“ოჯახზე გადავიდნენ, მიცვალებული შეურაცხყვეს და ეს იყო ჩემთვის ამაზრზენი!”

საკუთარ თავს არ ვაკადრებ, რომ ჩემს პოლიტიკურ ოპონენტს ასეთი ხერხებით ვებრძოლო. თავისი ტრაგედიით, ან თავისი ოჯახის წევრების ტრაგედიით,” _ ამბობს “გურია ნიუსთან” ინტერვიუში კახი კალაძე.

_ ადამიანების უფლებების დარღვევა, პოლიტიკური ოპონენტების დევნა, დამოუკიდებელი მედიის შევიწროვება, უკანონო დაჭერები, საქართველოში დიდი ხანია დაწყებულია. თქვენი და ბიძინა ივანიშვილის პოლიტიკაში მოსვლამდე. როდესაც იტალიაში, მილანში ცხოვრობდით, როგორ ჩანდა ეს ყველაფერი იქედან?

¬_ მე ძალიან კარგად ვიყავი გათვითცნობიერებული, რა ხდებოდა ქვეყანაში და რა მდგომარეობა იყო, იმიტომ რომ დაინტერესებული ვიყავი და ვახერხებდი ყველა ინფორმაცია სხვადასხვა წყაროთი მიმეღო. არსებობენ უცხოელები, რომლებსაც აინტერესებთ, ქვეყანაში რა მდგომარეობაა. მათთვის ძალიან დიდი პრობლემაა ვირტუალური საქართველო, რომელსაც ხელისუფლება აჩვენებს მსოფლიოს თავისი პიარით და უნდა შექმნას ისეთი წარმოდგენა საქართველოზე, თითქოს ყველაფერი კარგად არის, დემოკრატიულად შენდება ყველაფერი. მაგრამ აღარავის სჯერა ამის, ყველამ დაინახა სააკაშვილის ხელისუფლების ნამდვილი სახე, დემოკრატიის ფასადს ამოფარებული ადამიანის სახე. ყველა დარწმუნდა იმაში, რაზეც ამდენი წლის განმავლობაში საუბრობდა ოპოზიცია ადამიანის უფლებებთან, ჟურნალისტებთან, ჩვეულებრივ მოქალაქეებთან დაკავშირებით. მე მგონი, ყველასთვის თვალნათელია ის რეალობა და მდგომარეობა, რაც ქვეყანაშია. ბატონი ბიძინა ივანიშვილის პოლიტიკაში შემოსვლით, ეს უკვე აშკარა გახდა. რთულია, ვერ დაინახო ის ყველაფერი, რაც აქ ხდება.

_ ყველაზე მეტად მაშინ ხომ არ იგრძენით ეს პრობლემა, როდესაც თქვენს მეგობარს გიორგი დემეტრაძეს შეეხო? პირველი ხმამაღალი განცხადება სწორედ მაშინ გააკეთეთ.

_ კი. გიორგი ჩემი მეგობარია. სრული პასუხისმგებლობით ვაცხადებ _ ის სრულიად უდანაშაულო ადამიანია. არანაირი წვლილი არ მიუძღვის მას იმ დანაშაულში, რაც მას წაუყენეს _ ქურდულ სამყაროსთან კავშირი და რაღაც სისულელეები. გიორგი არის ცნობადი სახე, ეს ჩვენ ყველამ ვიცით. ახლა, თქვენ წარმოიდგინეთ, რამდენი ადამიანია ისეთი, ვისაც საზოგადოებამ არ იცნობს და დღეს უკანონოდ იხდის სასჯელს. საქართველო მსოფლიოში პირველ ადგილზეა მოსახლეობასთან შეფარდებით პრობაციონერების რიცხვით. საერთო ჯამში, 300 ათასი პრობაციონერია, რაც ძალიან დიდი ციფრია.

ყველა ის ადამიანი, ვინც დღეს უკანონოდ იხდის სასჯელს, აუცილებლად გათავისუფლდება და დაბრუნდება სახლში. ყველა იმ ადამიანის საქმე გადაიხედება, რომელიც კითხვის ნიშნის ქვეშ დგას.

_ კარალეთის ამბებმა კიდევ ერთხელ გაუსვა ხაზი იმას, რომ წინასაარჩევნო პერიოდი იქნება დაძაბული, იქნება ზეწოლებიც. თქვენ მაჟორიტარობის კანდიდატი ბრძანდებით, სამტრედიაში, როგორ აპირებთ გაუმკლავდეთ ძალადობას?

_ კი, რა თქმა უნდა, ძალადობის მცდელობა იქნება, იქნება პროვოკაციებიც, მაგრამ მალე საქართველოში სადღაც 6 000 დამკვირვებელი ჩამოდის. მაქსიმალურად ვეცდებით, ყველა ჩვენი შეხვედრა, ეს იქნება რეგიონებში, ქალაქებში, დაბებში, აუცილებლად დამკვირვებლებთან ერთად ჩატარდეს.

რა თქმა უნდა, ექნებათ პროვოკაციების მცდელობა, სხვა არაფერი დარჩენიათ. რესურსი არ გააჩნიათ იმის, რომ არჩევნები მოიგონ, ხალხს გული შემოუბრუნონ. ის დაპირებები, პროგრამა, რომელიც მერაბიშვილმა შემოგვთავაზა, არის “ქართული ოცნების” პროგრამა, უბრალოდ ოთხზეა გამრავლებული. მაგრამ, აქ ერთი კითხვა უჩნდება ყველას _ ამდენი ხანი სად იყვნენ?! ახლა გახდა მათთვის სოფლის მეურნეობის განვითარება პრიორიტეტი?! სად იყვნენ 9 წლის განმავლობაში? ვინმე ხელს უშლიდათ?! ხიდებში 80 მილიონს რომ იხდიან და იუსტიციის სახლი 100 მილიონზე მეტი რომ ჯდება, რისთვის?! კი, ესეც მნიშვნელოვანია და უნდა გაკეთდეს, მაგრამ ეს არის მეორეხარისხოვანი ისეთ ქვეყანაში, სადაც ხალხი მშიერი კვდება და უმუშევარია. ჯერ ის ხალხი დაასაქმე, შეუქმენი პირობები და მერე ხიდიც გააკეთე, სახლებიც შეღებე და რაც გინდა, ის გააკეთე. ყველაზე მნიშვნელოვანი ამ ქვეყანაში არის უმუშევრობა და სიღარიბის ზღვარს მყოფი ადამიანების რიცხვი. ეს არის მთავარი პრობლემა.

_ კარალეთის კადრებში ჩანდა, რომ ძალიან გამოხვედით მდგომარეობიდან. ასეთი ძალადობის წინაშე პირველად აღმოჩნდით?

_ არა. პირველად არა. ყველა შეხვედრის დროს იყო ასეთი ძალადობა, მაგრამ უკვე როდესაც ყველანაირად ოჯახზე გადავიდნენ… ყველაფერს რომ გაგინებენ, ყველანაირად ცდილობენ მდგომარეობიდან გამოგიყვანონ. ის აღარ ეყოთ და მიცვალებულებზე გადავიდნენ, მიცვალებული შეურაცხყვეს და ეს იყო ჩემთვის ამაზრზენი.

მესმის, პოლიტიკა მნიშვნელოვანია, მაგრამ როდესაც შენს პოლიტიკურ ოპონენტს ასეთი ხერხებით ებრძვი, გაუმართლებელია. მე არ ვიკადრებ ამას! საკუთარ თავს არ ვაკადრებ, რომ პოლიტიკურ ოპონენტს ასეთი ხერხებით ვებრძოლო _ თავისი ტრაგედიით, ან თავისი ოჯახის წევრების შეურაცხყოფით. მე ასე წარმომიდგენია, ასე მიცხოვრია და მომავალშიც ასე ვაპირებ ცხოვრებას. კი, პოლიტიკა მესმის, მაგრამ ამას ყოველთვის ვუსვამ ხაზს, რომ პოლიტიკაზე მაღლა ვაყენებ ადამიანობას, კაცობას, ღირსებას და მორალს. ეს არის ჩემთვის მნიშვნელოვანი!