ქართული თეატრი ციფრებში და რეიტინგებში – 8 თებერვალს, ილიაუნის თეატრის ფოიეში შედგა თანამედროვე ქართული თეატრის კვლევის ცენტრის მიერ ტრადიციად დამკვიდრებული ქართული თეატრის განვლილი ერთი წლის შემაჯამებელი კვლევის და თეატრის კრიტიკოსების მიერ გამოვლენილი რეიტინგების პრეზენტაცია. პრეზენტაციაზე „ქართული თეატრი 2016 წელს“, რომელიც უკვე მეექვსედ ხორციელდება, გამოვლინდა წარმატებული თეატრები სხვადასხვა აქტივობების მიხედვით. დასახელდა ყველაზე აქტიური, პრემიერების , გასტროლების , მაყურებლის, ბილეთების გაყიდვის და წარმოდგენების რაოდენობით გამორჩეული თეატრები; ასევე რეიტინგული სპექტაკლები, პროდუქტიული რეჟისორები, მსახიობები, სცენოგრაფები და ქორეოგრაფები. თეატრების კვლევა სულ 30-მდე კატეგორიაში განხორციელდა.კვლევაში საქართველოში მოქმედი 44 თეატრიდან 42 თეატრმა მიიღო მონაწილეობა, როგორც დედაქალაქიდან, ასევე რეგიონებიდან. მათ შორის, კერძო და დამოუკიდებელმა თეატრებმა. კვლევის მნიშვნელოვანი ნაწილია პროფესიული ხუთეულების შედგენა და რეიტინგების გამოვლენა სხვადასხვა ნომინაციის მიხედვით, რომელშიც თეატრის კრიტიკოსთა საერთაშორისო ასოციაციასთან თანამშრომლობით 20-ზე მეტი მოქმედი კრიტიკოსი მონაწილეობდა. საუკეთესო ხუთეულში შესულ თეატრის მოღვაწეებს თეატრის კრიტიკოსთა საერთაშორისო ასოციაციისა და თანამედროვე ქართული თეატრის კვლევის ცენტრის საპატიო დიპლომები გადაეცათ.
პრეზენტაცია წარმატებული აღმოჩნდა ოზურგეთის ალექსანდრე წუწუნავას სახელობის პროფესიული სახელმწიფო დრამატული თეატრისთვის. ოზურგეთის თეატრი ბევრ კატეგორიაში საპატიო ადგილზე მოხდა. “გურია ნიუსი“ გთავაზობთ რამდენიმე კატეგორიას, სადაც ოზურგეთის დასმა წარმატებას მიაღწია.
2016 წლის ქართული თეატრის მნიშვნელოვანი მოვლენა – ოზურგეთში დადგმული სპექტაკლით “ბოშები“ გამოემშვიდობა მაესტრო გიზო ჟორდანია ქართულ თეატრს, სათეატრო საზოგადოებას და ერთგულ მაყურებელს; წლის ქართული თეატრის მნიშვნელოვან მოვლენებს შორის ასევე მოხდა ნოდარ დუმბაძის საერთაშორისო ფესტივალის დაარსება და ოზურგეთის დრამატული თეატრის რეაბილიტაციის დაწყება; თეატრში ყველაზე პროდუქტიული მამაკაცი მსახიობია- ალექსანდრე ლომიძე, ყველაზე პროდუქტიული ქალი მსახიობი – შორენა გვეტაძე, წარმატებული პროექტი – “გამარჯობა ხალხო“ რომელშიც ლიტველ მსახიობებთან ერთად ოზურგეთის თეატრის მსახიობებიც მონაწილეობდნენ. სპექტაკლი წარმოდგენილი იყო ქართულ და ლიტვურ ენებზე. ოზურგეთის თეატრი ასევე დასახელდა საუკეთესო მასპინძელ თეატრებს შორის. წლის ყველაზე პროდუქტიული ქორეოგრაფებს შორისაა ოზურგეთის თეატრის ქორეოგრაფი მარიკა ქვეითაია.
ოზურგეთის დრამატული თეატრის სამხატვრო ხელმძღვანელი, ვასო ჩიგოგიძე “გურია ნიუსთან“ პირველ კომენტარს აკეთებს და ამბობს: “ ჩვენი თეატრი, შენობის რეაბილიტაციის და სცენის არ ქონის გამო, რომ კიდევ მოწინავე პოზიციებზეა, გასახარია ნამდვილად. მინდა მადლობა გადავუხადო ჩემს თეატრს, თითოეულ თანამშრომელს, იმ გუნდს, ვინც იმისთვის იღწვის, რომ იყოს სხვადასხვა კატეგორიაში წამყვან პოზიციაზე. საქართველოს 44 თეატრიდან რომ გამოგარჩევენ, სასიხარულოა, თანაც მცირე ბიუჯეტისა და უამრავი ხელისშემშლელი ობიექტური მიზეზების მიუხედავად“.
