ქალაქ ოზურგეთის მუნიციპალიტეტის საკრებულოს სხდომაზე დღის წესრიგით გათვალისწინებული 8 საკითხს დეპუტატებმა მხარი დაუჭირეს.
პირველი საკითხი შეეხებოდა ქალაქ ოზურგეთში გურიის ქუჩაზე მდებარე 5 982 კვადრატული მიწის ნაკვეთიდან 8, 3 კვ მიწის ნაკვეთის აღნაგობის წესით განკარგვას. ეს მიწის ნაკვეთი ბაზრის ყოფილ დირექტორს რევაზ შალამბერიძეს ეკუთვნის.
აღნიშნულ საკითხთან დაკავშირებით ინფრასტრუქტრის სამსახურის უფროსმა მერაბ წივწივაძემ ისაუბრა:
“ქალაქ ოზურგეთის მუნიციპალიტეტის მერია შუამდგომლობით შემოვიდა იმის თაობაზე, რომ ქალაქ ოზურგეთში გურიის ქუჩაზე მდებარე 5 982 კვადრატული არასასოფლო მიწის ნაკვეთიდან პირდაპირი წესით 8, 3 კვადრატული არასასოფლო სამეურნეო მიწის აღნაგობის წესის განკარგვის თაობაზე.
ამასთან დაკავშირებით, მოგახსენებთ, რომ აღნიშნული საკითხი 2014 წელს პირდაპირი წესით ნასყიდობის აღნაგობის ხელშეკრულებით გაფორმდა რევაზ შალამბერიძეზე, როდესაც ბატონმა რევაზმა მიმართა საჯარო რეესტს 2014 წელს ხელშეკრულებით, რეესტრმა გააჩერა აღნიშნული რეგისტრაცია იმ მოტივით, რომ ქალაქ ოზურგეთის მუნიციპალიტეტიდან მოითხოვა თანხმობა, 2014 წლის 17 აგვისტოს. ვინაიდან ამ პერიოდში მუნიციპალიტეტები გაიყო ორ ნაწილად და უკვე ახალწარმოქმნილი მუნიციპალიტეტიდან ითხოვდა თანხმობას. 2014 წელს, მიმდინარეობდა შესაბამისი ადმინისტრაციული წარმოება , ხოლო 2016 წელს, გადაუფორმდა თავის მეუღლეს იზოლდა სიხარულიძეს, ფართის გადაფორმება ჩუქების საფუძველზე განხორციელდა, 2016 წლის დეკემბრის თვეში ქალბატონმა იზოლდამ დამატებით მოგვმართა აღნიშნულთან დაკავშირებით, რომ 8, 3 კვადრატული უკვე მის საკუთრებაში არსებული მიწის ნაკვეთი აღნაგობის წესით 10 წლის ვადით. პროცესის დასრულებასთან დაკავშირებით ვითხოვთ თქვენს თანხმობას, რომ 10 წლის ვადით აღნაგობის უფლებით გაუფორმდეს ქალბატონ იზოლდა სიხარულიძეს. ეს ფართი, აქვე დავძენ, რომ არ შედის ჩვენს მიერ გამოცხადებულ აუქციონში, რომელშიც მართვა- განკარგვის წესით , ე.წ. ბაზრის ტერიტორია გამოდის.
აღნიშნულ საკითხთან დაკავშირებით, დეპუტატმა ლევან მგელაძემ განმარტებები მოითხოვა:
“აქ არის საჯარო რეესტრის ამონაწერი, სადაც გარკვევით წერია, რომ საგადასახადოს არ დაუმთავრებია ეს პროცესები, რატომ ფიგურირებს საგადასახადო, ასევე ჩანს იპოთეკა, მარტივად რომ ვთქვათ, რომ დაამათავრებს საგადასახადო სრულ შემოწმებას, მერე რა იქნება?! მე მაქვს ინფორმაცია, რომ დიდ დავალიანებაზეა საუბარი“ _ მიმართა დეპუტატმა წივწივაძეს, რაზეც შესაბამისი სამსახურის უფროსმა განუმარტა, რომ: – “ეს მიწის ნაკვეთი მუნიციპალიტეტის საკუთრებაშია. ნებისმიერი დავალიანება ჩვენს საკუთრებაზე აისახება. ბაზარი ამიტომ გავაუქმეთ ჩვენ, რომ იყო წაგებაზე, ამიტომ გამოვაცხადეთ საიჯარო აუქციონი, რომ ის დაგროვილი დავალიანებები აღარ დაფიქსირდეს“, _ ლევან მგელაძემ საკრებულოს თავმჯდომარეს და ქალაქის მერს ძველი დანაპირები შეახსენა:
“კარგი იქნებოდა, აქ ყოფილიყო, ქალაქ ოზურგეთის მერი, თქვენ არ იყავით, რომ გვპირდებოთ, რომ ერთ წელიწადში ბაზარს ვერ იცნობთო? წაგება ხელოვნურად იყო შექმნილი, ხალხის გაკოტრება სპეციალურად იყო მოწყობილი, რომ გაცემულიყო ეს მიწის ნაკვეთები იჯარით, კი გამოცხადდა საჯარო აუქციონი, მაგრამ ბაზრის ტერიტორია არის შეფასებული მიზერულ თანხად, ეს არის არალოგიკური, როცა საგადასახადოში მიდის პროცესი, როცა ბაზარს აქვს ვალი, არ არის მაღთებული ასე მიდიოდეს პროცესები. კარგად მახსოვს დაგვპირდით, რომ ერთი წლის მერე ბაზარში კარგი ვითარება იქნებოდა, მაგრამ არაფერი არ შეცვლილა, გარდა იმისა, რომ ახალი მშენებლობები მიმდინარეობს, კონკრეტულად კი ეს ეხება ხიდს, სადაც ისეთივე მძიმე სიტუაციაა, როგორიც წლების წინ, ის პროდუქტები ისევ იქაა, წაგვამადლეთ კიდეც, ამას გავაკეთებთ, ისე ვიზამთო, მაგრამ არაფერი ცვლილება იქ არ მომხდარა“, _ თქვა საკრებულოს სხდომაზე ლევამ მგელაძემ.
საკრებულოს თავმჯდომარემ გელა კობალაძემ განაცხადა, რომ მშენებლობები აუცილებლად უნდა განხორციელდეს ბაზარში, რაც შეეხება არსებულ ვითარებას , მისი თქმით აუცილებლად გამოსწორდება.
