საგადასახადო სამსახურის მიერ, მოვაჭრეებისა და მეწარმეების მიუღებელი ხერხებით დაჯარიმების შესახებ “გურია ნიუსი” არაერთხელ წერდა, თუმცა, ამ ფაქტებს ჯერ ხელისუფლების მხრიდან რეაგირება არ მოჰყოლია _ კერძო აგენტების მიერ ოზურგეთში ტერორი კვლავ გრძელდება.
24 ივლისს, აბაშიძის ქუჩაზე მომხდარმა ინციდენტმა, რომელიც ერთ-ერთი სავაჭრო ობიექტის მეპატრონისა და საშემოსავლო სამსახურის მიერ დაქირავებულ კერძო აგენტებს შორის მომხდარა, როგორც იქ მყოფი მოვაჭრეები ამბობენ, ყოველგვარ ზღვარს გადააჭარბა: _ ამ ინციდენტს შეიძლება ეწოდოს “ჯანყი გურიაში”, _ უთხრეს გარემოვაჭრეებმა “გურია ნიუსს”. მათი თქმით, დასაჯარიმებლად გამიზნულად მისულ საგადასახადო აგენტებს, რომლებმაც დააპირეს მოვაჭრე 100 ლარით დაეჯარიმებინათ, წინააღმდეგობა გაუწიეს _ ამ მოვაჭრეს ყველა დაუდგა გვერდით და შეხლა-შემოხლა მოხდა. სიტუაციის განმუხტვაც მალე მოხდა, რადგან აგენტები შეშინდნენ, პრეზიდენტს ეგ ამბავი არ გაეგო.
_ გამოვიდა ხალხი მოთმინებიდან, გამოგვიყვანეს წყობიდან. აქ, იცით, როგორი ამბავი იყო? გინახიათ აზვირთებული, გადარეული ხალხის მასა? ყველა ერთმანეთს გვერდით დავუდექით. ლუკმა-პურის საშოვნელად ვართ გამოსულები ქუჩაში ამ სიცხეში, ყველას ბანკის ვალი გვაქვს, მაგათ უკანონობას კი საზღვარი არ აქვს, _ უთხრეს “გურია ნიუსს” გარემოვაჭრეებმა.
_ 60 წლის ვარ. ამ სიცხეში აქ ჩემი შვილიშვილი ზის. დღეს საცოდავად ვეფარებოდი, იქნებ, როგორმე მზის სიცხისგან დამეცვა. ვყიდით ბოსტნეულს, რომ მშიერი არ ვიყოთ და ესენი გვაყაჩაღებენ! საშველი აღარ გვაქვს. თქვენ რომ დაწერთ, რაიმე რეაგირება იქნება? ვიცით, რომ დაწერთ, ყველა გაიგებს, მაგრამ რაა _ მაგათ აინტერესებთ რაიმე?
_ მე 20 დღის გაკეთებული მქონდა ნაღვლის ბუშტის ოპერაცია, როცა ქუჩაში დავდექი იმის გულისთვის, რომ შვილებისთვის პური მივიტანო სახლში. რამდენჯერ მივმართე გამგეობას დახმარებისთვის, მაგრამ არაფერი. იცით რატომ? პატრონი რომ არ მყავს, იმიტომ. იქაც ჩაწყობაზეა ყველაფერი!
_ ამ საცოდავი ხალხის საშველი რა არის? არაფერი. ვერც ჟურნალისტები გვიშველიან, არც ოპოზიცია არის ჩვენთვის, არც ივანიშვილი იქნება და არც სახელმწიფოა გლეხისთვის, გაჭირვებულისთვის. არასოდეს არაფერი ყოფილა და არც იქნება. არაფრის იმედი არ გვაქვს, _ ეს ის მოსაზრებებია, რომლებიც “გურია ნიუსს” ინციდენტის თვითმხილველებმა გაუზიარეს.
