თბილისის საქალაქო სასამართლოს ყოფილი თავმჯდომარის მამუკა ახვლედიანის განცხადებით, სასამართლო სისტემა "სიმსივნით არის დაავადებული" და მას სისტემური რეფორმები ვერ უშველის. ამის შესახებ ახვლედიანმა თბილისის სააპელაციო სასამართლოში პროცესის დასრულების შემდეგ განაცხადა, სადაც მის საჩივარზე გადაწყვეტილება გამოაცხადეს. სასამართლოს გადაწყვეტილებით, მამუკა ახვლედიანის სარჩელი, რომლითაც იუსტიციის უმაღლესი საბჭოს გადაწყვეტილების ბათილა ცნობას და თანამდებობაზე აღდგენას ითხოვდა, არ დაკმაყოფილდა.
"სიახლის არანაირი მოლოდინი არ მქონდა და დღეს არც ამის სათქმელად მოვსულვარ. უბრალოდ, მინდა გითხრათ, რომ სასამართლო სისტემამ კიდევ ერთხელ აჩვენა, რომ ის ძლიერ ავად არის. ამას არ შველის არანაირი კოსმეტიკური ტალღები და რეფორმები; ის არის მართლა სიმსივნით ავად და სანამ ეს სიმსივნე სისტემურად არ მოიკვეთება, მანამდე არც ამ ქვეყანას ეშველება.
უბრალოდ, სასამართლო სისტემაზე და ნდობაზე საუბარი ზედმეტია. ეს არის იუსტიციის უმაღლესი საბჭოს სირცხვილი, რაც ხდება ჩემს საქმესთან დაკავშირებით. ასეთი სახის მსჯელობა ალბათ იმიტომ არის რომ ჩინჩალაძეს მიუსწროს უზენაეს სასამართლოში. რომელსაც ვადა ეწურება და მიიღოს მონაწილეობა განაწილებაში. ან ამ საქმის განხილვაში რომ დადგეს მათთვის სასურველი შედეგი. კიდევ ერთხელ გეუბნებით, მთავარი საკითხი აქ ის კი არ არის, მამუკა ახვლედიანი აღდგება თუ არა თანამდებობაზე, დაკმაყოფილების შემთხვევაში მე არ ვაპირებ ამ ტიპის სასამართლო სისტემაში მუშაობას. სამარცხვინოა ის, რასაც აკეთებს იუსტიციის საბჭო და ის რეფორმები, რაც ხდება სასამართლო სისტემაში.
ეს ადამიანები და მენეჯმენტი, ვინც მართავს ამ სისტემას, პირიქით, გააძლიერა მესამე და მეორე ტალღამ. ამას არ შველის ეს უბრალო ტალღები. ამას სჭირდება სისტემური რეფორმა და მთლიანად უნდა მოიკვეთოს ეს სიმსივნე, რაც სასამართლო სისტემას ბოლო ათწლეულია, მგონი, უკვე სჭირს", _ აღნიშნა ახვლედიანმა.
რაც შეეხება ბრძოლის გაგრძელებას, ახვლედიანმა აღნიშნა, რომ ის სააპელაციო სასამართლოს გადაწყვეტილებს უზენაეს სასამართლოში გაასაჩივრებს და სტრასბურგის სასამართლოსაც მიმართავს.
"წმინდა სამართლებრივად ეს პროცედურები უნდა გავიაროთ უზენაეს სასამართლოში. მივმართავ სტრასბურგის სასამართლოსაც. აუცილებლად ძალიან დიდი თანხები დაეკისრება სახელმწიფოსაც. მე კატეგორიულად მოვითხოვ, სიმართლის დასადგენად რეგრესული წესით იმ ადამიანებმა გადაიხადონ ეს თანხები, ვინც მსგავსი გადაწყვეტილება მიიღო. ეს იმ მაგალითისთვის, რომ თუ მოსამართლე არ დაიცავს კანონს, ვინმემ ხომ უნდა დაიცვას?! ამიტომაც ავივლი ამ პროცედუირებს და არა იმიტომ, რომ რამის იმედი მაქვს ამ სასამართლი სისტემიდან", _ განაცხადა ახვლედიანმა.
ამავე თემაზე:
