“მე ეკლესიიდან გამომაგდეს, ის კი მთავარეპისკოპოსია” _ მთავრობის საპარლამენტო მდივნის სკანდალური პოსტი

მთავრობის საპარლამენტო მდივანი შალვა თადუმაძე სოციალურ ქსელში სკანდალურ პოსტს აქვეყნებს, რომელშიც ჰყვება რატომ გამოაგდეს ეკლესიიდან 20 წლის ასაკში:

"1998 წელს თბილისის ერთ-ერთ პრესტიჟულ ეკლესიაში მნათეთ ვმსახურობდი. საპატრიარქოს მაშინდელი ეკონომიკური სამსახურის განჩინებით, ყველა ეკლესიას დაევალა საპატრიარქოდან მიღებული სანთლის ყიდვა-გაყიდვის აღრიცხვა (ბუღალტერია) ეწარმოებია.

ყველა ეკლესიას გამგებელი უნდა ყოლოდა, რომელი პასუხისმგებელი იქნებოდა ამ აღრიცხვაზე. ზემოთხსენებულ ეკლესიაში გამგებლობა მე მომანდეს.

საპატრიარქოდან 10 შეკვრა სანთელი მოვიტანე იმ თვეს, მოძღვარმა ბაზრობიდან 100 შეკვრა მოიტანა. თვის ბოლოს მითხრა, რომ ორი შეკვრა დარჩა, 8 შეკვრის მეტი არ გაიყიდაო. აჰა საბუთები და მოაწერე ხელი და ჩააბარე საპატრიარქოსო. მაშინაც კაი ჯიუტი ვიყავი (არანაირი მორჩილება) და არათუ ხელი არ მოვაწერე, საპატრიარქოს ეკონომიკურ სამსახურშიც კი დამიბარეს მოვალეობის შეუსრულებლობისთვის.

მაღალი რანგის იერარქი რომ დავინახე, 20 წლის "გამგებელს" მეგონა, სიმართლე იზეიმებს.-მეთქი და მოვაღე პირი.

მეორე დღეს გამომაგდეს ეკლესიიდან, მაღალი იერარქი დღეს უკვე მთავარეპისკოპოსია, წმინდა სინოდის წმინდა წევრი, მოძღვარი გაბრწყინებული ჯვრით დეკანოზი, მე კი ისევ ისეთი ცოდვილი დავრჩი," _ წერს თადუმაძე.