სააკაშვილის ვიზიტი მეტად გასაიდუმლოებული იყო და მასთან შეხვედრას არც ერთი მედია საშუალება არ ესწრებოდა. როგორც პრეზიდენტის დაცვის წევრებმა გვითხრეს, ღონისძიება დახურული იყო.
თავდაპირველად, “გურია ნიუსს” ოზურგეთში, რესტორან “ქალაქურთან” მდგომმა პრეზიდენტის დაცვის წევრებმა და პოლიციელებმა არ მისცეს ფოტოსა თუ ვიდეო კადრების გადაღების უფლება. ისინი კატეგორიულად გვთხოვდნენ, დაგვეტოვებინა ტერიტორია, სადაც პრეზიდენტი უნდა შეჩერებულიყო.
რესტორან “ქალაქურის” წინ რამდენიმე მოქალაქემ “გურია ნიუსს” თავისი პრობლემების შესახებ მოუთხრო: _ ოზურგეთში არასდროს არაფერი არ კეთდება. მოვიდნენ, ნახონ ჩვენს სოფელში თუ არის რაიმე გაკეთებული _ არც გზა გვაქვს, არც წყალი, არც გაზი. რატომ მოდის პრეზიდენტი გასაიდუმლოებულად, ამის შესახებ ჩვენ, მოსახლეობამ არაფერი არ უნდა ვიცოდეთ? ჩვენი პრობლემის შესახებ არ უნდა ვუთხრათ? არ ვართ ღირსი მოგვისმინოს?
“გურია ნიუსმა” მოახერხა ჩაეწერა პრეზიდენტის დაცვის წევრები და რამდენიმე პოლიციელი, რომლებიც კატეგორიულად გვთხოვდნენ, სასწრაფოდ დაგვეტოვებინა ჯერ რესტორან “ქალაქურის” მიმდებარე ტერიტორია, სადაც პრეზიდენტს ელოდებოდნენ და შემდეგ შპს “მედალაფა” _ ოზურგეთის სამედიცინო ცენტრი, სადაც პრეზიდენტმა, ჩვენი წყაროს ინფორმაციით, სამშობიარო განყოფილებაში მწოლიარეებს საჩუქრები დაურიგა.
_ გადაბრძანდით, თუ შეიძლება მეორე ქუჩაზე და გაარკვიეთ პრეზიდენტის პრესსამსახურში.
_ აქ ხომ დადიან უბრალო მოქალაქეები? ჩვენ რატომ არ გვაქვს უფლება, აქ ვიდგეთ?
_ უბრალო მოქალაქეები დადიან, მაგრამ ჟურნალისტებს არ აქვთ უფლება(?!).
_ რატომ რა დავაშავეთ? ადგილობრივ ჟურნალისტებს არ გვაქვს აქ დგომის უფლება?
_ ფოტოკამერით არა. ეს არის თხოვნა.
_ გვაჩვენეთ ბრძანება, რის საფუძველზეც არ გვაქვს უფლება, ვასრულებდეთ პროფესიულ მოვალეობას.
_ გადაბრძანდით მეზობელ ქუჩაზე!
“გურია ნიუსი” რამდენიმე საათის განმავლობაში ცდილობდა პრეზიდენტის პრესსამსახურის უფროსთან ნათია ბანძელაძესთან დაკავშირებას, რომელიც ჩვენს სატელეფონო ზარებს არ პასუხობდა, მოგვიანებით კი როცა ჩვენი კითხვა მოისმინა, ტელეფონი მაშინვე გაგვითიშა.
ამის შემდეგ “გურია ნიუსი” შპს “მედალფაში” ოზურგეთის სამედიცინო ცენტრში მივიდა.
_ აქ ღონისძიებაზე ხართ თუ რასთან დაკავშირებით? _ გვეკითხება ერთერთი ახალგაზრდა, რომელმაც თავი დაცვის წევრად, ვინმე ვანოდ წარმოგვიდგინა.
_ დიახ. ოზურგეთელი ჟურნალისტი ვარ. არ მაქვს უფლება ვიდგე იქ, სადაც პრეზიდენტს ელოდებიან?
_ შეთანხმების გარეშე არ შეიძლება.
_ ვისთან უნდა შევათანხმო? თქვენ ვინ ბრძანდებით?
_ მე ვანო მქვია. თქვენთვის არსებითი მნიშვნელობა არ აქვს, მე ვინ ვარ. უბრალოდ, პრეზიდენტის პრესსამსახურთან შეათანხმეთ.
_ როგორ მოვიქცე იმ შემთხვევაში, როცა ქალბატონი ნათია ტელეფონს არ იღებს? მოდით, თქვენთან ერთად დავრეკავ.
_ მე არ ვარ კომპეტენტური, ეგ თქვენ უნდა მოახერხოთ. ისე იცოდეთ, რომ საჯარო ღონისძიება არ არის. ხომ გესმით ჩემი სამსახურის _ შეთანხმების გარეშე ვერ შეგიშვებთ. მითხარით, როგორ მოვიქცე?
_ მე რა დავაშავე, როცა ჩემს მუნიციპალიტეტში ჩამოდის ქვეყნის პირველი პირი, აუცილებლად უნდა გავაშუქო ეს მოვლენა. საზოგადოებამ ამ ვიზიტის შესახებ არ უნდა იცოდეს?
_არავინ გეუბნებათ, რომ რაიმეს აშავებთ, ასეა საჭირო.
რამდენიმე წუთში პრეზიდენტიც მოვიდა. ჩვენ რამდენიმე კადრის გადაღება მოვახერხეთ, თუმცა დაცვის წევრებმა ” ფოტოების წაშლა და პირადი მონაცემების ჩაწერა მოგვთხოვეს.
_ ყველა ფოტოს გვიშლით?
_ ყველას არა. იმას რაც ახლა გადაიღეთ.
_ ჩვენ მსგავსი ფოტოები ყოველთვის გადაგვიღია, თუმცა, პრობლემები არასდროს შეგვქმნია.
_ ეს იყო დახურული შეხვედრა. თქვენ გადაიღებდით საჯარო ღონისძიებებს. კოორდინირებულ რეჟიმში ხომ უნდა ვიმუშაოთ, არა?
_ რისთვის გჭირდებათ პირადობის მონაცემები?
_ ასეა საჭირო. იქნებ ტელეფონიც გვანახოთ, რა ფოტოები გაქვთ ბოლოს გადაღებული?
_ თქვენ ვინ ბრძანდებით? ვის ვესაუბრებოდით და ვინ წაგვიშალა ფოტოები, ხომ უნდა ვიცოდეთ? თქვენც გაგვეცანით.
_დიდი ბოდიში, მაგრამ უნდა წაბრძანდეთ, _ გვითხრეს დაცვის წევრებმა და რამდენიმე მეტრ მანძილზე გამოგვაცილეს კიდეც.
დღეს სააკაშვილმა დაბა ანასეულში ჩაის ფაბრიკა მოინახულა, დაბა ნარუჯაში მოსახლეობას შეხვდა და მოცვის სადემონსტრაციო ნაკვეთს გაეცნო, დაბა ლაითურში კი ციხის მშენებლობაზე იმყოფებოდა.
