სტიქიასთან დაკავშირებული საბიუჯეტო ცვლილებების გამო, პრეზიდენტის ბრძანებულებით, რამდენიმე საბიუჯეტო ორგანიზაციას სხვადასხვა ოდენობის თანხა ჩამოეჭრა, ზოგს ნაკლები, ზოგს უფრო მეტი. ბიუჯეტშემცირებულ უწყებებს შორის აღმოჩნდა შინაგან საქმეთა სამინისტროც, რომელსაც 150 ათასი ლარი ჩამოაჭრეს. რა თქმა უნდა, ეს თანხა მიზერულია მაგრამ ”ქამრების შემოჭერის” პოლიტიკის ფონზე, ცოტა უცნაურია შინაგან საქმეთა ახალი მინისტრის გადაწყვეტილება თანამშრომლებისთვის ხელფასების მომატების შესახებ.
შესაბამისი ცვლილება დღეს განხორციელდა შს მინისტრის 2007 წლის ბრძანებაში „შსს-ს სისტემაში ფულადი სარგოს და დანამატის განსაზღვრის შესახებ“.
ცვლილების მიხედვით თანამშრომელთა ხელფასების ოდენობა ასე განისაზღვრა
დეპარტამენტის დირექტორის ხელფასი 2 560 ლარიდან 2 705 ლარამდე გაიზარდა; დეპარტამენტის დირექტორის მოადგილის ანაზღაურება იქნება 2 540 ლარი 2 395 ლარის ნაცვლად; მთავარი სამმართველოს უფროსის – 2 355 ლარი, 2 160 ლარის ნაცვლად; მთავარი სამმართველოს უფროსის მოადგილის – 2 235 ლარი 2 040 ლარის ნაცვლად.
ცვლილების თანახმად, სამმართველოს უფროსი მიიღებს 2 115 ლარს 1 920 ლარის ნაცვლად; სამმართველოს უფროსის მოადგილე და სამსახურის უფროსი მიიღებენ 2 000 ლარს, 1 805 ლარის ნაცვლად; განყოფილების უფროსი 1 295 ლარს, 1040 ლარის ნაცვალდ; რეგიონალური განყოფილების უფროსი 1 250 ლარს მიიღებს; განყოფილების უფროსის მოადგილე, რეგიონალური განყოფილების უფროსის მოადგილე და განსაკუთრებით მნიშვნელოვან საქმეთა ინსპექტორი – 1 210 ლარს.
უფროსი ინსპექტორისა და მთავარი სპეციალისტის ხელფასები 1 020 ლარი (იყო 780 ლარი) იქნება, ინსპექტორისა და წამყვანი სპეციალისტის – 950 ლარი (იყო 710 ლარი), ხოლო უმცროსი ინსპექტორისა და სპეციალისტის – 820 ლარი (იყო 590 ლარი).
გავრცელებული ინფორმაციით, შს ახალი მინისტრი ორგანოებიდან თანამშრომელთა მასობრივი წასვლის შეჩერებას ხელფასების მომატებით ცდილობს, როგორც ცნობილია, ახალაიას შს მინისტრად დანიშვნის შემდეგ, წასვლაზე განცხადება ბევრმა ჩინოვნიკმა დაწერა.
წასვლის მსურველთა რაოდენობამ იმ სახიფათო მაშტაბს მიაღწია, როდესაც უწყების გამართული მუშაობა ეჭვქვეშ დადგა, გავრცელებული ინფორმაციით, ვანო მერაბიშვილმა ყოფილ თანამშრომლებს პოლიციაში დარჩენა პირადად სთხოვა.
საკუთარი თანამშრომლებისთვის მოტივაციის ამაღლების ეს მეთოდი ახალაიას არასდროს გამოუყენებია თავდაცვის სამინისტროში.
