“ხმების სანაცვლოდ უკრაინაში დასაქმება”

_ ამ ფაქტს ამავე ქუჩაზე მცხოვრები გამგეობის თანამშრომლის პაატა ურუშაძის ოჯახის წევრები და თავად გამგებელი გიორგი გოგუაძე ადასტურებენ.

_ ლანჩხუთის მუნიციპალიტეტის გამგებელი გიორგი გოგუაძე კარდაკარ დადის მოსახლეობაში პოლიციელებთან ერთად. ისინი აწყობენ შეხვედრებს მათ სანათესაო წრეებთან, პირდებიან, რომ თუ ნაციონალებს მისცემენ ხმას, აუცილებლად დაასაქმებენ და იცით სად? უკრაინაში! _ ეს ინფორმაცია “გურია ნიუსს” ლანჩხუთიდან მიაწოდეს.

_ ამ კუთხეში პოლიციის პატარა განყოფილებაა, პოლიციის უფროსის მოადგილე დავით იმნაძე, განყოფილების ხელმძღვანელი უბნის რწმუნებულების ხაზით ვენე კეჭაყმაძე, ლაშარელა ჩხაიძე რომელიც ადრე პოლიციის უფროსის მოადგილე იყო _ სამივე ახლდა გამგებელს. გამოიყვანეს მეზობლები და ნათესავები _ მოსახლეობასთან შეხვედრას ვერ დავარქმევთ ამას, რადგან ფარული ხასიათი ჰქონდა. ძირითადი დაპატიჟებული სტუმრები იყვნენ პოლიციის მუშაკების სანათესაო, რადგან მათ მიიყვანეს იქ ოჯახის წევრები, ნათესავები, ახლობლები.

მუნიციპალიტეტის გამგებელს გიორგი გოგუაძეს შეხვედრის დროს ასეთი წინადადება დაუყენებია: _ თუ ჩვენ მოგვცემთ ხმას, უკრაინაში დაგასაქმებენო. ქართველ ადამიანს ეუბნება, უკრაინაში გაგიშვებ სავაჭროდო, იქ დაგასაქმებო. უკრაინაში უნდა გაუშვას თუ პირიქით, ადგილზე ამუშაოს და უკრაინაში ვინცაა წასული, ის აქ ჩამოიყვანოს? ეს არ არის ამომრჩევლის მოსყიდვა?! _ გვითხრა ჩვენმა წყარომ.

“გურია ნიუსი” ფაქტის გადასამოწმებლად ლანჩხუთის მუნიციპალიტეტის გამგეობის თანამშრომლის პაატა ურუშაძის სახლში მივიდა. იგი თამარ მეფის ქუჩაზე ცხოვრობს და ოჯახის წევრებმა ეს ინფორმაცია დაგვიდასტურეს:

_ კი, შეხვედრა გუშინწინ იყო.

_ ვინ ესწრებოდა შეხვედრას?

_ შეხვედრა იყო უბანში, რაზე იყო, ვერ გეტყვით, მე არ დავსწრებივარ.

ინფორმაცია ლანჩხუთის მუნიციპალიტეტის გამგებელმა გიორგი გოგუაძემ დაადასტურა.

_ ბატონო გიორგი, ლანჩხუთში ერთ-ერთ ქუჩაზე მოსახლეობას შეხვდით პოლიციელებთან ერთად. როგორც წყარო ამბობს, ეს შეხვედრა საარჩევნო ხასიათს ატარებდა.

_ საარჩევნო? გამორიცხულია. რომელ უბანში?

_ ეს იყო თამარ მეფის ქუჩაზე. სხვათა შორის, იმ შეხვედრას პოლიციელებიც ესწრებოდნენ.

_ უბრალოდ, ჩვენ ყველა ქუჩაზე ვხდებით მოსახლეობას პრობლემების მიხედვით, ეს ჩემი სამუშაო რეჟიმია. რა შუაშია არჩევნები?

_ თქვენ არ დაპირდით მოსახლეობას, რომ თუ ხმას მოგვცემთ, უკრაინაში დაგასაქმებთო?

_ არასწორი ინფორმატორები გყავთ. გამორიცხულია.

_ ბატონო გიორგი, პოლიციელებთან ერთად აწყობთ შეხვედრებს?

_ რა შუაშია პოლიციელები? ისინი იქ ცხოვრობენ.

“გურია ნიუსი” ლანჩხუთის პოლიციის უფროსის მოადგილეს დავით იმნაძეს დაუკავშირდა:

_ გეშლებათ რაღაც. თუ რაიმე გაინტერესებთ ჩვენ გვყავს პრესსამსახური და იმას მიმართეთ.

_ ბატონო დავით, პრესსამსახურს ვკითხო მოსახლეობაში თქვენი საარჩევნო შეხვედრების შესახებ? ის მეტყვის, რა ელაპარაკეთ მოსახლეობას?

_ ეს მცდარი ინფორმაციაა.

_ ბატონო დავით, ამ ინფორმაციას ადასტურებს თამარ მეფის ქუჩის მცხოვრებლები და, რაც მთავარია, ლანჩხუთის მუნიციპალიტეტის გამგებელი.

ამ წინადადების მოსმენის შემდეგ იმნაძემ ტელეფონი გაგვითიშა.

ჩვენ ლაშარელა ჩხაიძესაც დავურეკეთ, თუმცა, მან კითხვის დასმაც არ გვაცალა, ისე გადაგვიმისამართა პრესსამსახურთან: _ თუ რაიმე გაინტერესებთ მიმართეთ პრესსამსახურს, _ გვითხრა ჩხაიძემ

“გურია ნიუსის” კითხვას მოუსმინა პოლიციელმა ვენე კეჭაყმაძემ, თუმცა, ინფორმაცია არ დაადასტურა:

_ ბატონო ვენე, ლანჩხუთის მუნიციპალიტეტის გამგებელთან გიორგი გოგუაძესთან ერთად საარჩევნო შეხვედრები მოაწყვეთ?

_ ვერანაირ პასუხს ვერ გაგცემთ. ცრუ ინფორმაცია გაქვთ.

_ ეს ფაქტი ლანჩხუთის მუნიციპალიტეტის გამგებელმა გიორგი გოგუაძემ დაგვიდასტურა.

_ მე ვერ დაგიდასტურებთ. ცრუ ინფორმაცია გაქვთ.

_ ესე იგი, ლანჩხუთის მუნიციპალიტეტის გამგებელი ტყუილს ამბობს?

_არ ვიცი. ეგ ჰკითხეთ თავად გიორგი გოგუაძეს.