღმა მყოფთა კატეგორიას მიეკუთვნება. ჩვენ პრინციპულად მიგვაჩნია, რომ უიმედობის ზღვარზე მყოფი ბავშვების ჯანმრთელობაზე სახელმწიფო უპირობოდ უნდა ზრუნავდეს, მაგრამ, როგორც ჩანს, თამუნასთვის ერთადერთ ხსნად ქველმოქმედებაღა რჩება.
გასულ წელს თამუნა შავაძე თქვენი გადაცემის მონაწილეთა რიგში მოხვდა, მაგრამ, რადგან მედიკოსებს მისი მდგომარეობა უკიდურესად მძიმედ მიაჩნდათ, დასახმარებელთა სიიდან ამოუღიათ. ბოლო გამოკვლევები ადასტურებენ, რომ პატარა გოგონას გამოჯანმრთელება სავსებით შესაძლებელია.
“გურია ნიუსის” რედაქცია უერთდება ოზურგეთელი ჟურნალისტების, საზოგადოების წარმომადგენლების თხოვნას, თქვენს გადაცემაში მონაწილეობით, მისცეთ შანსი თამუნა შავაძეს ისევ დაუბრუნდეს იმედი და ფეხზე დადგომა შეძლოს!
