საამისოდ სამზადისი უკვე დაწყებულია. როგორც გვითხრეს, მუშები 24-საათიან რეჟიმში მუშაობენ, რომ სამუშაოების დამთავრება მოასწრონ. თუმცა, კითხვაზე _ ეს როგორ უნდა მოახერხონ, კონკრეტული პასუხი არც ერთ ჩინოვნიკს არ აქვს _ მხოლოდ ის იციან, რომ მოასწრებენ!
აღსანიშნავია, რომ ხელისუფლებას სასტუმროს აშენება სულაც არ მოუწევს _ ახლა, ბახმაროში, კომუნისტების დროს აშენებულ, კაპიტალურ შენობას არემონტებენ, რომელიც თავიდანვე სასტუმროსთვის იყო გათვალისწინებული. შესაბამისად, ინფრასტრუქტურის გადაკეთება სულაც არ არის საჭირო _ მხოლოდ რემონტი სჭირდება.
იქვეა რამდენიმე ახალი კოტეჯი, ოღონდ 2-3 წლის წინ აშენებული _ ერთი ფორმის და ფერის, რომელიც 19 აგვისტოს სააკაშვილს ნამდვილად “გამოადგება”.
უნდა ითქვას ისიც, რომ განახლებული ბახმარო მხოლოდ რამდენიმე კვადრატულ მეტრს მოიცავს _ სანატორიუმის მიმდებარე ტერიტორიას. იქ, სადაც საკმაოდ შეძლებული ხალხის და მათ შორის მაღალი თანამდებობის პირების ფეშენებლური კოტეჯები დგას.
ბახმაროს ცენტრს კი განახლების არაფერი ეტყობა _ იქ არც სამუშაოებია დაწყებული და არც არავინ იცის, დაიწყება თუ არა. დაკეტილია მეტეოსადგური და პოლიკლინიკა, მიუხედავად იმისა, რომ ამ ეტაპზე ბახმაროში 300-ზე მეტი ოჯახი ასული.
ჩოხატაურის მუნიციპალიტეტის საკრებულოს თავმჯდომარე, ანტონ ხუნდაძე “გურია ნიუსთან” საუბრისას ამბობს, რომ პოლიკლინიკა რამდენიმე დღეში გაიხსნება. თუმცა, ვერც კონკრეტულ თარიღს გვეუბნება და ვერც იმის მიზეზს, რატომ არ მუშაობს საავადმყოფო ბახმაროში 14 ივლისს, მაშინ როცა, გასულ წლებში 22 ივნისიდან იწყებდა ფუნქციონირებას. ამის გამო დამსვენებელი სამართლიან საყვედურს გამოთქვამს. თუმცა, საყვედური, საყვედურად რჩება.
ის, რაც ამ ეტაპზე კურორტზე სრულად გაკეთებულია, წყალი და ელექტროენერგიაა. დამატებულია რამდენიმე ახალი ურნაც.
კვირაში ერთხელ, კურორტს “ლიბერთი ექსპრესიც” სტუმრობს, რაც დამსვენებლებში კმაყოფილებას იწვევს.
დაწყებულია ბახმაროს გზის რეაბილიტაციის სამუშაოებიც და როგორც გვეუბნებიან, რამდენიმე დღეში დასრულდება კიდეც.
ბახმაროში ასულებმა ვერ გავარკვიეთ, იგეგმება თუ არა კურორტის სხვა ადგილების კეთილმოწყობაც. ვერც ის დავადგინეთ, სად უნდა დაიდგას ახალი კარუსელები, რომელიც ავარიული სანატორიუმის ეზოში დევს.
უცნობია ისიც, ამუშავდება თუ არა ცენტრში მდებარე კარუსელები, რომლებიც კურორტზე ბავშვების ერთ-ერთ უსაყვარლეს გასართობს წარმოადგენდა _ დღეს აქ მხოლოდ ნაკარუსელარია…
პროექტების თანახმად, 19 აგვისტოს ბახმარო სხვა იერსახით დაგვხვდება. თუმცა, როგორც ჩვენს მიერ გადამოწმებული ფაქტები მოწმობს, მხოლოდ ერთ კონკრეტულ ადგილზე და ხელისუფლების დაპირებით, რომ ბახმაროს აღმშენებლობა გაგრძელდება. მით უმეტეს, რომ არსებობს პრეზიდენტის კიდევ ერთი დაპირება _ ბახმაროდან ურეკამდე პირდაპირი გზა უნდა გაკეთდეს. მართალია, როგორ, ეს არავინ იცის, მაგრამ, როგორც ადგილობრივი საჯარო მოხელეები ამბობენ, “მთავარია, რომ ამას პრეზიდენტი დაგვპირდა და უნდა გაკეთდეს!”
დაკეტილი პოლიკლინიკა
დაკეტილი მეტეოსადგური
