ლანჩხუთში, პირველი საჯარო სკოლის მიმდებარე ტერიტორიაზე ინფრასტრუქტურული სამუშაოები გასული წლის სექტემბერში, ახალი სასწავლო წლის დაწყების წინ ჩატარდა, თუმცა, სამუშაოების შემსრულებელ კომპანიას სამშენებლო ნარჩენები ადგილიდან არ გაუტანია _ მას ადგილი იქვე სკოლის ღობესთან მიუჩინა. მიუხედავად ამდენი ხნის გასვლისა და საკმაოდ მზიანი ამინდებისა, ნარჩენების გატანაზე ამ დრომდე არავის არ უზრუნია.
პირველი საჯარო სკოლის მნე, სერგო ხოფერია ჩვენთან საუბრისას ამბობს, მათ მოვალეობაში არ შედის სასწავლებლის გარე ტერიტორიის მოვლა-პატრონობა:
"ჩვენ მხოლოდ სკოლის შიდა ტერიტორიის მოვლა-პატრონობა გვევალება. რამდენადაც ვიცი, ეს ნარჩენები თავად იმ ფირმას უნდა გაეტანა, რომელმაც სამუშაოები შეასრულა", _ ამბობს ხოფერია.
იგივე პრობლემაზე საუბრობს აყენებს ჩვენთან საუბარში ჟორდანიას ქუჩაზე მდებარე მრავალბინიანი საცხოვრებელი სახლის რამდენიმე მობინადრე _ ამ ტერიტორიაზე სანიაღვრე არხი მოეწყო და ასფალტის საფარი დაიგო, რაც აქ მცხოვრებთა კმაყოფილების მიზეზი გახდა. თუმცა, როგორც ზემოთ ნახსენებ შემთხვევაში, სამუშაოების შემსრულებელმა კომპანიამ ნარჩენი ნაგავი ადგილზე დატოვა.
"ჩქარ-ჩქარა შეასრულეს სამუშაოები და წავიდნენ, სამშენებლო ნარჩენები კი დაგვიტოვეს. ქალაქის ადმინისტრაციას მივმართეთ, რომ გაეტანათ ეს ნაგავი ჩვენი ეზოდან. დაგვპირდნენ, მოვაგვარებთ ამ საკითხსო. ერთი თვეა გასული და რეაგირება არ მოჰყოლია. კეთილი ინებონ და ან თავად გაიტანონ, ან იმ ფირმას დაავალონ ამ ნარჩენების გატანა, რომელმაც სამუშაოები შეასრულა", _ ამბობს ჩვენთან საუბარში მრავალბინიანი სახლის ერთ-ერთი მობინადრე ნადია ლუცი.
გამგეობის ზედამხედველობის სამსახურის უფროსი თენგიზ ხელაძე ჩვენთან საუბრისას ამბობს, რომ აღნიშნულ პრობლემას უახლოეს დღეებში მოაგვარებენ:
"ჩვენც საქმის კურსში ვართ ამ სამშენებლო ნარჩენებთან დაკავშირებით. როგორც კი ამინდები გამოვა, აუცილებლად გავიტანთ, როგორც მრავალბინიანი სახლის შიდა ეზოდან, ასევე, პირველი საჯარო სკოლის მიმდებარე ტერიტორიიდან. ეს იმ ფირმის მოვალეობაა, რომელმაც სამუშაოები შეასრულა და ის ამ ვალდებულებას აუცილებლად შეასრულებს", _ გვითხრა ხელაძემ.
